ជិត​១២​ខែ​មក​នេះ តារា​ចម្រៀង​ល្បី Justin Bieber បាន​បង្កើត​សកម្មភាព​ជា​ច្រើន​ក្នុង​រង្វង់​សិល្បៈ និង​ធ្វើ​ឲ្យ​អ្នក​គាំទ្រ​ជុំវិញ​ពិភពលោក​ចាប់​អារម្មណ៍។ ក្នុង​នោះ​មាន​ទាំង​ស្នេហា រឿង​អាស្រូវ ភាព​អស់​សំណើច​ជា​ដើម។ ចង់​ដឹង Justin ធ្លាប់​បាន​ធ្វើ​អ្វី​ខ្លះ​ក្នុង​ឆ្នាំ​នេះ សូម​តាមដាន​រឿងរ៉ាវ​​ទាំង​១០​ខាង​ក្រោម៖

​១.Justin ត្រូវ​ពិធី​ការិនី​​វ័យ​៤០​ឆ្នាំ​ចោទ​​​ថា​ធ្លាប់​ញ៉ែ​គេ​​និង​ជា​តារា​​អាក្រក់​បំផុត

ពិធី​ការិនី​និង​តារា​កំប្លែង​អាមេរិក Chelsea Handler ធ្លាប់​បាន​និយាយ​កាល​​ថា តារា​ចម្រៀង​សម្បូរ​រឿង​អាស្រូវ Justin Bieber ​គឺ​ជា​តារា​ល្បី​​មាន​ចរិត​​​អាក្រក់​បំផុត​​ ដែល​នាង​ធ្លាប់​ជួប​ធ្វើសម្ភាសន៍ ព្រោះ​គេ​បាន​ព្យាយាម​ចែចង់​​​នាង។

២ Justin Bieber ថត​ស្រាត​លើ​ក្រប​មុខ​​ទស្សនាវដ្ដី​អង់គ្លេស

តារា​ចម្រៀង​​​កាណាដា​វ័យ​២១ Justin Bieber បាន​បង្ហាញ​មុខ​លើ​ក្រប​មុខ​ទស្សនាវដ្ដី Clash ដែល​ជា​លេខ​ទី​១០០ ដោយ​ថត​​​​ពាក់​មួក​គ្មាន​សំលៀកបំពាក់​ទាំង​អស់​បញ្ចេញ​រូប​សាក់​នៅ​ដៃ​ខាង​ឆ្វេង។

៣.Justin Bieber ​ច្រៀង​ៗ​រអិល​ដួល​ដាច់​ផ្ងារ​លើ​ឆាក ខ្មាស​គេ​មិន​ស្ទើរ​

រឿង​ទី​៣ តារា​ចម្រៀងJustin Bieber បាន​ជួប​រឿង​អាម៉ាស់​យ៉ាង​ខ្លាំង​ ដោយ​​បាន​រអិល​ដួល​ផ្ងារ​ក្រោយ​អំឡុង​ពេល​​​សម្ដែង​ក្នុង​ការ​ប្រគំតន្ត្រី​កាល​ពី​​ខែ​មេសា។ យ៉ាងណា​គេ​មិន​មាន​របួស​ធ្ងន់ធ្ងរ​អ្វី​ទេ។

៤.Justin Bieber ឈូស​សក់​ ចូល​រួម​ពិធី​ភ្ជាប់​ពាក្យ​ឪពុក ទាំង​ទឹក​មុខ​ស្ងួត​ចែស​

ក្នុង​ខែ​ឧសភា តារា​ចម្រៀង​កាណាដា​រូប​នេះ​បាន​បង្ហាញ​វត្តមាន​ក្នុង​ពិធី​ភ្ជាប់​ពាក្យ​របស់​ឪពុក​​ទីក្រុង Toronto ប្រទេស​កាណាដា ក្រោយ​ពេល​បាន​កាត់​សក់​វែង​របស់​ខ្លួន​ចោល។ Jeremy ឪពុក​របស់ Justin បាន​ភ្ជាប់​ពាក្យ​ជាមួយ​គូ​ស្នេហ៍​ថ្មី​វ័យ ២៨ឆ្នាំ​ នាង Chelsea Rebelo។

៥.Justin Bieber បើក​ឆាក​ប្រយុទ្ធ​​ជាមួយ​បុរស​មាឌ​ធំ​ម្នាក់ ដោយ​សារ​រឿង​ថតរូប

ឈាន​ដល់​រឿង​ទី​៤​ចូល​ដល់​ការ​ប្រើ​អំពើហិង្សា​វិញ​ម្ដង តារា​ចម្រៀង​​អតីត​មិត្ត​ប្រុស Selena Gomez បាន​វាយតប់​គ្នា​នៅ​តាម​ផ្លូវ​ជាមួយ​បុរស​ម្នាក់​ដែល​​​មាឌ​ធំ​ជាង​គេ​ដាច់ កាល​ពី​យប់​ថ្ងៃ​ពុធ ខែ មិថុនា​ ក្នុង​ទីក្រុង Cleveland រដ្ឋ Ohio សហរដ្ឋអាមេរិក។

