អ្នកមានចំណូលចន្លោះ ២០០-៥០០ដុល្លារ ទិញដីឡូត៍ជាយក្រុងជារឿងល្អបំផុត
- 2017-03-02 06:57:06
- ចំនួនមតិ 0 | ចំនួនចែករំលែក 0
អ្នកមានចំណូលចន្លោះ ២០០-៥០០ដុល្លារ ទិញដីឡូត៍ជាយក្រុងជារឿងល្អបំផុត
ចន្លោះមិនឃើញ
ដីឡូត៍នៅតំបន់ជាយក្រុងមានការកើនឡើងជាលំដាប់ បានធ្វើឱ្យប្រជាពលរដ្ឋមានការចាប់អារម្មណ៍ក្នុងការវិនិយោគលើដីឡូត៍ទាំងនោះ។ ប៉ុន្តែមានប្រជាពលរដ្ឋជាច្រើននៅតែមិនទាន់ហ៊ានសម្រេចចិត្តក្នុងការទិញដីឡូត៍ទាំងនោះព្រោះខ្លាចមានហានិភ័យផ្សេងៗ។ ដូចនេះតើការទិញដីឡូត៍នៅជាយក្រុងល្អឬទេ? ហើយត្រូវសិក្សាលើបញ្ហាអ្វីខ្លះ?
ជួបជាមួយអ្នកជំនាញក្នុងវិស័យអចលនទ្រព្យ លោក គីម ហ៊ាង ដែលជាប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា បានប្រាប់ថា ការទិញដៅឡូត៍នៅតំបន់ជាយក្រុងគឺជារឿងល្អបំផុត ជាពិសេសអ្នកចំណូលក្រោមមធ្យម ចន្លោះពី ២០០ដុល្លារ ទៅ៥០០ដុល្លារ។ លោកប្រាប់ថា ជាទូទៅអ្នកចំណូលក្រោមមធ្យម ចង់ទិញអចលនទ្រព្យក្នុងក្រុងគឺជារឿងមិនអាច តែអាចទិញដៅឡូត៍បាន។ លោកប្រាប់ទៀតថា ក្នុងនោះគួរតែជួលបន្ទប់ស្នាក់នៅតម្លៃសមរម្យ ហើយទុកលុយទិញដីឡូត៍បង់រំលស់វិញ ត្រឹមរយៈពេល ៣ឆ្នាំទៅ៥ឆ្នាំក្រោយអាចទិញដីធ្វើផ្ទះបានហើយ។
ចំពោះផលអវិជ្ជមាននៃការទិញដីឡូត៍វិញ ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជារូបនេះ និយាយថា៖ "ផលអវិជ្ជមាននៃការទិញដីឡូត៍ គឺការបែងចែកប្លង់កម្មសិទ្ធិតែម្ដង អ្វីដែលឈឺក្បាលវិលមុខនោះ គឺដីឡូត៍ដែលមានប្លង់រឹង តែពេលលក់ចេញទៅកាន់អ្នកទិញធ្វើត្រឹមខណ្ឌ។ ប៉ុន្តែប្រសិនបើម្ចាស់ដីឡូត៍មានប្លង់រឹង ហើយសុំអាជ្ញាធរដែនដីដើម្បីសុំច្បាប់ពុះដីឡូត៍លក់ និងបំបែកក្បាលដីមានប្លង់រឹងត្រឹមត្រូវទៅឱ្យអ្នកទិញនោះជារឿងវិសេសវិសាលមែនទែនហ្មង"។ លោកគីម ហ៊ាង ក៏បានណែនាំទៅម្ចាស់ដីឡូត៍ផងដែរថា ប្រសិនបើមានប្លង់ទន់ធ្វើត្រឹមខណ្ឌ តែបើមានប្លង់រឹងហើយគួរបំបែកក្បាលដីមានប្លង់រឹងត្រឹមត្រូវទៅឱ្យអ្នកទិញ។
ដោយឡែកចំពោះផលវិជ្ជមានវិញ ម្ចាស់ក្រុមហ៊ុន KHMER REAL ESTATE លើកឡើងថា ដោយសារបច្ចុប្បន្ននេះ កំណើនប្រជាជនក្នុងទីក្រុងកាន់តែច្រើនឡើង ពី១ថ្ងៃទៅ១ថ្ងៃ ប្រជាជនរាប់ម៉ឺននាក់ចូលទីក្រុងដើម្បីរកការងារធ្វើ ដើម្បីសិក្សា ដើម្បីធ្វើអាជីវកម្ម។ ដោយឡែកក្រោមមធ្យម ២០០ដុល្លារ ទៅ៥០០ដុល្លារ គួរតែទៅទិញដីបង់រំលស់នៅជាយក្រុងគឺជាល្អបំផុត។
ប៉ុន្តែដើម្បីបញ្ចៀសហានិភ័យ មុនពេលសម្រេចចិត្តទិញដីឡូត៍ គួរតែធ្វើការសិក្សាស្រាវជ្រាវឱ្យបានច្បាស់លាស់ តាមរយៈការសាកសួរ ការិយាល័យសុរិយោដីតាមខណ្ឌ អាជ្ញាធរដែនដី ហើយដើម្បីឱ្យកាន់តែច្បាស់តែម្ដង គួរតែទាក់ទងមេភូមិដែលដឹងរឿងច្បាស់ជាងគេ ឬមួយសាកសួរដល់សង្កាត់ក៏បានដែរ៕