ហេតុផល៥យ៉ាង ដែលធ្វើឲ្យ Barca អាចវ៉ាដាច់ Real លើកពាន La Liga រដូវកាលនេះ
- 2017-01-17 23:21:00
- ចំនួនមតិ 0 | ចំនួនចែករំលែក 0
ហេតុផល៥យ៉ាង ដែលធ្វើឲ្យ Barca អាចវ៉ាដាច់ Real លើកពាន La Liga រដូវកាលនេះ
ចន្លោះមិនឃើញ
ក្រុមការពារតំណែងជើងឯកអេស្ប៉ាញ FC Barcelona ស្ថិតនៅលេខ៣ ក្នុងតារាង La Liga បច្ចុប្បន្ន មាន៣៨ពិន្ទុ ដោយចាញ់ក្រុមលេខ២ Sevilla ១ពិន្ទុ និងចាញ់ក្រុមកំពូលតារាង Real Madrid ដែលសល់មួយប្រកួតក្នុងដៃ ចំនួន២ពិន្ទុ។ បន្ទាប់ពី Real ភ្លាត់ចាញ់កាលចុងសប្តាហ៍កន្លងទៅ បានធ្វើឲ្យលីគកំពូលអេស្ប៉ាញ ប្រជែងគ្នាដណ្ដើមពានកាន់តែស្វិតស្វាញជាមុន។
ESPN FC បានបង្ហាញជូនមូលហេតុ៥យ៉ាង ដែលអាចធ្វើឲ្យក្រុមអ្នកមានបុណ្យ វ៉ាដាច់ Sevilla និង Real Madrid លើកពាន La Liga រដូវកាលនេះបាន។ ចង់ដឹងមានអ្វីខ្លះ សូមមើលខាងក្រោម៖
១. ក្រុមកីឡាករខ្លាំងស្រុះគ្នា
បន្ទាប់ពីមានបញ្ហាកីឡាករលេងមិនសូវត្រូវគ្នាមួយរយៈ ពេលនេះ Barcelona ហាក់ល្អជាងមុនឆ្ងាយ។ ជាក់ស្ដែងអ្នកចាត់ការ Luis Enrique បានឲ្យ Neymar, Andres Iniesta, Gerard Pique និង Sergi Roberto សម្រាកកាលប៉ះ Las Palmas ថ្ងៃសៅរ៍ ប៉ុន្តែ Barca នៅតែអាចឈ្នះ ៥-០។ Luis Suarez និង Sergio Busquets ត្រឡប់ទៅទម្រង់ល្អបំផុតវិញ ខណៈដែល Andre Gomes, Rafinha និង Arda Turan ក៏ប្រសើរជាងមុន។ ដូច្នេះមានន័យថា លោក Enrique អាចចល័តកីឡាករឲ្យចូលលេងបានច្រើន ព្រោះពួកគេមានសមត្ថភាព មិនចាញ់គ្នាប៉ុន្មានទេ។
២. អ្នកចាត់ការ Enrique រកឃើញយុទ្ធសាស្ត្រដ៏ត្រឹមត្រូវ
អ្នកចាត់ការ Enrique បានចំណាយពេលជាច្រើនមកហើយ ដើម្បីស្វែងយល់ពីកីឡាករ និងទម្រង់លេងរបស់ក្រុម។ ការហ្វឹកហាត់យ៉ាងម៉ត់ចត់ធ្វើនៅទីលានហ្វឹកហាត់ Joan Gamper មុនដល់ពេលអនុវត្តជាក់ស្ដែងលើទីលានប្រកួត។ "ខ្ញុំសប្បាយចិត្តណាស់ នូវអ្វីដែលខ្ញុំបានឃើញក្នុងទីលានហ្វឹកហាត់ ហើយឥឡូវខ្ញុំសប្បាយចិត្ត ពេលឃើញពួកយើងធ្វើល្អក្នុងការប្រកួត”។ អ្នកចាត់ការសញ្ជាតិអេស្ប៉ាញ និយាយក្រោយឈ្នះ Las Palmas។
