យុវតី ១០០ នាក់ប្តេជ្ញាសម្រេចគោលដៅការប្រជែង Technovation ២០១៧

2017-01-10 05:28:14
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតីជិត ១០០ នាក់បានចូលរួមស្តាប់ការធ្វើបទបង្ហាញពីកម្មវិធី Technovation 2017 ដែលបានរៀបចំកាលពីចុងសប្ដាហ៍មុននេះនៅអាគារ Development Innovations។ អ្នកចូលរួមជាសិស្សកំពុងសិក្សានៅថ្នាក់វិទ្យាល័យស្ថិតនៅវ័យអាយុចន្លោះពី ១០ ទៅ ១៨ ឆ្នាំ ដែលភាគច្រើនមិនសូវមានបទពិសោធន៍និងចំណេះដឹងពីបច្ចេកវិទ្យា។

អ្នកនាង ហ៊ាង អូមួយ ឯកអគ្គរដ្ឋទូត Technovation កម្ពុជា ២០១៧ បានឲ្យដឹងថា Technovation ជាកម្មវិធីប្រកួតប្រជែងបច្ចេកវិទ្យាអន្តរជាតិសម្រាប់ក្មេងស្រីទូទាំងសាកលលោក ដែលបង្កើតឡើងក្នុងគោលដៅជំរុញយុវតីវ័យក្មេងៗងាកមកចាប់អារម្មណ៍លើវិស័យបច្ចេកវិទ្យា ដើម្បីចូលរួមដោះស្រាយបញ្ហានៅក្នុងសង្គម។

អ្នកនាងថា អ្នកចូលរួមនឹងទទួលបានការបណ្ដុះបណ្ដាលរយៈពេល ១២ សប្ដាហ៍ លើការរៀនជំនាញសរសេរកម្មវិធីកុំព្យូទ័រថ្នាក់មូលដ្ឋាន និងការអភិវឌ្ឍគម្រោងធុរកិច្ច ដើម្បីមានសមត្ថភាពគ្រប់គ្រាន់អាចចូលរួមប្រកួតប្រជែងក្នុងកម្មវិធីនេះ។

"អ្វីពួកគេត្រូវធ្វើគឺការប្តេជ្ញាចិត្ត និងការជឿជាក់លើសមត្ថភាពខ្លួនឯងកុំបោះបង់ក្តីសុបិន្តដើម្បីអាចឈានទៅសម្រេចគោលដៅចុងក្រោយ"។ អ្នកនាងបន្ថែម។

កញ្ញាកែវ មុយលៀង មកពីសាលា AIS បង្ហាញចំណាប់អារម្មណ៍សម្រាប់ការចូលរួមប្រកួតប្រជែងក្នុងកម្មវិធីនេះ។ យុវតីរូបនេះគ្រោងបង្កើតកម្មវិធីដែលផ្តោតលើផ្នែកវេជ្ជសាស្រ្តដោយសារមើលឃើញពលរដ្ឋខ្មែរជាច្រើនមានបញ្ហាផ្នែកសុខភាពនិងខ្វះខាតព័ត៌មាន ដេីម្បីងាយស្រួលអាចស្វែងរកសេវាព្យាបាលប្រកបដោយប្រសិទ្ធភាព។

Technovation 2017 ជាកម្មវិធីប្រកួតប្រជែងផ្នែកបច្ចេកវិទ្យា និងផែនការធុរកិច្ចអន្តរជាតិសម្រាប់ក្មេងស្រីដែលមានអាយុពី ១០ ទៅ ១៨ ឆ្នាំ ទូទាំងសកលលោក។ ការប្រកួតប្រជែងតាមរយៈការអភិវឌ្ឍកម្មវិធីលើទូរសព្ទដែលអាចជួយដោះស្រាយបញ្ហាកើតឡើងនៅក្នុងសហគមន៍។ ក្រុមដែលឈ្នះដល់វគ្គផ្ដាច់ព្រ័ត្រ ១០ ក្រុមពីជុំវិញពិភពលោកនឹងត្រូវអញ្ជើញទៅធ្វើបទបង្ហាញនៅទីក្រុង សាន់ហ្វ្រាន់ស៊ីស្កូល សហរដ្ឋអាមេរិកក្នុងខែកក្កដា ក្នុងនោះ ២ ក្រុមចុងក្រោយដែលឈ្នះ នឹងទទួលបានប្រាក់រង្វាន់ ១០ ០០០ ដុល្លារអាមេរិក។

Technovation កម្ពុជា ត្រូវបានគាំទ្រដោយក្រសួងអប់រំ យុវជន និងកីឡា Development Innovations ក្រុមហ៊ុន Digital Mobile Innovations ក្រុមហ៊ុន Smart Axiata និងក្រុមហ៊ុន Sabay។