គ្រូជម្រើសជាតិថ្មី៖ សួង វីរៈ ជាខ្សែប្រយុទ្ធល្អបំផុតរបស់កម្ពុជា

2017-03-10 06:37:05
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Leonardo Vitorino គ្រូបង្វឹកក្រុមជម្រើសជាតិកម្ពុជាបានលើកឡើងក្នុងសន្និសីទកាសែតមុននេះបន្តិចថា ខ្សែប្រយុទ្ធក្រុមណាហ្គាវើល សួង វីរៈ គឺជាខ្សែប្រយុទ្ធល្អបំផុតរបស់ជម្រើសជាតិកម្ពុជា។

គ្រូបង្វឹកសញ្ជាតិប្រេស៊ីលរូបនេះបានឲ្យដឹងថា សួង វីរៈ មានសមត្ថភាពគ្រប់គ្រាន់អាចលេងបានល្អ និងមានភាពរស់រវើកលើទីលាន។ ការជ្រើសរើសកីឡាកររូបនេះចូលក្នុងជម្រើសជាតិ នឹងអាចធ្វើឲ្យក្រុមមានទម្រង់លេងកាន់តែល្អជាងមុន ពិសេសខ្សែប្រយុទ្ធរូបនេះមានចលនាលឿនចុះជួយតំបន់បម្រើក៏លឿន។

លោកបន្ថែមថា កីឡាករទាំងអស់ជាអ្នកសរសេរឈ្មោះរបស់ខ្លួនឯងក្នុងក្រុមជម្រើសជាតិ នៅពេលដែលពួកគេបង្ហាញសមត្ថភាពបានល្អក្នុងក្រុមរបស់ខ្លួន លោកនឹងរើសយកមកចូលជម្រើសជាតិ។ ម៉្យាងទៀតការដាក់បញ្ចូលកីឡាករក្មេងៗ ឲ្យចូលក្នុងក្រុមជម្រើសជាតិលាយឡំជាមួយកីឡាករមានបទពិសោធន៍ច្រើន អាចឲ្យក្មេងៗទទួលបានបទពិសោធន៍ពីរៀមច្បង។

សួង វីរៈ ជាខ្សែប្រយុទ្ធក្លឹបណាហ្គាវើល ដែលបានជាប់ឈ្មោះក្នុងបញ្ជីកីឡាករ ២៣នាក់ចុងក្រោយរបស់គ្រូបង្វឹកថ្មីត្រៀមជួប ឥណ្ឌា ថ្ងៃទី២២ ខែមីនា ឆ្នាំ២០១៧។ ថ្ងៃច័នទី១៣ ខែមីនា ឆ្នាំ២០១៧សប្ដាហ៍ក្រោយក្រុមកីឡាករជម្រើសជាតិកម្ពុជាចំនួន ២៣នាក់ នឹងធ្វើការប្រមូលផ្ដុំហ្វឹកហាត់នៅសាលាបាល់ទាត់ជាតិបាទីខេត្តតាកែវ៕