មុនឡើងផ្ទះ រៀបអាពាហ៍ពិពាហ៍ ឬបើកហាងថ្មី គួរមើលរាសីថ្ងៃទាំង៧នេះសិន

2017-03-23 09:28:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាការពិតណាស់ ខ្មែរបុរាណចូលចិត្តគន់គូរ មើលរាសីល្អអាក្រក់ជាមុនសិន ទើបចាប់ផ្ដើមប្រារព្ធរៀបចំនូវពិធីសំខាន់ៗនានា។ ការធ្វើបែបនេះក៏ដោយសារតែ ពួកគាត់ចង់បាននូវសិរីសួស្ដី និង ប្រកបកិច្ចការងារទាំងនោះអោយមានភាពជោគជ័យផងដែរ។ ខាងក្រោមនេះគឺជារាសីថ្ងៃទាំង៧ ដែលចាស់បុរាណខ្មែរបានចងក្រងទុកក្នុងតម្រា៖

ថ្ងៃអាទិត្យ

បុរាណប្រាប់ថា ថ្ងៃអាទិត្យគឺមានឈ្មោះថា ពេជ្រឫក្ស បើសង់ផ្ទះ ឡើងផ្ទះថ្មី រៀបអាពាហ៍ពិពាហ៍ នឹងល្អប្រសើរ មានជោគជ័យសិរីមង្គល តែហាមមិនអោយកោរជុក និង មិនអោយទទួលទិញរបស់ទ្រព្យឡើយមានតម្លៃខ្ពស់ឡើយ។ បើធ្វើដំណើរទៅកាន់ផ្លូវឆ្ងាយនឹងមានជ័យ ប្រកបដោយសុវត្ថិភាព។

ថ្ងៃច័ន្ទ

បុរាណប្រាប់ថា ថ្ងៃច័ន្ទ មានឈ្មោះថាមនុស្សឫក្ស បើឡើងផ្ទះថ្មីនឹងល្អប្រសើរ តែកុំអូសទូក សំពៅ ឬ កប៉ាល់ ឡើងពីទឹកអោយសោះ។ ថ្ងៃនេះមិនល្អសម្រាប់តាំងទីនៅវត្តអារាម កុំធ្វើធ្មេញ រឺ ដាំធ្មេញអោយសោះ។ ថ្ងៃច័ន្ទនេះដែរ បុរាណហាមមិនអោយធ្វើអាវុធយុទ្ធភណ្ឌនោះឡើយ។

ថ្ងៃអង្គារ

ខ្មែរបុរាណពោលថា ថ្ងៃអង្គារមានឈ្មោះថា ពេជ្រឫក្ស។ លោកហាមមិនអោយសង់ផ្ទះ ឬ ឡើងផ្ទះថ្មី។ កុំរៀបការ និង ទិញដូររបស់ដែលមានតម្លៃខ្ពស់។ បើចេញទៅក្រៅនឹងល្អ ហើយបើសង់គុហានឹងឧត្ដុង្គឧត្ដម។

ថ្ងៃពុធ

ខ្មែរបុរាណ តែងនិយាយថា ថ្ងៃពុធឈ្មោះថា សិទ្ធិឫក្ស បើតាំងទីនៅអារាមនឹងល្អប្រសើរ ប៉ុន្តែកុំទទួលសង់វិហារអោយសោះ។

ថ្ងៃព្រហស្បតិ៍

ចំពោះថ្ងៃព្រហស្បតិ៍វិញគឺមានឈ្មោះថាឫក្ស ចាស់បុរាណហាមមិនអោយឡើងផ្ទះថ្មីនោះទេ ប៉ុន្តែការងារផ្សេងៗអាចធ្វើបាន ព្រោះវានឹងល្អប្រសើរ។

ថ្ងៃសុក្រ

បុរាណាចារ្យបានផ្ដាំកូនចៅទុកថា ថ្ងៃសុក្រជាថ្ងៃសុខុមឫក្ស ដោយលោកហាមមិនអោយដាក់ទូក សំពៅ ឬ កប៉ាល់ចុះទឹកនោះឡើយ។ ថ្ងៃនេះមិនល្អសម្រាប់ការធ្វើដំណើរផ្លូវឆ្ងាយនោះទេ តែបើធ្វើការនៅនឹងកន្លែងវិញ គឺច្បាស់ជាល្អឧត្តុង្គឧត្ដមណាស់។

ថ្ងៃសៅរ៍

ចំពោះថ្ងៃសៅរ៍វិញ ខ្មែរបុរាណហៅថាជាថ្ងៃពេជ្រឫក្ស ដោយគាត់ហាមមិនអោយសង់ផ្ទះ ឬ ឡើងផ្ទះថ្មីនោះឡើយ។ មិនតែប៉ុណ្ណោះ អ្នកដែលចូលម្លប់ ឬ រៀបមង្គលការក្នុងថ្ងៃនេះ ក៏មិនល្អនោះដែរ។ មួយវិញទៀតកុំទិញ ឬ លក់របស់ទ្រព្យដែលមានតម្លៃអោយសោះ។