គឹម ហ៊ាង៖ ប្ដីប្រពន្ធប្រាក់ខែត្រឹម៤០០ដុល្លារកុំបង់រំលស់ផ្ទះ ព្រោះទប់មិនរួចទេ

2017-02-24 03:12:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការទិញផ្ទះបង់រំលស់គឺជាជម្រើសរបស់ប្រជាពលរដ្ឋខ្មែរភាគច្រើន ជាពិសេសប្ដីប្រពន្ធទើបតែរៀបការរួចចង់មានលំនៅឋានផ្ទាល់ខ្លួនក៏ជ្រើសរើសរើសវិធីនេះដែរ។ ប៉ុន្តែប្រសិនបើពីរនាក់ប្ដីប្រពន្ធមានប្រាក់ខែត្រឹម ៤០០ដុល្លារតើគួរទិញផ្ទះបង់រំលស់ដែរឬទេ?

ក្នុងកិច្ចសម្ភាសដោយផ្ទាល់ជាមួយ Sabay លោក គឹម ហ៊ាង ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា បាននិយាយថា៖ "ខ្ញុំគិតថាពីរនាក់ប្ដីប្រពន្ធ មានប្រាក់ខែត្រឹម៤០០ដុល្លារចង់ទិញផ្ទះបង់រំលស់គឺមិនអាច។ ព្រោះការចំណាយក្នុងរាជធានីភ្នំពេញប្រចាំថ្ងៃគឺច្រើនណាស់ ដូច្នេះមិនអាចទប់ទល់ឈ្នះនោះទេ"។

លោកបានបន្តទៀតថា ប្រសិនបើពីរនាក់ប្ដីប្រពន្ធប្រាក់ខែត្រឹម ៤០០ដុល្លារ អ្វីដែលនាក់ទាំងពីរអាចធ្វើបាន ហើយល្អបំផុតនោះ គឺជួលបន្ទប់ស្នាក់នៅតម្លៃត្រឹម ៣០ ដុល្លារ ឬ៤០ដុល្លារស្នាក់នៅបានហើយ ដើម្បីទុកលុយជាង២០០ដុល្លារទៀតទិញដីឡូត៍បង់រំលស់វិញ។ លោកប្រាប់ថា ទាំងពីរនាក់ប្ដីប្រពន្ធត្រូវគ្រប់គ្រងចំណាយឱ្យបានល្អ គឺចំណាយច្រើនបំផុតក្នុង១ខែ ១៨០ដុល្លារបានហើយ។ ដូច្នេះនាក់ទាំងពីរ អាចសល់ជាង២០០ដុល្លារទិញដីឡូត៍ ព្រោះដីឡូត៍បច្ចុប្បន្នអាចទិញបង់រំលស់ក្នុង១ខែត្រឹម៨០ដុល្លារប៉ុណ្ណោះ។

ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា និងជាអ្នកជោគជ័យក្នុងមុខជំនួញផងនោះ បានលើកឡើងទៀតថា ត្រឹមរយៈពេល ៥ឆ្នាំ ឬ១០ឆ្នាំក្រោយពីរនាក់ប្ដីប្រពន្ធ អាចមានលទ្ធភាពទិញដីនោះបាន ហើយបើចង់ធ្វើផ្ទះនៅលើដីនោះក៏បានដែរ។ ដូចនេះហើយ បើចង់យកលុយ៤០០ទៅទិញផ្ទះបង់រំលស់គឺមិនអាច ពីព្រោះប្រាក់ខែ៤០០ដុល្លារមែន ប៉ុន្តែក៏ត្រូវចំណាយទៅលើ ការស្នាក់នៅ បាយទឹក ហើយក៏គ្មានបុរីណាមួយ រំលស់ក្រោម១០០ដុល្លារនោះទេ។ លោក គឹម ហ៊ាង ប្រាប់ថា ដីឡូត៍អាចរំលស់ ៨០ ៩០ ១០០ ដុល្លារក្នុង១ខែបាន។

លោកក៏បានបញ្ជាក់បន្ថែមផងដែរថា អ្វីដែលត្រូវប្រុងប្រយ័ត្នមុនទិញដីឡូត៍ គឺត្រូវសិក្សាឱ្យច្បាស់ថា ដីឡូត៍នោះមានច្បាប់ឬក៏អត់? តាមរយៈការសាកសួរមេភូមិ សង្កាត់ ខណ្ឌ និងការិយាល័យដែនដីតាមខណ្ឌទើបអាចបញ្ចៀសហានិភ័យផ្សេងៗបាន៕