រូបភាពកម្របានឃើញពីប្រាសាទតាមាន់ អ្នកឃើញហើយចង់ទៅលេងមិនខាន

2016-11-05 16:52:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាសាទតាមាន់ ស្ថិតនៅភូមិតាមាន់សែនជ័យ ឃុំគោកមន ស្រុកបន្ទាយអម្ពិល ខេត្តឧត្តរមានជ័យ។ ប្រាសាទមួយនេះ ដូចដែលប្រិយមិត្តបានដឹងគ្រប់គ្នាហើយថា ជាកន្លែងក្ដៅមួយរវាងកងទ័ពកម្ពុជា និងថៃកាលពីឆ្នាំ២០១១កន្លងទៅ។

ប្រាសាទដែលកសាងឡើងកាលពីសតវត្សរ៍ទី១១នេះ តាំងពីមានការប៉ះគ្នារវាងក្រុមទ័ពប្រទេសទាំងពីរមក មិនសូវមានអ្នកទៅលេងនោះទេ។ កាលពីមុនផ្លូវឡើងទៅប្រាសាទក៏មានការពិបាកផងដែរ។ យ៉ាងណាមិញ នាពេលបច្ចុប្បន្ននេះ ប្រិយមិត្តអស់បារម្ភទៀតហើយ ពោលគឺផ្លូវឡើងទៅប្រាសាទក៏បានធ្វើថ្មីអាចបើកបរបានដល់កំពូល ហើយក៏មានសុវត្ថិភាពផងដែរ។

និយាយពីសម្រស់នៃប្រាសាទនេះវិញ ពេលធ្វើដំណើរដល់ជើងភ្នំ ភ្ញៀវនឹងបានឃើញទេសភាពស្អាត នៅតាមជួរភ្នំដងរែក ដែលមានទាំងដើមឈើធំៗ មែកត្រឈឹងត្រឈៃ ស្របពេលខែនេះទៀតនោះ មានពណ៌ខៀវស្រងាត់តែម្ដង។ នៅក្បែរភ្នំនេះទៀតសោត មានកូនភ្នំ២ដែលមានសម្រស់ស្រស់ស្អាតខ្លាំងណាស់ គឺភ្នំកំព្រា និងភ្នំបេះដូង ដោយក្នុងនៅលើភ្នំនេះ មានផ្កាធម្មជាតិដុះច្រើនខ្លាំងមែនទែន។

បញ្ជាក់បន្ថែមត្រង់សុវត្ថិភាពកុំឱ្យប្រិយមិត្តមានការភ័យខ្លាចនោះ គឺនៅលើកំពូលប្រាសាទតាមាន់មានកងកម្លាំងកម្ពុជានិងថៃ យាមនៅជិតគ្នាតែម្ដង ដោយមានម្ខាង៧នាក់។ ក្រុមទាហានទាំងពីរនេះ មិនមានបញ្ហានិងគ្នាទេ ដោយបាយក៏ជុំគ្នា ហើយមានអ្វីញ៉ាំក៏ចែកគ្នាញ៉ាំដែរ។ ប្រាសាទនេះ ចាប់ផ្ដើមបើកឱ្យអ្នកទេសចរចូលមើលចាប់ពីម៉ោង៩ព្រឹក ទល់និងម៉ោង៣ល្ងាច៕