Angelina Jolie បង្ហាញមហិច្ឆតា ចង់ប្រឡូកក្នុងនយោបាយ

2014-11-06 16:03:21
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពូលតារាសម្ដែងអាមេរិក Angelina Jolie ដែលគេស្គាល់ថាជាតារាម្នាក់ដែលសកម្មខ្លាំងក្នុងការងារមនុស្សធម៌ បាននិយាយដោយបើកចំហថា នាងមានបំណងមួយទៅថ្ងៃមុខ គឺចង់ក្លាយជាអ្នកនយោបាយ។

តារាស្រីវ័យ ៣៩ឆ្នាំរូបនេះបានលេចមុខលើទស្សនាវដ្ដី Vanity Fair ចេញផ្សាយខែធ្នូ និងបាននិយាយក្នុងបទសម្ភាសន៍ជាមួយទស្សនាវដ្ដីនេះថា នាងជឿថាកេរ្តិ៍ឈ្មោះជាតារាហូលីវូដ នឹងអាចជាផ្លូវមួយជួយឲ្យនាងអាចទទួលបានសំឡេងឆ្នោត ឬក៏ការតែងតាំងក្នុងការិយាល័យណាមួយ"។

Jolie បាននិយាយថា "នៅពេលអ្នកធ្វើការងារមនុស្សធម៌ អ្នកនឹងមានអារម្មណ៍ថា ការងារនយោបាយគឺជាការងារមួយដែលអ្នកត្រូវពិចារណា។ ព្រោះថាប្រសិនបើអ្នកចង់ឲ្យមានការផ្លាស់ប្ដូរធំមួយ អ្នកត្រូវតែមានតំណែងអ្វីមួយ"។ ទោះយ៉ាងណា តួឯកស្រីក្នុងរឿង "Maleficent” រូបនេះ មិនទាន់ប្រាកដនៅឡើយទេ ថានាងគួរតែកាន់តំណែងអ្វីដើម្បីឲ្យខ្លួនឯងកាន់តែមានប្រយោជន៍សម្រាប់សង្គមជាតិ។

ក្រៅពីភាពជោគជ័យក្នុងអាជីពសម្ដែង Angelina គឺជាបុគ្គលដ៏សកម្មម្នាក់ក្នុងការងារមនុស្សធម៌ និងត្រូវបានតែងតាំងជាឯកអគ្គរដ្ឋទូតសុឆន្ទៈម្នាក់របស់អង្គការសហប្រជាជាតិ។

បច្ចុប្បន្ន តារាសម្ដែងរូបនេះកំពុងមមាញឹកក្នុងការងារដឹកនាំរឿង និងសម្ដែងដោយខ្លួនឯង ក្នុងរឿងថ្មីមួយមានចំណងជើងថា "By the Sea” ដោយមានស្វាមីរបស់នាង Brad Pitt សម្ដែងជាតួឯកប្រុស ៕