អ្នកស្វាយរៀងលែងពិបាកហើយ មិនចាំបាច់ទៅព្យាបាលជំងឺនៅវៀតណាមទៀតទេ

2017-02-23 04:04:08
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការឱ្យដឹងពីលោក កែរ រដ្ឋា ជាប្រធានមន្ទីរសុខាភិបាលខេត្តស្វាយរៀងបានប្រាប់ថា ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA បានចំណាយថវិកាប្រមាណជាង ៩លានដុល្លារ និងមានការចូលរួមពីថវិការដ្ឋាភិបាលប្រមាណជាង១០ម៉ឺនដុល្លារផងនោះ ឥឡូវនេះមន្ទីរពេទ្យបង្អែកខេត្តស្វាយរៀងមានអគារថ្មីដ៏ទំនើបមួយ ត្រៀមបម្រើសេវាព្យាបាលជំងឺជូនប្រជាពលរដ្ឋដើមខែ ឧសភានេះហើយ។

ប្រធានមន្ទីរសុខាភិបាលខេត្តស្វាយរៀងបានប្រាប់ថា អគារថ្មីនេះត្រូវបានបំពាក់បរិក្ខារពេទ្យទំនើបៗ និងបច្ចេកទេសសាងសង់អគារទាំងមូល គឺស្របទៅតាមស្តង់ដារប្រទេសជប៉ុន ជាពិសេសនោះ សូម្បីតែគ្រូពេទ្យក៏ត្រូវបានបណ្ដុះបណ្ដាលឱ្យប្រើបច្ចេកវិទ្យាទំនើបៗក្នុងមន្ទីរពេទ្យផងដែរ។ ដូច្នេះហើយ ប្រជាពលរដ្ឋក្នុងខេត្តស្វាយរៀងលែងពិបាកទៅព្យាបាលជំងឺនៅប្រទេសវៀតណាម ឬក៏ឡើងមករាជធានីភ្នំពេញទៀតហើយ។

លោកក៏បានឱ្យដឹងផងដែរថា អគារថ្មីដ៏ស្កឹមស្កៃនេះ មានបំពាក់ដោយបច្ចេកវិទ្យាទំនើបក្នុងការព្យាបាលជំងឺហើយមានច្រើនផ្នែកផ្សេងៗពីគ្នា ក្នុងនោះរួមមាន ផ្នែកទទួលព្យាបាលជំងឺទូទៅ បន្ទប់សង្គ្រោះបន្ទាន់ បន្ទប់ថតឆ្លុះ បន្ទប់វះកាត់ និងផ្នែកសម្ភពរោគស្ត្រី។ល។

លោកបញ្ជាក់ថា តាមគម្រោងនឹងត្រូវបញ្ចប់ការសាងសង់ដើមខែឧសភានេះ ហើយបើកបម្រើជូនប្រជាពលរដ្ឋតែម្ដង។

លោក កែរ រដ្ឋា ប្រធានមន្ទីរសុខាភិបាលខេត្តស្វាយរៀង

គួរបញ្ជាក់ផងដែរថា កន្លងទៅមន្ទីរពេទ្យបង្អែកខេត្តស្វាយរៀង ជួបផលវិបាកច្រើនណាស់ដូចជាខ្វះអគារ និងបរិក្ខារពេទ្យ ដើម្បីបម្រើសេវាព្យាបាលដល់ប្រជាជន ជាហេតុធ្វើឱ្យប្រជាពលរដ្ឋមួយចំនួនសម្រេចចិត្តទៅព្យាបាលនៅប្រទេសវៀតណាម ឬឡើងមកដល់រាជធានីភ្នំពេញ។ ដូច្នេះហើយទើបទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA បានធ្វើការចំណាយថវិការាប់លានដុល្លារដើម្បីសាងសង់អគារថ្មីនេះឡើង៕

អត្ថបទ៖ វឌ្ឍនៈ