ជម្លៀសមនុស្សរាប់ម៉ឺននាក់នៅអាមេរិក ព្រោះទំនប់ទឹកខ្ពស់បំផុតអាចបាក់ស្រុតគ្រប់ពេល

2017-02-13 06:56:26
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សយ៉ាងហោចណាស់ ១៣០ ០០០នាក់ នៅភាគខាងជើង នៃរដ្ឋ California ត្រូវបានប្រាប់ឲ្យជម្លៀសខ្លួនចេញពីផ្ទះសម្បែងរបស់ពួកគេ បន្ទាប់ពីទំនប់ទឹកខ្ពស់បំផុត នៅសហរដ្ឋអាមេរិក បានចុះខ្សោយដោយសារតែភ្លៀងធ្លាក់ខ្លាំងពេក។

ក្រុមមន្ត្រីអាមេរិកបានឲ្យដឹងថា ទំនប់ទឹកកម្ពស់ ២៣០ម៉ែត្រ មានឈ្មោះថា Oroville Dam នេះ អាចនឹងបាក់ស្រុតចុះមកគ្រប់ពេល ខណៈប្រជាជនដែលកំពុងរស់នៅ ក្នុងតំបន់ប្រឈមនឹងហានិភ័យទឹកជំនន់ ត្រូវបានបញ្ជាឲ្យចាកចេញជាបន្ទាន់។ ជាមួយគ្នានេះដែរ កម្រិតទឹកនៅក្នុងអាងស្តុកទឹកខាងលើ បានកើនឡើងដោយសារតែភ្លៀង និងព្រិលធ្លាក់ខ្លាំង នៅក្នុងរដ្ឋ California បន្ទាប់ពីមានភាពរាំងស្ងួតធ្ងន់ធ្ងរ កាលពីឆ្នាំមុខ។

គួរបញ្ជាក់ថា វាគឺជាលើកទីមួយហើយ ដែលអាងស្តុកទឹកនៃបឹង Lake Oroville ជួបប្រទះរឿងរ៉ាវបន្ទាន់បែបនេះ នៅក្នុងប្រវត្តិសាស្ត្ររយៈពេល ជិត៥០ឆ្នាំមកនេះ។

មន្ទីរធនធានទឹក California Department of Water Resources បានប្រាប់ឲ្យដឹង កាលពីថ្ងៃអាទិត្យម្សិលមិញនេះថា វាត្រូវបានគេបង្ហូរទឹកប្រមាណជា ២ ៨៣០ម៉ែត្រគីប ពីទំនប់បង្ហៀរទឹកសំខាន់ ដើម្បីព្យាយាមបង្ហូរវាឲ្យអស់ចេញពីបឹងខាងលើ។ មន្ទីរដដែលនេះបានបន្ថែមទៀតថា កម្រិតទឹកបានថយចុះខ្លះហើយ ខណៈលំហូរលើទំនប់បង្ហៀរទឹកបន្ទាន់ ក៏បានកាត់បន្ថយចុះខ្លះផងដែរ៕