ភាពយន្តដ៏ល្បីកាល ២០០៦ ត្រូវបានយកមកបញ្ចាំងឡើងវិញអបអរព្រះរាជពិធីបុណ្យអុំទូក

2014-11-05 17:00:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីចូលរួមអបអរព្រះរាជពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ ភាពយន្តដ៏ល្បីមួយផលិតដោយលោក ហ្វៃ សំអាង រឿង "មន្តមាយា" ត្រូវបានយកមកដាក់បញ្ចាំងសារជាថ្មីនៅថ្ងៃបុណ្យអុំទុកថ្ងៃទី១នេះ នៅរោងភាពយន្តវិមានសួគ៌ស្ថិតក្នុងខណ្ឌឫស្សីកែវ។

ក្រៅតែពីដើម្បីអបអរព្រះរាជពិធីបុណ្យអុំទូក អកអំបុក និងសំពះព្រះខែដែលទើបរៀបចំជាថ្មី បន្ទាប់ពីអាក់អានចំនួន៣ឆ្នាំ ការយករឿង "មន្តមាយា" ភាពយន្តដ៏ល្បីកាលឆ្នាំ២០០៦ មកដាក់បញ្ចាំងជាថ្មីនាពេលនេះ គឺនៅមានគោលបំណងពីរផ្សេងទៀត។

លោក ហ្វៃ សំអាង ជាផលិតករ បានប្រាប់ Sabay ថា ហេតុផលទី១ គឺដើម្បីឆ្លើយតបនឹងការទទូចរបស់ទស្សនិកជនមួយចំនួនដែលមិនទាន់ និងសូម្បីតែអ្នកទស្សនារួចហើយ ខណៈរឿងនេះអត់មានបានចេញជា VCD ទេ និងទី២ គឺដើម្បីអបអរនឹងការបើកសម្ពោធរោងភាពយន្តថ្មី "វិមានសួគ៌" របស់លោក ឧកញ៉ា តុង សេង ដែលលោក គឺជាម្ចាស់ផលិតនៃរឿងនេះ។

"យើងក៏ចង់ឲ្យទស្សនិកជនទស្សនាហើយធ្វើការប្រៀបធៀបពីភាពយន្តខ្មែរកាលជិត១០ឆ្នាំមុន នឹងឥឡូវខុសគ្នាយ៉ាងម៉េច ព្រោះឥឡូវមានបច្ចេកវិទ្យាទំនើបជាងមុន និងមើលពីការសម្ដែងរបស់សិល្បករយើងកាលហ្នុង ថាឥឡូវខុសគ្នាយ៉ាងណា រួចហើយជួយរិះគន់កែលម្អទាំងអស់គ្នា"។ លោក ហ្វៃ សំអាង បន្ថែម។

"មន្តមាយា" ផលិតឡើងនៅឆ្នាំ ២០០៦ ដោយមានឧកញ៉ា តុង សេង ជាម្ចាស់ផលិត ហើយលោក ហ្វៃ សំអាង គឺជាអ្នកនិពន្ធ និងដឹកនាំរឿង។ ខ្សែភាពយន្តនេះ បានដាក់បញ្ចាំងនៅរោងភាពយន្តចំនួន៣ គឺរោងភាពយន្តបូកគោ វិមានទិព្វ និងព្រហ្មបាយ័ន ដោយរយៈពេលដាក់បញ្ចាំងចំនួន៣ខែ។ លោក ហ្វៃ សំអាង អះអាងថា កាលណោះ "មន្តមាយា" រកចំណូលបានដល់ទៅជាង ៣០ម៉ឺនដុល្លារសហរដ្ឋអាមេរិកឯណោះ។

ចំពោះការដាក់បញ្ចាំងជាថ្មីនេះ រឿង "មន្តមាយា" មានដាក់បញ្ចាំងនៅរោងភាពយន្តវិមានសួគ៌ ជារោងភាពយន្តថ្មីមួយស្ថិតនៅគីឡូម៉ែត្រលេខ៦ខាងជើងទូរទស្សន៍ CTN ចម្ងាយ២០០ម៉ែត្រ។ ពេលវេលានៃការចាក់បញ្ចាំង មានចំនួន៤ដងក្នុងមួយថ្ងៃ គឺពេលព្រឹកម៉ោង ៩:00 ពេលរសៀលម៉ោង ២:00 ពេលល្ងាចម៉ោង ៤:00 និងពេលយប់ម៉ោង ៦:00។

តួសម្ដែងនៅក្នុងរឿងនេះមានដូចជាលោក ម៉េង ប៊ុនឡូ អ្នកនាង ចន ច័ន្ទលក្ខិណា អ្នកនាង ដាញ់ ម៉ូនីកា អ្នកនាង ស្រីម៉ុច កញ្ញា ឆៃ លីដាឡែន នាងកាតុ ប៉េងប៉ោង នាយ កុយ សានម៉ៅ រួមទាំងតារាកិត្តិយសជាច្រើនដួងទៀត៕

អត្ថបទ៖ ទារិកា