៦.Justin Bieber ច្រៀង​សុខៗ ដើរ​ធ្លាក់​ឆាក​ប្រគំតន្ត្រី​នៅ​កាណាដា

ជា​ហេតុការណ៍​អស់​សំណើច​មួយ តារា​ចម្រៀង​ Pop ដែល​គេ​ហៅ​ឈ្មោះ​កាត់ JBបាន​ដើរ​ធ្លាក់​ពី​លើ​ឆាក​ប្រគំ​តន្ត្រី​មួយ ខណៈ​ដែល​តារា​វ័យ​២២​ឆ្នាំ​រូប​នេះ កំពុង​ចម្រៀង​នៅ SaskTel Center ប្រទេស​កាណាដា ដោយ​សារ​តែ​ឆាក​ទាំង​មូល​ងងឹត​ពេក។​

៧.Justin Bieber ចាប់​ដៃ Jaden​ រំឭក​បទ​ចាស់ "Never Say Never" កក្រើក​ឆាក

Justin Bieber បាន​រៀបចំ​ការ​​ប្រគំតន្ត្រី​ទេសចរណ៍​​ Purpose ជា​ថ្មី​ម្ដង​ទៀត​នៅ​អាមេរិក​ខាងជើង​កាល​ពី​យប់​ថ្ងៃ​ទី​១៩ ខែ កក្កដា​នៅ​សង្វៀន Madison Square Garden ដោយ​បាន​អញ្ជើញ​មិត្ត​ចាស់ Jaden Smith ជា​ភ្ញៀវកិត្តិយស។ ដើម្បី​រំឭក​ដល់​អនុស្សាវរីយ៍​ចាស់​ជា​ច្រើន​ឆ្នាំ​​ដែល​តារា​ទាំង​ពីរ​ធ្លាប់​ច្រៀង​ជាមួយ​ក្នុង​បទ "Never Say Never" សម្រាប់​រឿង "The Karate Kid” កាល​នោះ Jaden ជា​តួ​ឯក លើក​ឆាក​ប្រគំតន្ត្រី​ក្នុង​ទីក្រុង​ញីវយ៉ក ពួក​គេ​បាន​ច្រៀង​បទ​នេះ​ម្ដង​ជាមួយ​គ្នា​ធ្វើ​ឲ្យ​កម្មវិធី​រញ្ជួយ​តែម្ដង។

៨.Justin Bieber លុប​គណនី Instagram ចោល​ ក្រោយ​សង្គ្រាម​ជាមួយ Selena

ក្រោយ​ពី​ផ្ទុះ​សង្គ្រាម​ Comment ​​ជាមួយ​អតីត​មិត្ត​ស្រី Selena Gomez និង​​​អ្នក​គាំទ្រ​លើ​បណ្ដាញ​សង្គម Instagram ​ចំពោះ​មិត្ត​ស្រី​ថ្មី Sofia Richie  តារា​ចម្រៀង​ Justin Bieber បាន​លុប​គណនី​បណ្ដាញ​មួយ​នេះ​ចោល​ រហូត​ដល់​សព្វ​ថ្ងៃ។

៩.Justin Bieber និងSofia ចែក​ផ្លូវ​គ្នា​ បន្ទាប់​ពី​ផ្អែមល្ហែម​៦​សប្ដាហ៍

តារា​ចម្រៀងJustin Bieberនិង​តារា​ម៉ូដែលSofia Richie ត្រូវ​បាន​​គេ​រាយការណ៍​ថា​បែក​គ្នា​​ ក្រោយ​ទាក់ទង​គ្នា​បាន​ត្រឹម​ជាង​១​ខែ។ ពេលស្ថិត​ក្នុង​ស្នេហា​ក្ដៅ​គគុក​​តារា​ទាំង​ពីរ​ធ្លាប់​បាន​បែកធ្លាយ​រូប​ឱប​ថើប​កណ្ដាល​វាល​ជា​ច្រើន។

១០. Justin Bieber ម៉ាត់​អ្នក​គាំទ្រ​​ម្នាក់​បែក​មាត់​ហូរ​ឈាម

ម្ចាស់​បទ "Sorry" បាន​​​ធ្វើ​ឲ្យ​អ្នក​គាំទ្រ​ប្រុស​ម្នាក់​ហូរ​ឈាម​តាម​បបូរ​មាត់ បន្ទាប់​ពី​គេ​បាន​ប្រើ​កណ្ដាប់​ដៃ​វាយ​លើ​អ្នក​គាំទ្រ​ម្នាក់​នោះ កំឡុង​ពេល​ទៅ​ធ្វើ​ការ​ប្រគំតន្ត្រី​នៅ​ទីក្រុង Barcelona ប្រទេស​អេស្ប៉ាញ៕​

អត្ថបទ៖ ហេង សុធារិទ្ធិ