៧ចំណុចសំខាន់ៗបំផុត រៀបចំមង្គលការកុំឱ្យខាត

2016-12-05 07:04:10
ចំនួនមតិ 0 | ចំនួនចែករំលែក 0

ចន្លោះមិនឃើញ

មង្គលការគឺជារឿងសំខាន់បំផុតក្នុងជីវិតរបស់គូស្នេហ៍ និងជាក្ដីប្រាថ្នារបស់មនុស្សគ្រប់រូបចង់មានថ្ងៃនោះ។ ប៉ុន្តែមុនថ្ងៃមង្គលការមកដល់សាមីខ្លួនដែលត្រៀមចូលរោងការ និងឪពុកម្ដាយទាំងខាងស្រីទាំងខាងប្រុស តែងរៀបចំគិតគូរយ៉ាងល្អិតល្អន់ធ្វើយ៉ាងណាអោយមង្គលការរៀបចំដោយរលូន។ ទោះបីជាគិតគូរគ្រប់ជ្រុងជ្រោយយ៉ាងណាក៏ដោយ មង្គលការខ្លះក្រោយបញ្ចប់ហើយតែងមានការខាតបង់លុយកាក់ និយាយឱ្យចំគឺខាតចំណងដៃ។ ដូចនេះគួរធ្វើដូចម្ដេចដើម្បីរៀបចំមង្គលការកុំឱ្យខាត? អ្នកស្រី កល្យាណ ទើបតែរៀបការជាងមួយឆ្នាំបានចែករំលែកគន្លឹះសំខាន់ដូចខាងក្រោម៖

១. កំណត់ចំនួន និងភ្ញៀវសំខាន់ៗដែលត្រូវហៅ

មុនថ្ងៃមង្គលការមកដល់រឿងដែលត្រូវគិតមុនគេ និងចាំបាច់បំផុតនោះគឺការកំណត់ចំនួនភ្ញៀវដែលត្រូវហៅ។ នៅត្រង់ចំណុចនេះមានន័យថា ម្ចាស់កម្មវិធីត្រូវធ្វើការប៉ានស្មាន តើភ្ញៀវប៉ុន្មាននាក់ដែលត្រូវហៅ? ហើយប៉ុន្មាននាក់ដែលអាចមកបាន និងប៉ុន្មាននាក់ដែលអាចផ្ញើលុយ? អ្នកស្រី កល្យាណ ប្រាប់ថាធ្វើដូចនេះដើម្បីងាយស្រួលក្នុងការរៀបចំតុ ដើម្បីទទួលភ្ញៀវ និងជៀសវាងការខាតបង់ ពីព្រោះភ្ញៀវមិនមែនអញ្ជើញទាំង១០០នាក់ មកទាំងមួយរយនោះទេ ហើយក៏មិនមែនចេះតែហៅផ្ដេសផ្ដាសដែរ លុះត្រាតែអ្នកនោះជាអ្នកជិតស្និតខ្លាំង ចាំអញ្ជើញគេមក។

២. កំណត់ចំនួនតុឱ្យច្បាស់លាស់

ចំនួនតុត្រូវរៀបចំឱ្យត្រូវនឹងចំនួនភ្ញៀវដែលត្រូវហៅ មិនត្រូវកំណត់ចំនួនតុហើយ ទើបកំណត់ចំនួនភ្ញៀវនោះទេ។ អ្នកដែលរៀបការហើយខាតនោះ គឺមកពីធ្វេសប្រហែសចំណុចនេះ មង្គលការធំដុំ ឬមិនធំដុំមិនមែនអាស្រ័យចំនួនតុតិច ឬច្រើននោះទេ គឺអាស្រ័យលើចំនួនភ្ញៀវដែលអញ្ជើញមកផ្ទាល់តិចឬច្រើន។ កំណត់ចំនួនភ្ញៀវឱ្យហើយចាំកំណត់ចំនួនតុទើបល្អ ហើយជាពិសេសត្រូវជ្រើសរើសតម្លៃតុឱ្យត្រឹមត្រូវ ថាមួយតុគួរយកតម្លៃប៉ុន្មាន ១៥០ដុល្លារក្នុងមួយតុឬក្រោមនឹង អាស្រ័យលើភ្ញៀវដែលចូលរួមជាអ្នកធូរធារ កម្រិតមធ្យម ឬកម្រិតទាប។

