អ្នកចាត់ក្រុមបាល់ទាត់ទាំង១០ដែលទទួលបានថ្លៃពលកម្មខ្ពស់បំផុតក្នុងលោកឆ្នាំ២០២៤

2024-11-20 01:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការងារជាអ្នកចាត់ការរបស់ក្រុមនីមួយៗ មិនមែនជារឿងងាយស្រួលនោះទេ ពេលខ្លះមិនត្រូវបានគេលើកទឹកចិត្ត ឬផ្ដល់រង្វាន់អ្វីឡើយ ផ្ទុយទៅវិញពួកគេក៏តែងត្រូវបានបណ្ដេញចេញប្រសិនបើដឹកនាំក្រុមមិនដូចការចង់បានរបស់ក្លឹប។ រឿងប្រាក់រង្វាន់ក៏ដូចគ្នាអ្នកចាត់ការដែលជោគជ័យខ្លាំងបំផុតទើបទទួលបានប្រាក់រង្វាន់លើកទឹកចិត្ត ឬអ្នកចាត់ការដែលត្រូវបណ្ដេញចេញភ្លាមៗទើបទទួលបានប្រាក់ជាថ្នូរនឹងការបណ្ដេញចេញ ឬគេហៅថាប្រាក់សងជំងឺចិត្ត។

ក្នុងភាពជាអ្នកដឹកនាំអ្នកចាត់ការទាំងអស់ទទួលបានថ្លៃពលកម្មមិនដូចគ្នាឡើយបានតិចឬច្រើនទៅតាមប្រជាប្រិយភាពឬភាពជោគជ័យដែលបានជួយក្លឹប ហើយដើម្បីឲ្យប្រិយមិត្តបានដឹងកាន់តែច្បាស់ថ្ងៃនេះ Sabay សូមធ្វើការលើកយកអ្នកចាត់ទាំង១០រូបដែលទទួលបានថ្លៃពលកម្មខ្ពស់បំផុតប្រចាំឆ្នាំ២០២៤៖

១- Pep Guardiola ៖ អ្នកចាត់ការដែលត្រូវបានគេចាត់ទុកថាខ្លាំងបំផុតនាពេលបច្ចុប្បន្នកំពុងតែដឹកនាំក្រុម Manchester City ហើយបុរសវ័យ៥៣ឆ្នាំរូបនេះទទួលបានថ្លៃពលកម្មខ្ពស់បំផុតក្នុងលោកនាពេលបច្ចុប្បន្នគឺ ២០លានផោនក្នុង១ឆ្នាំ។

២- Mikel Arteta ៖ អតីតជំនួយការរបស់ Pep និងជាអ្នកចាត់ការរបស់ Arsenal រូបនេះក៏មិនណយដែរ ពោលគឺទទួលបានកម្រិតទី២នាមជាអ្នកចាត់ការដែលមានថ្លៃពលកម្មខ្ពស់បំផុតនាឆ្នាំ២០២៤ គឺ១៥លានផោនក្នុងឆ្នាំ។

៣- Diego Simeone ៖ លោកកំពុងតែដឹកនាំឲ្យក្រុម Atletico Madrid ហើយទទួលបានថ្លៃពលកម្មថ្លៃបំផុតទី៣ក្នុងលោកគឺទទួលបាន១០,១លានផោនក្នុងមួយឆ្នាំ។

៤-Carlo Ancelotti ៖ បច្ចុប្បន្នបុរសវ័យ៦៥ឆ្នាំរូបនេះកំពុងតែកាន់ការងារជាអ្នកចាត់ការឲ្យក្រុម Real Madrid និងទទួលបានថ្លៃពលកម្មថ្លៃបំផុតទី៤ក្នុងលោកគឺ ៩,៦ លានផោនក្នុង១ឆ្នាំ។

៥- Jose Mourinho ៖ អ្នកចាត់ការល្បីឈ្មោះបំផុតក្នុងលោកម្នាក់ដែរ Special One ជាងារដែលគេដាក់ឲ្យលោក Jose Mourinho ហើយបើនិយាយពីថ្លៃពលកម្មវិញក៏មិនថោកនោះទេពោលកម្រិតទី៥ក្នុងលោកទៅហើយគឺ ៨,៩លានផោនក្នុង១ឆ្នាំ។

៦-លោក Jorge Jesus ៖ ដ្បិតថាមិនមែនជាអ្នកការល្បីឈ្មោះម្នាក់ក្នុងលោក ប៉ុន្តែអ្នកការរបស់ក្រុម Al Hilal រូបនេះក៏មានថ្លៃពលកម្មថ្លៃម្នាក់ដែរពោលគឺទទួលបាន ៨,៤លានផោនក្នុងមួយឆ្នាំ។

៧- Unai Emery ៖ អ្នកចាត់ការ Aston Villa រូបនេះក៏កំពុងតែមានភាពជោគជ័យខ្លាំងផងដែរ ពោលគឺជួយក្រុមបានលេង UEFA Champions League និងទើបតែចាញ់១ប្រកួតប៉ុណ្ណោះក្នុងពានរង្វាន់កម្រិតកំពូលនៅអឺរ៉ូបមួយនេះក្នុងចំណោម៤ប្រកួត។ បើនិយាយពីថ្លៃពលកម្មវិញថ្លៃជាងអ្នកការក្រុមធំៗមួយចំនួនដូចជា Chelsea ឬ Liverpool ទៅទៀតពោលគឺ៨លានផោនក្នុង១ឆ្នាំ។

៨- Luis Enrique ៖ អ្នកការរបស់ Paris Saint-Germain រូបនេះទទួលបានថ្លៃពលកម្មប្រមាណជា៧,៥លានផោនក្នុង១ឆ្នាំ។

៩-Arne Slot ៖ អ្នកការរបស់ហង្សក្រហម Liverpool រូបនេះទទួលបានថ្លៃពលកម្ម ៦,៨ លានផោនក្នុង១ឆ្នាំ។

១០- Vincent Kompany អ្នកការរបស់ Bayern Munich រូបនេះទទួលបានថ្លៃពលកម្ម ៦,៧ លានផោនក្នុង១ឆ្នាំ។