អ្នកជំនាញ៖ សត្វពាក់កណ្ដាល អាចត្រូវវិនាសពីផែនដីចុងសតវត្សនេះ
- 2017-02-27 12:07:40
- ចំនួនមតិ 0 | ចំនួនចែករំលែក 0
អ្នកជំនាញ៖ សត្វពាក់កណ្ដាល អាចត្រូវវិនាសពីផែនដីចុងសតវត្សនេះ
ចន្លោះមិនឃើញ
ក្រុមអ្នកជំនាញ បានចេញសេចក្ដីព្រមានដ៏គួរឲ្យព្រួយបារម្ភមួយ ដោយបញ្ជាក់ថានៅដំណាច់សតវត្សទី២១ នេះ ចំនួនសត្វពាក់កណ្ដាលនៅលើពិភពលោក អាចត្រូវវិនាសហិនហោច ដោយសាររងការគំរាមកំហែងខ្លាំងនាពេលបច្ចុប្បន្ន។
ក្រុមអ្នកជីវវិទូធំៗនៅលើពិភពលោកនឹងចូលរួមសន្និសីទនៅបុរីវ៉ាទីកង់សប្ដាហ៍នេះ ដើម្បីពិភាក្សាបន្ទាន់ ក្នុងការរកដំណោះស្រាយអភិរក្សសត្វទាំងអស់នៅលើពិភពលោក។ តាមស្ថានភាពបច្ចុប្បន្ន ខ្លា និងរមាស កំពុងរងការគំរាមកំហែងខ្លាំងជាងគេ ដោយសារអ្នកប្រមាញ់យកផ្នែកមួយចំនួនទៅលក់ឲ្យប្រទេសចិនធ្វើថ្នាំ។
ជីវវិទូ Paul Ehrlich មកពីសាកលវិទ្យាល័យ Stanford University រដ្ឋ California សហរដ្ឋអាមេរិកបាននិយាយថា បណ្ដាប្រទេសលោកខាងលិច កំពុងបូមយកធនធានធម្មជាតិលើភពផែនដី និងបំផ្លាញប្រព័ន្ធបរិស្ថានក្នុងអត្រាដ៏ឆាប់រហ័សមួយ មិនធ្លាប់មានពីមុនមក។ បញ្ហាទាំងនេះ នឹងធ្វើឲ្យប៉ះពាល់ដល់ជីវិតសត្វទាំងអស់លើផែនដី។
បើតាមរបាយការណ៍ចុងក្រោយមួយ បានបង្ហាញថា ចំនួនសត្វរមាសខ្មៅនៅសល់ត្រឹម ៥០០០ក្បាលប៉ុណ្ណោះលើពិភពលោក។ សត្វនេះរងការគំរាមកំហែងខ្លាំងបំផុត ដោយសារកុយរបស់វាអាចលក់បានដល់ទៅជាង ៦ម៉ឺនដុល្លារឯណោះក្នុងមួយគីឡូក្រាម៕