៣. Barca ធ្លាប់មានបទពិសោធន៍តាមពីក្រោយ Real បានលើកពាន កាល២ឆ្នាំមុន
រដូវកាលដំបូងរបស់ Luis Enrique ក្រុមអ្នកមានបុណ្យ បានចាញ់ពិន្ទុ Real Madrid ៤ពិន្ទុ ដែលកាលនោះ ក្រុមស្តេចសដឹកនាំដោយលោក Carlo Ancelotti និងឈ្នះ២២ប្រកួតជាប់ៗគ្នា។ ប៉ុន្តែទីបំផុត Barca អាចតាមទាន់ រហូតអាចលើកពានរដូវកាល២០១៤-២០១៥ បាន។ រីឯប្រកួតក្រៅដីពិបាកៗដូចជាប៉ះ Valencia, Celta Vigo, Sevilla, Real Sociedad និង Athletic Bilbao រដូវកាលនេះចប់រួចរាល់អស់ហើយ ដូច្នេះប្រកួតខាងមុខៗនេះ មិនមែនជាការពិបាកប៉ុន្មានទេ សម្រាប់ក្រុមអ្នកមានបុណ្យ។
៤. Lionel Messi កំពុងបង្ហាញទម្រង់លេងយ៉ាងអស្ចារ្យ
មានកីឡាករ Super Star ដូចជា Lionel Messi ក្នុងក្រុម Barcelona នោះពួកគេនៅតែមានក្តីសង្ឃឹមលើកពានខ្ពស់។ Messi បានស៊ុតបញ្ចូលទី៧ប្រកួតជាប់ៗគ្នា ក្នុង៧ប្រកួតចុងក្រោយនេះ។ ជាពិសេសគឺ ស៊ុតបាល់ហ្វ្រីឃីកយ៉ាងសាហាវ ចូលទីនៅ៣ប្រកួតចុងក្រោយជាប់ៗគ្នា។ Messi ជាបេះដូងរបស់ Barca ដែលត្រូវការលើកពានរដូវកាលនេះ។ ក្រៅពីស៊ុតបញ្ចូលទី ម្ចាស់ពាន Ballon d'Or ៥សម័យកាល ក៏ជាអ្នកពូកែចែកបាល់នាំលេង និងជួយ Assists ច្រើនផងដែរ។
៥. Barca មានក្បួនជាអ្នកឈ្នះ ហើយកីឡាករមានជំនឿចិត្តខ្ពស់
ទោះបីកន្លងមក ប្រកួតខ្លះមិនបានល្អដូចជាស្មើ Real Sociedad ១-១, ចាញ់ Celta Vigo ៤-៣, ស្មើ Malaga ០-០ និងស្មើ Villarreal ១-១ ប៉ុន្តែសម្រាប់អ្នកចាត់ការ Enrique នៅតែជឿជាក់លើសមត្ថភាពក្រុមរបស់លោកខ្លាំង។ "អារម្មណ៍របស់យើង ប្រសើរជាងមុនហើយឥឡូវនេះ និងល្អជាងចុងឆ្នាំ២០១៦។ យើងត្រូវបំភ្លេចរឿងមិនល្អចេញ”។ លោក Enrique និយាយក្រោយស្មើ Villarreal។ រីឯកីឡាករ Barca វិញ ពួកគេធ្លាប់ឈ្នះពានច្រើន រយៈពេលប៉ុន្មានឆ្នាំចុងក្រោយ ដូច្នេះពួកគេមានជំនឿចិត្តខ្លាំងណាស់ ក្នុងការប្រកួតនីមួយៗ។
យ៉ាងណាក្ដី ខាងលើនេះគ្រាន់តែជាការវិភាគរបស់ ESPN ប៉ុណ្ណោះ សម្រាប់លទ្ធផលជាក់ស្តែងយើងនឹងឃើញទាំងអស់គ្នាថាក្រុមណានឹងលើកពាន La Liga រដូវកាលនេះ ខណៈដែលការប្រកួតនៅសល់២០ប្រកួតទៀត ទើបចប់រដូវកាល៕