៣. ម្ហូបដែលត្រូវទទួលភ្ញៀវ

ម្ហូបសម្រាប់ទទួលភ្ញៀវមិនត្រូវធ្វើលោភពេកនោះទេ គឺធ្វើមួយសមរម្យ និងគ្រប់គ្រាន់ មិនគួរធ្វើបបូរហូរហៀរសល់ចាក់ចោលឡើយ។ មួយវិញទៀតម្ហូបក៏ត្រូវលៃឱ្យសមរម្យទៅតាមកម្រិតភ្ញៀវដែលអញ្ជើញចូលរួម បើភ្ញៀវធម្មតាត្រូវធ្វើល្មមៗបានហើយ។ ហើយកុំភ្លេចសួរចុងភៅ មានបន្ថែមនំខេកឱ្យទេ ព្រោះចុងភៅខ្លះមានថែមនំខេក។

៤. យកសំអាងការណាដែលមានសេវាកម្មជាកញ្ចប់

ការជ្រើសរើសសំអាងការក្នុងពិធីមង្គលការក៏ជារឿងមិនគួរមើលរំលងដែរ ម្ចាស់ការគួររកសំអាងការណាដែលមានសេវាកម្មជាកញ្ចប់ ក្នុងនោះរួមមាន អាចារ្យ ភ្លេងបុរាណសម័យ អ្នកកាត់សក់ មួយកំប្លេតែម្ដង។ ប្រសិនបើរកសេវាកម្មផ្សេងៗពីគ្នានឹងធ្វើឱ្យការចំណាយកាន់តែច្រើន ថ្លៃបណ្ណាការយកមកប្រើប្រាស់សឹងមិនគ្រប់។

៥. ធៀបការកុំលេងម៉ូតខ្លាំងពេក

អ្នកខ្លះតែង ចំណាយទៅលើការធ្វើធៀបការអស់ច្រើន តាមពិតទៅធៀបការយកតម្លៃល្មមៗបានហើយ។ ព្រោះការចូលរួម ឬមិនមកចូលរួមមិនមែនអាស្រ័យលើធៀបស្អាតមិនស្អាតនោះទេ គឺអាស្រ័យលើមិត្តភាព។ ដូច្នេះធៀបការមិនគួរចំណាយច្រើនពេកទេ គួរទុកលុយសម្រាប់ប្រើការលើអ្វីផ្សេងដែលចាំបាច់ជាងនេះ។

៦. ការតុបតែងរោងការ

ប្រសិនបើមិនចង់រៀបការហើយគ្មានសល់លុយក្នុងដៃទេ មិនគួរចំណាយលុយលើការរៀបចំតុបតែង មុខរោងក្ដី ក្នុងរោងក្ដី អស់ច្រើនពេកទេ។ ការរៀបចំតុបតែងលម្អគឺជារឿងសំខាន់នាំមកនូវសិរីសួស្ដី ប៉ុន្តែរៀបចំឱ្យតែសមរម្យមានរបៀបរៀបរយ ការចេះកែច្នៃ ដោយខ្លួនឯងបន្ថែមទៀតកាន់តែល្អ ហើយក៏ចូលរួមក្នុងការកាត់បន្ថយការចំណាយច្រើនមួយកម្រិតដែរ។

៧. ការគ្រប់គ្រងភេសជ្ជៈ និងគ្រឿងស្រវឹងឱ្យបានល្អ

ភេសជ្ជៈ និងគ្រឿងស្រវឹងជាចំណែកមួយធ្វើឱ្យមង្គលការមានភាពអធឹក អធម ប៉ុន្តែមិនត្រូវលោភពេកដែរ ដូចជាគ្រឿងស្រវឹងប្រសិនបើអាចកាត់បន្ថយបានកាត់បន្ថយខ្លះទៅ កុំដាក់អោយភ្ញៀវពិសាច្រើនពេក។ ដូចជាស្រាថ្លៃៗគួរដាក់មួយតុមួយដបបានហើយ ព្រោះមានភ្ញៀវខ្លះឆ្លៀតវេចទៅផ្ទះទៀត ចំណែកទឹកក្រូច ទឹកសុទ្ធ ដាក់អោយគ្រប់គ្រាន់បានហើយ មិនចាំបាច់ដាក់រហូតគាស់ចោល មិនផឹកនោះឡើយ។ ដូច្នេះត្រូវគ្រប់គ្រងឱ្យបានត្រឹមត្រូវទើបមិនធ្វើឱ្យមានការខាតបង់។

អត្ថបទ៖ ថោ ច័ន្ទឬទ្ធិ