មូលហេតុក្រុមហ៊ុនផ្លូវការ នាំ iPhone 7/7 Plus ចូលទីផ្សារកម្ពុជាយឺតយ៉ាវ
- 2016-11-07 15:43:45
- ចំនួនមតិ 0 | ចំនួនចែករំលែក 0
មូលហេតុក្រុមហ៊ុនផ្លូវការ នាំ iPhone 7/7 Plus ចូលទីផ្សារកម្ពុជាយឺតយ៉ាវ
ចន្លោះមិនឃើញ
ក្រុមហ៊ុនផ្លូវការទើបតែបាននាំ iPhone 7/7 Plus ចូលទីផ្សារកម្ពុជាកាលពីថ្ងៃសុក្រសប្តាហ៍មុន ខណៈតាមបណ្តាហាងធំៗនៅភ្នំពេញមានលក់តាំងពីថ្ងៃ ១៦ កញ្ញាកន្លងមកម្លេះ។
បុគ្គលិកនៅក្រុមហ៊ុនទទួលសិទ្ធលក់ iPhone ផ្លូវការមួយក្នុងប្រទេសកម្ពុជា បញ្ជាក់ថា Apple មានកាលបរិច្ឆេទផ្សេងគ្នាចំពោះការដាក់លក់ iPhone 7/7 Plus លឿននិងយឺត អាស្រ័យតាមប្រទេសនីមួយ។
សម្រាប់ការបរិច្ឆេទដាក់លក់ iPhone ស៊េរីថ្មីនៅកម្ពុជា ជាទូទៅខ្ទង់ជាងមួយខែទើបមកដល់ ក្រោយការដាក់លក់ផ្លូវការលើកដំបូងលើទីផ្សារ តាមបណ្តាប្រទេសមួយចំនួនលើពិភពលោក។
ប្រភពដដែលឲ្យដឹងថា សម្រាប់ទីផ្សារថៃ ធម្មតាដាក់លក់ iPhone 7/7 Plus ផ្លូវការប្រហែលជាងមួយសប្តាហ៍មុនកម្ពុជា។ យ៉ាងណាលោកថា ការនាំ iPhone ស៊េរីថ្មីមកកម្ពុជាឆ្នាំនេះ ហាក់លឿនជាងឆ្នាំមុន ដោយកាលជំនាន់ iPhone 6s/6s Plus រហូតដល់ពាក់កណ្តាលខែវិច្ឆិកា ទើបក្រុមហ៊ុនដាក់លក់ផ្លូវការទូទាំងប្រទេស។
សម្រាប់បណ្តាហាងលក់ទូរសព្ទនៅភ្នំពេញដែលបានដាក់លក់ iPhone 7/7 Plus តាំងពីថ្ងៃទី ១៦ កញ្ញា លោកថា ដូចដឹងស្រាប់ ជាការដាក់លក់ក្រៅផ្លូវការ គ្មានការធានាពី Apple ដូច្នេះអតិថិជនងាយនឹងជួបហានិភ័យចំពោះផលិតផលដែលទិញប្រើ៕
អាន៖ iPhone 7/7 Plus ពណ៌ខ្មៅគ្រើមនិងរលោង លក់ដាច់ខ្លាំង
អត្ថបទ៖ ប៉ែត ផាន់និត