របររកស៊ី ចំណាយដើមទុនតិច ចំណេញច្រើន យុវវ័យអាចចាប់ផ្ដើមបាន
- 2017-03-15 23:11:00
- ចំនួនមតិ 0 | ចំនួនចែករំលែក 0
របររកស៊ី ចំណាយដើមទុនតិច ចំណេញច្រើន យុវវ័យអាចចាប់ផ្ដើមបាន
ចន្លោះមិនឃើញ
មានយុវវ័យ ឬនិស្សិតដែលទើបតែបញ្ចប់ការសិក្សាមួយចំនួន មានដើមទុនចង់ចាប់ផ្ដើមរកស៊ីដោយខ្លួនឯង តែនៅមិនទាន់ដឹងច្បាស់ថាតើ មុខរបរណាដែលចំណាយដើមទុនតិច ចំណេញច្រើន និងប្រឈមហានិភ័យទាប។ ដូច្នេះប្រសិនបើយុវវ័យចង់រកស៊ីដោយខ្លួនឯង ឬជាក្រុម តើគួររកស៊ីមុខរបរអ្វីទៅ?
លោកសាស្ត្រាចារ្យ សេដ្ឋកិច្ច សេង សុខហាក់ ដែលបង្រៀននៅសាកលវិទ្យាល័យឯកជនមួយ និងជាអ្នករកស៊ីដ៏ឆ្នើមម្នាក់ផងនោះបានលើកឡើងថា មុខរបរចំណាយដើមទុនតិច ចំណេញច្រើន និងប្រឈមហានិភ័យទាបនោះ គឺ មុខរបរលំហែកម្សាន្ត និងម្ហូបអាហារ។ លោកបានប្រាប់ថា កូនសិស្សរបស់លោកមួយក្រុមគ្នា ៥នាក់ចំណាយដើមទុនម្នាក់បន្តិច បើកជាកន្លែងលក់ Fast food មានជាចំណីអាហារ បាយ កាហ្វេ នៅតាមផ្លូវហើយអាចរកលុយបានច្រើនដោយមិនចាំបាច់អស់ដើមទុនច្រើន និងពេលវេលាយូរនោះទេ។ ដូច្នេះហើយមុខរបរផ្នែកសេវាម្ហូបអាហារនេះ ជាមុខរបរមិនចេះរីងស្ងួតនោះទេ។
លោកសាស្ត្រាចារ្យ សេង សុខហាក់ លើឡើងទៀតថា និស្សិតអាចចូលលុយគ្នា ម្នាក់ ១ពាន់ដុល្លារ ២ពាន់ដុល្លារ ហើយធ្វើជាម្ចាស់ខ្លួនឯង អ្នកបម្រើសេវាខ្លួនឯងបានដោយមិនចាំប្រើកម្លាំងពលកម្មផ្សេងនោះទេ។ លោកនិយាយទៀតថា អ្នកណាក៏ត្រូវការហូប អ្នកណាក៏ត្រូវការសប្បាយ បើនិយាយពីវិស័យអប់រំ ចង់បើកសាលារៀនត្រូវការដើមទុន តែការហូបចុក ការកម្សាន្តគឺមនុស្សត្រូវការជារៀងរាល់ថ្ងៃ។
ម្ចាស់ចម្ការទុរេន នៅខេត្តកំពតរូបនេះ ក៏បានបញ្ជាក់ផងដែរថា បើចង់រកស៊ីទាំងវ័យក្មេង កុំរកស៊ីតែឯង ដូចជាពាក្យគេនិយាយថា៖ "បើចង់ដើរលឿនគឺដើរតែឯងចុះ តែបើចង់យូរ ហើយដើរឱ្យឆ្ងាយគឺដើរជាក្រុម" មិនខុសពីការរកស៊ីដែរ គួរមានក្រុមការងារពី ៣ ទៅ៥នាក់ ដើម្បីចាប់ផ្ដើមអាជីវកម្ម។ ដូច្នេះចាំបាច់ត្រូវមានការ សហការជាមួយអ្នកណាដែលមានអ្វី ហើយខ្លួនឯងមិនមាន ហើយអ្វីដែលខ្លួនឯងមានប៉ុន្តែគេមិនមាន។ បន្ថែមលើពីនេះទៀត ក្នុងក្រុមត្រូវមានអ្នកមានគំនិត ត្រូវមានពេល អ្នកមានពេលវេលា ទើបការរកស៊ីជាក្រុមទទួលបានជោគជ័យ៕