Showroom ថ្មី Mercedes ទំនើបអស់លេខនៅខ្មែរ ហើយមានសេវាជួសជុលឡានបុកខ្លាំងឲ្យថ្មីដូចឡានចេញពីរោងចក្រ

2017-02-28 12:10:06
ចំនួនមតិ 0 | ចំនួនចែករំលែក 0

ចន្លោះមិនឃើញ

សង់អស់ជាង ៩ លានដុល្លារ ហើយទំនើបប្រើសុទ្ធតែថាមពលពន្លឺព្រះអាទិត្យ
ដាក់តាំងរថយន្តទំនើបស្អាតៗដល់ ១៦ ម៉ូដែល
រថយន្តតម្លៃចាប់ពីជាង ៩ ម៉ឺនដុល្លារ ដល់ជាង ៣០ ម៉ឺនដុល្លារ
សេវាជួសជុលរថយន្តដែលបុកខូចកំប៉ឹតឲ្យស្អាតភ្លឹងដូចថ្មីចេញពីរោងចក្រ

អគារ Showroom ថ្មីលំដាប់យក្សដាក់តាំងបង្ហាញរថយន្ត Mercedes-Benz ទំនើបៗរបស់អាល្លឺម៉ង់ ត្រូវបានសម្ពោធផ្លូវការកាលពីព្រឹកមិញនេះ ខណៈ Showroom ទំហំ ៥០០០ ម៉ែត្រការ៉េមួយនេះ ត្រូវបានអះអាងថាទំនើបបំផុត និងធំជាងគេនៅកម្ពុជា។

សង់អស់ជាង ៩ លានដុល្លារ អគារលេចធ្លោនៅកណ្ដាលទីក្រុងរណប ING City ឬផ្លូវ ៦០ ម៉ែត្រ ជាប់សាលាភ្នំពេញអន្តរជាតិ (ISPP) មួយនេះ មានដាក់តាំងរថយន្តទំនើបៗរបស់ Mercedes-Benz សរុប ១៦ ម៉ូដែលស៊េរីចុងក្រោយ។ ឯអគារទាំងមូលដំណើរការដោយថាមពលពន្លឺព្រះអាទិត្យ ដោយប្រើបន្ទះស្រូបថាមពលពន្លឺព្រះអាទិត្យធំៗដល់ទៅ ៣១៥ បន្ទះដែលអាចប្រើបានដល់ ២០ ទៅ ៣០ឆ្នាំ។

លោក ឃុន ចាន់ថា ប្រធានគ្រប់គ្រងផ្នែកលក់ និងទីផ្សាររបស់ Mercedes-Benz ប្រាប់ Sabay ក្នុងឱកាសសម្ពោធព្រឹកមិញថា៖ "យើងមានរថយន្ត Mercedes-Benz សរុប ១៦ ម៉ូដែលផ្សេងៗគ្នា ហើយ Showroom នេះអាចដាក់រថយន្តក្រោម ១០០ គ្រឿង។ តម្លៃរថយន្តមានចាប់ពីជាង ៩ ម៉ឺនដល់ជាង ៣០ ម៉ឺនដុល្លារ។ ហើយ Showroom នេះប្រើថាមពលពន្លឺព្រះអាទិត្យ ដែលអាចសន្សំសំចៃ ៣០% ថាមពលអគ្គិសនីសរុប"។

ក្រៅពីដាក់បង្អួតរាងរថយន្តស្អាតៗ Showroom មួយនេះ ក៏មានសេវាកម្មប្ដូរគ្រឿងបន្លាស់ និងជួសជុលទំនើបដំបូងគេនៅកម្ពុជា។ បុកខូចតិច ឬខ្លាំង ធ្វើម៉ាស្អាតត្រង់ភ្លឹងដូចចេញពីរោងចក្រហ្ស៊ីន។ សេវាកម្មជួលជុលនេះ គឺសម្រាប់រថយន្តគ្រប់ប្រភេទ មិនសំដៅតែ Mercedes-Benz ទេ។

"យើងមានឧបករណ៍ [ជួសជុល] ទំនើបដែលធ្វើឡានខូច [បុក] ខ្ទេចឲ្យក្លាយជាឡានថ្មីដូចចេញពីរោងចក្រវិញក៏បានដែរ។ […] ឡានខ្លះមានគ្រោះថ្នាក់ចរាចរណ៍កម្រិតធ្ងន់ ឬកម្រិតស្រាល...បើកម្រិតធ្ងន់វាធ្វើឲ្យវៀចតួរបស់ឡាន ហើយកន្លែងខ្លះក៏កំប៉ឹតខ្លាំងដែរ ចឹងយើងមានឧបករណ៍ម្យ៉ាងសម្រាប់តម្រែតម្រង់តួដែលវៀចកោងវិលទៅរកស្ថានភាពដើមវិញដូចចេញពីរោងចក្រចឹង ដោយយើងប្រើឧបករណ៍ គេហៅថា Frame Alignment ...ជាឧបករណ៍ទំនើបជាងគេដែលមានតែនៅ Star Auto ទេ"។ នាយកគ្រប់គ្រងផ្នែកលក់ និងទីផ្សារ រូបនេះអះអាង។

Mercedes-Benz ត្រូវបាននាំចូលផ្ដាច់មុខជាផ្លូវការដោយក្រុមហ៊ុន ស្ដារ អូតូ ខាមបូឌា (Star Auto Cambodia) តាំងពីចុងឆ្នាំ២០១៤ មកម្ល៉េះ ខណៈក្រុមហ៊ុនរំពឹងថា នឹងលក់រថយន្តទំនើបៗទាំងនេះ បាន ១០០ គ្រឿងនៅឆ្នាំ២០១៧៕