គួរ​ឲ្យ​ព្រឺព្រួច​ចំពោះ​សម្ដី ឌូតឺតេ ព្រមាន​អ្នក​ជួញដូរ​គ្រឿងញៀន

  • 2017-03-03 08:17:52
  • ចំនួនមតិ

ចន្លោះមិនឃើញ

កាល​ពី​ពេល​ថ្មីៗ​នេះ ប្រធានាធិបតី​ហ្វីលីពីន លោក ឌូតឺតេ បាន​ចេញ​សេចក្ដី​ព្រមាន​ថា នឹង​មាន​ការ​សម្លាប់​កាន់​តែ​ច្រើន​បន្ថែម​ទៀត ស្រប​ថ្ងៃ​តែ​មួយ ដែល​ក្រុម​ប្រឹក្សា​ភិបាល International Narcotics Control Board (INCB) គាំទ្រ​ដោយ​អង្គការ​សហប្រជាជាតិ បាន​ថ្កោល​ទោស​ចំពោះ​ការ​សម្លាប់​ក្រៅ​ប្រព័ន្ធ​តុលាការ ដែល​ជា​ផ្នែក​មួយ​នៃ​សង្គ្រាម​គ្រឿងញៀន របស់​លោក ឌូតឺតេ។

ប្រធានាធិបតី​ហ្វីលីពីន លោក ឌូតឺតេ (រូបភាព​ផ្តល់​សិទ្ធិ​ដោយ Reuters)

មេដឹកនាំ វ័យ​៧១​ឆ្នាំ​រូប​នេះ បាន​ចេញ​សេចក្ដី​ព្រមាន​យ៉ាង​ចម្រូងចម្រាស នៅ​ក្នុង​ពិធី​បើក​ការដ្ឋាន​សាងសង់​ផ្លូវហាយ Cebu-Cordova កាល​ពី​ថ្ងៃ​ព្រហស្បតិ៍ ម្សិលមិញ​នេះ​ថា «ខ្ញុំ​បាន​ប្ដេជ្ញា​ចិត្ត​ដើម្បី​បញ្ឈប់​ការ​ប្រើប្រាស់ និង​ជួញ​ដូរ​គ្រឿងញៀន មុន​ពេល​ខ្ញុំ​ចាកចេញ។ វា​មាន​ន័យ​ថា នឹង​មាន​ការ​សម្លាប់​កាន់​តែ​ច្រើន​បន្ថែម​ទៀត ព្រោះ​ពួកគេ​ពិត​ជា​តដៃ​ខ្លាំង​ណាស់។ វា​នឹង​មិន​បញ្ចប់​នៅ​ថ្ងៃ​ស្អែក​ឡើយ ដរាប​ណា​អ្នក​ប្រើប្រាស់ និង​ជួញ​ដូរ​គ្រឿងញៀន​នៅ​តែ​មាន»។

គួរ​រំលឹក​ថា លោក ឌូតឺតេ ធ្លាប់​បាន​អះអាង​ថា មាន​មន្ត្រី​ប៉ូលិស​ហ្វីលីពីន ចំនួន​៦ ០០០​នាក់ បាន​ជាប់​ពាក់ព័ន្ធ​រឿង​គ្រឿងញៀន​នេះ ហើយ​បាន​ជំទាស់​ទៅ​នឹង​វិធីសាស្ត្រ​របស់​លោក ដើម្បី​ធ្វើ​ឃាត​លោក​ទៀត​ផង។

«អ្នក​នឹង​ស្លាប់... បើ​អ្នក​មិន​សម្លាប់​ខ្ញុំ ខ្ញុំ​នឹង​សម្លាប់​អ្នក»។ នេះ​បើ​តាម​សម្ដី លោក ឌូតឺតេ បាន​បញ្ជាក់។

ប្រធានាធិបតី​ហ្វីលីពីន លោក ឌូតឺតេ (រូបភាព​ផ្តល់​សិទ្ធិ​ដោយ Reuters)

គួរ​ឲ្យ​ដឹង​ផង​ដែរ​ថា យ៉ាង​ហោច​ណាស់​មាន​មនុស្ស​ចំនួន ២ ៥០០​នាក់​ហើយ​​ដែល​បាន​ស្លាប់​បាត់​បង់​ជីវិត នៅ​ក្នុង​ប្រតិបត្តិការ​បង្ក្រាប​គ្រឿងញៀន​របស់​ប៉ូលិស​ហ្វីលីពីន ចាប់​តាំង​ពី​ខែ​មិថុនា ឆ្នាំ​២០១៦ មក៕


ប្រភព៖ RT ប្រែ​សម្រួល៖ សេង ឡុង