ស្រីស្អាតកូនកាត់ខ្មែរ-បារាំង តំណាងកម្ពុជាប្រកួត Miss Tourism 2016

2016-11-14 05:24:38
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ហង្ស ម៉ានីតា កូនកាត់ខ្មែរ-បារាំង ត្រូវបានជ្រើសរើសក្លាយជាបេក្ខភាព Miss Tourism តំណាងកម្ពុជា ចូលរួមប្រកួត Miss Tourism Metropolitan ដោយបានឆ្លងកាត់វគ្គជម្រុះចំនួន៤វគ្គរួចមកហើយ។

ម៉ានីតា នឹងបន្តបេសកកម្មក្នុងកម្មវិធីដែលផ្ដួចផ្ដើមដោយ ម៉ាឡេស៊ី នៅវគ្គផ្ដាច់ព្រ័ត្រជាមួយបេក្ខភាពមកពីប្រទេសចំនួន៤០ផ្សេងទៀត ដើម្បីឈានទៅមកុដជយលាភី Miss Tourism Metropolitan ដែលវគ្គនេះ ត្រូវប្រារព្ធធ្វើនៅទឹកដីរបស់កម្ពុជា។

យុវតីវ័យ ១៨ឆ្នាំ អះអាងថា នឹងប្រឹងប្រែងឲ្យអស់ពីសមត្ថភាព ក្នុងនាមតំណាងតែមួយគត់របស់កម្ពុជាក្នុងកម្មវិធីនេះ និងចង់ឃើញកម្ពុជាមានមុខមាត់លើឆាកអន្តរជាតិ។ "ខ្ញុំសប្បាយរីករាយណាស់ ដែលទទួលបានឱកាសជាបេក្ខភាពតំណាងកម្ពុជា ក្នុងការប្រកួតនេះ អីចឹងខ្ញុំនឹងខំប្រឹង និងសង្ឃឹមថាបានលទ្ធផលល្អ"។

ស្តាប់ ម៉ានីតា រៀបរាប់លម្អិតក្នុងវីដេអូខាងក្រោម៖

មានម្ដាយជាជនជាតិខ្មែរ ឪពុកជាជនជាតិបារាំងហង្ស ម៉ានីតា មានទម្រង់មុខដូចបារាំងភាគច្រើន។នាងអះអាងថា មានមនុស្សជាច្រើន មិនចង់ជឿថានាងជាខ្មែរ ដែលពេលមានទំនាក់ទំនងគេតែងសួរនាងថា "ចេះខ្មែរទេ?"។ តែតាមពិតនាងកើត និងធំធាត់លើទឹកដីរបស់កម្ពុជា ជាហេតុធ្វើឲ្យនាងចេះនិយាយភាសាខ្មែរច្បាស់ដូចប្រជាពលរដ្ឋខ្មែរទូទៅដែរ។

នៅយប់មិញនេះ ម៉ានីតា រួមទាំងបេក្ខភាពចំនួន៤១រូបផ្សេងទៀត បានជួបជុំគ្នាទទួលទានអាហារជុំគ្នាដែលរៀបចំដោយស្ថានម៉ាឡេស៊ីប្រចាំនៅកម្ពុជា មុនពេលកម្មវិធីប្រកួតនឹងចាប់ផ្ដើមនៅថ្ងៃទី១៨ខែឆ្នាំដដែលនៅរាជធានីភ្នំពេញដែលជាការរៀបចំលើកទី១របស់កម្មវិធី។

លោក Dato Sri Hasan Malek ឯកអគ្គរាជទូតម៉ាឡេស៊ីប្រចាំនៅកម្ពុជា បានមានប្រសាសន៍ថា កម្ពុជាជាប្រទេសដ៏ស្រស់ស្អាតមួយ ដែលមានតំបន់អំណោយផលជាច្រើនលើវិស័យទេសចរណ៍។ ដូច្នេះហើយ លោកមានក្ដីសោមនស្សរីករាយណាស់ដែលអាចបង្កើតឲ្យមានកម្មវិធីខាងលើនៅទីនេះ(ភ្នំពេញ)។

ស្រីស្អាតតំណាងប្រទេសនីមួយៗ នឹងទទួលបានឱកាសផ្សព្វផ្សាយពីសក្ដានុពលផ្សេងៗប្រទេសរបស់ខ្លួនទៅកាន់ពិភពលោក។ ម៉ានីតា តំណាងកម្ពុជា ថ្លែងថា នឹងបើកបង្ហាញពីតំបន់ទេសចរណ៍ជាតិ និងប្រវត្តិសាស្ត្ររបស់កម្ពុជាមកបង្ហាញជូនដូចដែលនាងបានធ្វើក្នុង៤វគ្គកន្លងមកដែរ ហើយនាងសង្ឃឹមថា ទទួលបានលទ្ធផលល្អដូចគ្នា៕