៤ ចំណុចសំខាន់ៗ ជួយវិស័យអចលនទ្រព្យកម្ពុជា រីកចម្រើន
- 2016-11-24 03:13:36
- ចំនួនមតិ 0 | ចំនួនចែករំលែក 0
៤ ចំណុចសំខាន់ៗ ជួយវិស័យអចលនទ្រព្យកម្ពុជា រីកចម្រើន
ចន្លោះមិនឃើញ
លោក គឹម ហ៊ាង ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា បានលើកឡើងថា ដើម្បីឱ្យវិស័យអចលនទ្រព្យ ក្នុងប្រទេសកម្ពុជា មានការរីកចម្រើនប្រកបដោយនិរន្តរភាព គឺត្រូវមានកត្តាសំខាន់ៗ ដូចជា កត្តាសេដ្ឋកិច្ច កត្តានយោបាយ កត្តាប្រជាសាស្ត្រ និង កត្តាច្បាប់។
ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា បានលើកឡើងដូចខាងក្រោម៖
១. កត្តាសេដ្ឋកិច្ច
លោកបានថ្លែងថា វិស័យអចលនទ្រព្យ អាចរីកចម្រើនទៅបានគឺអាស្រ័យលើកត្តាសេដ្ឋកិច្ចជាចម្បង។ កាលណាបើសេដ្ឋកិច្ចនៅតែដំណើរការល្អកំណើនប្រជាជន ដែលមករស់នៅទីក្រុងនឹងមានការកើនឡើង ហើយកំណើនការវិនិយោគក៏មានការកើនឡើងដូចគ្នា។ លោកបានបន្តទៀត កំណើនសេដ្ឋកិច្ចរីកចម្រើនប្រមាណ ៧ភាគរយ ក្នុងមួយឆ្នាំ ដូចនេះប្រសិនបើសេដ្ឋកិច្ចនៅតែបន្តរីកចម្រើននោះកំណើនប្រជាជនដែលមករស់នៅភ្នំពេញអាចមានចន្លោះពី ៣០ទៅ ៤០ ម៉ឺននាក់ក្នុងមួយឆ្នាំ។
២.កត្តានយោបាយ
ស្ថានភាពនយោបាយគឺជារឿងសំខាន់បំផុត ប្រសិនបើស្ថានភាពនយោបាយ មិនល្អនោះនឹងធ្វើឱ្យការអភិវឌ្ឍទៅលើការសាងសង់ ការទិញផ្ទះ អាគារ ដីធ្លី នឹងមានការរាំងស្ទះ។ លោកបញ្ជាក់ថា បច្ចុប្បន្ននេះ ស្ថានភាពនយោបាយ មានលក្ខណៈល្អប្រសើរ ដែលជាកត្តាជំរុញឱ្យ វិស័យអចលនទ្រព្យក្នុងប្រទេសកម្ពុជា មានការរីកចម្រើនពីមួយថ្ងៃ ទៅមួយថ្ងៃ ដោយសារអ្នកវិនិយោគ បណ្ដាក្រុមហ៊ុន ឯកជននានា មានទំនុកចិត្តក្នុងការវិនិយោគលើវិស័យនេះ ។ ដូចនេះប្រសិនបើ ស្ថានភាពនយោបាយនៅតែដំណើរការល្អនោះ វិស័យអចលនទ្រព្យ ក្នុងប្រទេសកម្ពុជានឹងនៅបន្តការរីកចម្រើនដូច្នោះដែរ។
៣.កត្តាប្រជាសាស្ត្រ
លោក គឹម ហ៊ាង បានឱ្យដឹងទៀតផងដែរ ថា កត្តាប្រជាសាស្ត្រ ក៏ជាចំណែកមួយយ៉ាងសំខាន់ ក្នុងជំរុញឱ្យវិស័យអចលនទ្រព្យមានការរីកចម្រើន។ នៅត្រង់ចំណុចនេះ លោកចង់សំដៅថា ប្រជាជនមាននិន្នាការក្នុងការផ្លាស់ប្ដូរទីលំនៅនឹងជំរុញឱ្យមានការសាងសង់ អាគារស្នាក់នៅ ខុនដូរ ផ្ទះល្វែង បុរី នានា កាន់តែច្រើនឡើង។ ជាក់ស្ដែងបច្ចុប្បន្ននេះ ប្រជាជនចេញចូលទីក្រុងភ្នំពេញជាប្រចាំប្រមាណ៣លាននាក់ និងបន្តកើនឡើងក្នុងឆ្នាំ ២០២០ និង ២០២៥ អាចមានកំណើនរហូតទៅដល់៥លាននាក់។ ដូចនេះ ដើម្បីបំពេញនូវតម្រូវការទីកន្លែងស្នាក់នៅ បានជំរុញឱ្យអ្នកវិនិយោគទាំងជាតិ និង អន្តរជាតិ មានការកើនឡើងឥតឈប់ឈរ ហើយការសាងសង់ឥតឈប់ឈរដូចគ្នា ជារៀងរាល់ថ្ងៃ។
៤. កត្តាច្បាប់
"ការអភិវឌ្ឍឱ្យមានការរីកចម្រើនឆាប់រហ័ស គឺជារឿងមិនពិបាកនោះទេ តែការរីកចម្រើន ប្រកបដោយនិរន្តរភាពទើបជារឿងដែលយើងគួរតែគិតទាំងអស់គ្នា"។ លោកបានលើកឡើងដូចនេះ មានន័យថា បណ្ដាក្រុមហ៊ុនជាច្រើន ដែលវិនិយោគក្នុងវិស័យនេះ មិនមានច្បាប់អនុញ្ញាតត្រឹមត្រូវ បានរកស៊ីខុសច្បាប់បោកប្រាស់ប្រជាជន និងមិនមែនជាសមាជិកក្នុង សមាគមវាយតម្លៃអចលនទ្រព្យកម្ពុជានោះទេ។ ហើយនៅក្នុងនោះមានអ្នកគួកជេរ ឈ្មួញជើងសារជាច្រើនធ្វើការរកស៊ីមិនស្របច្បាប់ ដែលជាកត្តាធ្វើឱ្យការរីកចម្រើនមិនប្រកបដោយនិរន្តរភាព។ ដូចនេះ មិនថា ប្រជាជនធម្មតា អ្នករកស៊ី អ្នកធំអ្នកតូចទាំងអស់គឺត្រូវគោរពច្បាប់ មានច្បាប់អនុវត្តច្បាប់ កុំបំពានលើច្បាប់ ត្រូវចូលរួមទាំងអស់គ្នា ទើបអចលនទ្រព្យក្នុងប្រទេសកម្ពុជារីកចម្រើនប្រកបដោយនិរន្តរភាព។