Facebook រកចំណូលបានកប់ក្ដោងទៀតហើយនៅត្រីមាសទី ៣

2016-11-03 16:41:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Facebook បានបញ្ចេញរបាយការណ៍ហិរញ្ញវត្ថុប្រចាំត្រីមាសទី ៣ ឆ្នាំ ២០១៦ ដែលបង្ហាញចំណូលនៅតែបន្តកើនឡើងឥតឈប់ឈរ។

សម្រាប់រយៈពេល ៣ ខែនៃត្រីមាសទី ៣ នេះ Facebook អាចរកចំណូលសរុបបាន ៧,០១ ពាន់លានដុល្លារ ធៀបនឹងរយៈពេលដូចគ្នាកាលពីឆ្នាំមុន កើនឡើង ៥៩% ដែលមានចំណូលសរុប ៤,២៩ ពាន់លានដុល្លារ។ ក្រឡេកមើលចំនួនអ្នកប្រើប្រាស់សកម្មប្រចាំថ្ងៃវិញគិតត្រឹមខែកញ្ញាឆ្នាំ ២០១៦ មានចំនួន ១,១៨ ពាន់លាននាក់ កើនឡើង ១៧% ធៀបនឹងឆ្នាំមុន។ ក្នុងចំណោមអ្នកប្រើប្រាស់ទាំង ១,១៨ ពាន់លាននាក់នេះមាន ១,០៩ ពាន់លាននាក់ជាអ្នកប្រើប្រាស់តាមទូរសព្ទ។

ចំពោះទិន្នន័យអ្នកប្រើប្រាស់សកម្មប្រចាំខែគិតត្រឹមខែកញ្ញា ឆ្នាំ ២០១៦ មានចំនួន ១,៧៩ ពាន់លាននាក់ កើនឡើង ១៦% បើធៀបនឹងឆ្នាំមុន ហើយក្នុងចំណោមអ្នកប្រើប្រាស់ទាំងនេះមាន ១,៦៦ ពាន់លាននាក់ ជាអ្នកប្រើប្រាស់តាមទូរសព្ទ។

សរុបរយៈពេល ៩ ខែដំបូងនាឆ្នាំ ២០១៦ នេះ Facebook រកចំណូលសរុបបាន ១៨,៨២ ពាន់លានដុល្លារ ប្រៀបនឹងឆ្នាំ ២០១៥ រយៈពេល ៩ ខែដំបូង រកចំណូលបានត្រឹម ១២,០៨ ពាន់លានដុល្លារប៉ុណ្ណោះ៕

ចុចអាន៖ Facebook ចេញមុខងារថ្មីប្រជែង Snapchat

ប្រែសម្រួល៖ ហៃ សុខហេង ប្រភព៖ Facebook