ជើងឯកគោជល់រដូវការទី៧ ប្រជុំដោយជើងខ្លាំងនៅ CNC

2017-03-12 09:23:08
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបញ្ចប់ទៅនិងរកឃើញម្ចាស់ខ្សែក្រវាត់រដូវការទី៦ ដែលបានទៅលើកីឡាករ មឿន សុខហ៊ុច រួចមក កាលពីម្សិលមិញថ្ងៃទី១១ ខែមិនា ឆ្នាំ ២០១៧នេះ ទូរទស្សន៍ CNC បានប្រកាសបើកឆាកខ្សែក្រវាត់រដូវការទី៧ ទម្ងន់ ៦៣.៥កីឡាក្រាមជាថ្មីម្ដងទៀត។

លោក ស៊ីថូ ណាថាន់

លោក ស៊ីថូ ណាថាន់ តំណាងឲ្យផ្នែកកីឡារបស់ទូរទស្សន៍ CNC បានឲ្យដឹងនាពេលសន្និសីទសារព័ត៌មានកាលពីល្ងាចថ្ងៃទី១១ ខែមិនា ឆ្នាំ ២០១៧ នៅស្ថានីយឬស្សីកែវថា ក្រោយពេលសម្រាកមួយរយៈពេលបន្ទាប់ពីបញ្ចប់ខ្សែក្រវាត់រដូវការទី៦ កន្លងទៅនេះដោយដាក់ឲ្យមានការប្រកួតមិត្តភាពអន្តរជាតិជំនួស។ ឥលូវនេះក្រវាត់រដូវការទី៧ បានចាប់ផ្ដើមឡើងវិញហើយ គឺទម្ងន់ ៦៣.៥គីឡូក្រាម ដោយមានសុទ្ធតែកំពូលកីឡាករនៅកម្ពុជាចូលរួម។

ពានរង្វាន់

អ្នករៀបចំកម្មវិធីប្រដាល់រូបនេះបន្ថែមទៀតថា កីឡាករកម្ពុជាដែលចូលរួមសុទ្ធតែមានមានឈ្មោះបោះសម្លេងនាពេលបច្ចុប្បន្ន រីឯកីឡាករមកពីប្រទេសថៃក៏មិនធម្មតានោះដែល។ លោកនិងក្រុមការងារបានចុះទៅពិនិត្យមើលដល់ក្លឹបពួកគេហ្វឹកហាត់តែម្ដង កីឡាករទាំងនោះ ២នាក់ធ្លាប់មកប្រកួតនៅកម្ពុជា ហើយពួកគេមានថ្វីដៃល្អណាស់។ កូនលោក ម៉ា សេរី រូបនេះសង្ឃឹមថាខ្សែក្រវាត់រដូវការនេះនឹងធ្វើឲ្យទស្សនិកជនជក់ចិត្តនិងកក្រើកមិនខាន។

ចៅក្រមនិងអាជ្ញាកណ្ដាល

កីឡាករកម្ពុជា ៤រូប ដែលនឹងត្រូវចូលរួមប្រកួតប្រជែងមានដូចជា ឃីម ឌីម៉ា, ឆៃ សារ៉ា, ឌុម កែវដា និង សេន គឹមរួន ខណៈជើងខ្លាំងថៃមាន ៤រូប ដូចគ្នា។ ប្រាក់រង្វាន់សម្រាប់ម្ចាស់ខ្សែក្រវាត់រដូវការទី៧នេះ នឹងទទួលបាន ពានជើងឯក១ ខ្សែកមាស និងទឹកប្រាក់ ២០លានរៀល, លេខ២ ពានរង្វាន់១ ខ្សែកមាស និងទឹកប្រាក់ ១០លានរៀល, លេខ៣ ពានរង្វាន់១ ខ្សែកមាស និងទឹកប្រាក់ ៦លានរៀល និងលេខ៤ ពានរង្វាន់១ និងទឹកប្រាក់ ៤លានរៀល។ ការប្រកួតសប្ដាហ៍ទី១ នឹងចាប់ផ្ដើមឡើងនៅថ្ងៃសៅរ៍ ទី១៨ ខែមិនា ឆ្នាំ ២០១៧ វេលាម៉ោង ៥.៤០ល្ងាច ដល់ម៉ោង ៨យប់៕

អត្ថបទ៖ នួន ស៊ីណា