ប្រជាជនខ្មែរភាគច្រើនទៅពិនិត្យសុខភាពនៅថៃ តាមច្រកព្រំដែនអូរស្មាច់

2016-11-06 16:32:32
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងតិចមានប្រជាជនខ្មែរចេញ-ចូលថៃជាង ១០០នាក់ក្នុង ១ថ្ងៃ តាមច្រកព្រំដែនអូរស្មាច់ ខេត្តឧត្តរមានជ័យ។ ក្នុងចំណោមតួលេខនេះ ប្រហែលជា ៨០% គឺប្រជាជនខ្មែរបានទៅខេត្តសុរិន្ទ របស់ប្រទេសថៃ ដើម្បីពិនិត្យសុខភាព។ នេះបើតាមការលើកឡើងពីអ្នករត់ម៉ូតូឌុបម្នាក់ ប្រាប់ក្រុមការងារ"ផ្លូវទៅស្រុក" ឲ្យដឹងកាលពីថ្ងៃទី ២ ខែវិច្ឆិកា នេះ។

អ្នករត់ម៉ូតូប្រចាំតំបន់នេះជាង ១០ ឆ្នាំ តែសុំមិនបញ្ចេញឈ្មោះបានប្រាប់ក្រុមការងារ "ផ្លូវទៅស្រុក" ថា ហេតុតែលោកដឹងដោយសារមានភ្ញៀវមកពីខេត្តផ្សេងៗ ក៏ដូចជា អ្នកនៅភ្នំពេញធ្លាប់មកដល់ទីនេះ ហើយសួរនាំច្រើនអំពីនីតិវិធីធ្វើដំណើរទៅថៃ ដើម្បីពិនិត្យសុខភាព។ "ខ្ញុំមិនមែនអ្នកស៊ើបការអីទេ...(ស៊ើច...) គ្រាន់តែមកដល់គេចង់ដឹងព័ត៌មានហើយខ្ញុំប្រាប់ឲ្យទៅទាក់ទងខាងប៉ុស្តិ៍នគរបាលទៅ"។

ប្រភពដដែលបានបន្តទៀតថា "ខ្ញុំឃើញមនុស្សចេញចូលច្រកព្រំដែននៅទីនេះ ក្នុងនោះមិនក្រោមជាង ១០០នាក់ទេ ក្នុងមួយថ្ងៃ ហើយក្នុងនោះភាគច្រើនជាភ្ញៀវខ្មែរទៅពិនិត្យសុខភាពនៅមន្ទីរពេទ្យរបស់ថៃ ក្នុងខេត្តសុរិន្ទ និងទិញទំនិញថៃលក្ខណៈគ្រួសារផងដែរ"។

ទាក់ទងនឹងបញ្ហានេះ ភ្លាមៗក្រុមការងារ "ផ្លូវទៅស្រុក" បានព្យាយាមទាក់ទងមន្ត្រីការិយាល័យប៉ូលិសអន្តោប្រវេសន៍ប្រចាំច្រកទ្វារព្រំដែនអន្តរជាតិអូរស្មាច់ដែរ ប៉ុន្តែមន្ត្រីទាំងនោះមិនបានផ្ដល់កិច្ចសម្ភាសន៍នោះទេ ដោយស្នើឲ្យទាក់ទងខាងថ្នាក់លើជាមុនសិន ទើបអាចផ្ដល់កិច្ចសម្ភាសន៍៕