មកដឹងចំណាត់ថ្នាក់ លោក អូបាម៉ា ក្នុងប្រវត្តិសាស្ត្រប្រធានាធិបតីល្អបំផុតរបស់អាមេរិក

2017-02-20 02:26:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមប្រវត្តិវិទូ បានបោះឆ្នោតឲ្យអតីតប្រធានាធិបតីអាមេរិក ទី៤៤ លោក បារ៉ាក់ អូបាម៉ា ជាប់ចំណាត់ថ្នាក់ លេខ១២ ជាប្រធានាធិបតីល្អបំផុត នៅក្នុងប្រវត្តិសាស្ត្រអាមេរិក។

បណ្ដាញទូរទស្សន៍ C-Span របស់អាមេរិក ដែលរៀបចំការបោះឆ្នោតនេះ បានធ្វើការស្ទង់មតិលើអតីតប្រធានាធិបតីអាមេរិក ជាច្រើនរូប ដែលមានការដឹកនាំល្អបំផុត នៅក្នុងការងារជាច្រើនប្រភេទ។ ក្នុងនោះដែរ លោក អូបាម៉ា បានបំពេញការងារយ៉ាងល្អ នៅក្នុងការគ្រប់គ្រងសេដ្ឋកិច្ច ដោយលោកបានជាប់ចំណាត់ថ្នាក់ លេខ៣ ក្នុងចំណោមប្រធានាធិបតីទាំងអស់។ ប៉ុន្តែ លោក អូបាម៉ា បានជាប់ចំណាត់ថ្នាក់ លេខ៣៩ សម្រាប់ទំនាក់ទំនងរបស់លោក ជាមួយសភា ហើយជាប់ចំណាត់ថ្នាក់ លេខ៣៤ សម្រាប់ទំនាក់ទំនងអន្តរជាតិ។

គួរបញ្ជាក់ថា អតីតប្រធានាធិបតី ទី៤៣ លោក George W Bush បានជាប់ចំណាត់ថ្នាក់ លេខ៣៣ ជាប្រធានាធិបតីល្អបំផុត នៅក្នុងប្រវត្តិសាស្ត្រអាមេរិក រីឯអតីតប្រធានាធិបតី ទី៤២ លោក Bill Clinton ជាប់ចំណាត់ថ្នាក់ លេខ១៥ ស្របពេលដែល អតីតប្រធានាធិបតី ទី១៦ លោក Abraham Lincoln ស្ថិតនៅកំពូលតារាង ហើយតាមពីក្រោយដោយ អតីតប្រធានាធិបតី ទី១ លោក George Washington និង អតីតប្រធានាធិបតី ទី៣២ លោក Franklin Roosevelt៕

ប្រភព៖ Independent ប្រែសម្រួល៖ សេង ឡុង