មិនធ្លាប់មាន Sabay Osja បង្កើតកម្មវិធីប្រើបច្ចេកវិទ្យាអស្ចារ្យដំបូងលើទូរសព្ទ

2017-02-16 03:05:15
ចំនួនមតិ 0 | ចំនួនចែករំលែក 0

ចន្លោះមិនឃើញ

Sabay Osja បានបង្កើតកម្មវិធីទូរសព្ទប្លែកដំបូងគេក្នុងប្រទេសកម្ពុជា ឈ្មោះ Osja AR ដើម្បីលើកតម្កើងវប្បធម៌និងប្រាក់រៀលខ្មែរ។

បច្ចេកវិទ្យាលើកម្មវិធី Osja AR

លោក អៀ អ៊ុយ ស្ថាបនិកក្រុមហ៊ុន Sabay Osja ឲ្យដឹងនៅព្រឹកនេះថា កម្មវិធី Osja AR ដែលខាងលោកទើបប្រកាសនេះ ប្រើរយៈពេលប្រមាណ ២ ខែក្នុងការផលិត។ បច្ចេកវិទ្យា AR (Augmented Reality) លើកម្មវិធីនេះ ស្រដៀងគ្នានឹងបច្ចេកវិទ្យាហ្គេម Pokemon Go ដែលល្បីពេញពិភពលោក កាលពីចុងឆ្នាំ ២០១៦។

Osja AR ប្រើប្រាស់កាមេរ៉ាទូរសព្ទ ថតរូបលុយ ហើយបញ្ចូលតួអង្គបែប Animation មានចលនាថែមពីលើ ដែលមើលទៅកាន់តែទាក់ទាញនិងអស្ចារ្យ។

តួអង្គ Animation យក្ស (ឆ្វេង) លើ Osja AR

បច្ចុប្បន្នកម្មវិធីនេះ អាចដំណើរការបានលើលុយរៀលខ្មែរ មានក្រដាស ១០០ រៀល, ៥០០ រៀល, ១ ០០០ រៀល, ២ ០០០ រៀល, ៥ ០០០ រៀល និង ១០ ០០០ រៀល។

សម្រាប់ក្រដាស ១០០ រៀលនឹងបង្ហាញតួអង្គ បុរាណកំពុងស្ទូចត្រី។
ក្រដាស ៥០០ និង ១ ០០០ រៀល បង្ហាញរូបក្ងោកញីឈ្មោលកំពុងរាំ។
ក្រដាស ២ ០០០ រៀល បង្ហាញរូបប្រាសាទព្រះវិហាររួមនឹងអក្សរនៅពីលើ។
ក្រដាស ៥ ០០០ និង ១០ ០០០ រៀល បង្ហាញរូបតួអង្គស្វានិងយក្ស។

លោក អៀ អ៊ុយ អះអាង AR បានដំណើរការនៅបរទេសប៉ុន្មានឆ្នាំហើយ តែសម្រាប់ប្រទេសកម្ពុជា វាជាបច្ចេកវិទ្យាថ្មីដំបូងគេ ដែលបង្កើតដោយក្រុម Sabay Osja របស់លោក។

លោក ជឿថាកម្មវិធីនេះនឹងទទួលការគាំទ្រច្រើនពីអ្នកប្រើប្រាស់ ព្រោះវាជាបច្ចេកវិទ្យាថ្មីប្លែក ដែលបង្កើតដោយកូនខ្មែរ។ អនាគត ស្ថាបនិកហ្គេមល្បីឈ្មោះរូបនេះថា នឹងស្រាវជ្រាវថែមមុខងារថ្មីៗ លើកម្មវិធី Osja AR ដើម្បីឲ្យរឹតតែអស្ចារ្យ ហើយអ្នកប្រើប្រាស់កាន់តែរីករាយប្រើប្រាស់។

កម្មវិធី Osja AR ដាក់ឲ្យទាញយកផ្លូវការលើ Android ថ្ងៃនេះ ឯសម្រាប់ iOs អាចដោនឡូតបានឆាប់ៗនេះ។

មើលដំណើរការបច្ចេកវិទ្យា AR លើកម្មវិធីទូរសព្ទ Osja AR ទាំងអស់គ្នា៖

អត្ថបទ៖ ផាន់និត