អាយុ ៧០ឆ្នាំ តែនៅធាក់កង់ជាង ៣០គីឡូម៉ែត្ររកលុយសងគេ ព្រោះកូនលួចលក់ដី

2017-03-16 23:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អាយុជិត ៧០ឆ្នាំទៅហើយនោះ លោកតា ឃុត សុផាត ត្រូវធាក់កង់ប្រវែងជាង៣០គីឡូម៉ែត្រ ដើម្បីមកលក់ក្រូចថ្លុងនៅរាជធានីភ្នំពេញជារៀងរាល់ថ្ងៃ។ លោកតាប្រាប់ថា ដោយសារតែជីវភាពក្រីក្រ កូនៗមិនអាចពឹងអាស្រ័យបាន ហើយប្រពន្ធលោកតាមានជំងឺត្រូវការលុយដើម្បីព្យាបាលផងនោះ ទើបជារៀងរាល់ថ្ងៃ លោកតាត្រូវភ្ញាក់តាំងពីម៉ោង ៤ទាបភ្លឺដើម្បីធាក់មកភ្នំពេញលក់ក្រូចថ្លុងនេះ។

ក្នុងសភាពអស់កម្លាំងដោយសារតែហត់នឿយនឹងការធាក់កង់ លោកតារៀបរាប់ទៀត ជាង១០ឆ្នាំហើយដែលលោកតា ត្រូវធាក់កង់ចម្ងាយរាប់គីឡូម៉ែត្រ ដើម្បីលក់ក្រូចថ្លុងនេះ គ្រាន់នឹងបានលុយខ្លះផ្គត់ផ្គង់ជីវភាព និងព្យាបាលជំងឺលោកយាយ។ អ្វីដែលធ្វើឱ្យលោកតាត្រូវតស៊ូលក់ដូរនេះ ក៏ដោយសារត្រូវរកលុយដើម្បីសងបំណុលគេរហូតដល់ទៅជាង ៣ពាន់ដុល្លារឯណោះ។ មកដល់ចំណុចនេះលោកតានិយាយថា៖ "ហឹមម និយាយឱ្យអស់ទៅខ្ញុំលក់ដូរនេះ ដោយសារត្រូវរកលុយសងបំណុលគេ ព្រោះកូនយកដីទៅលក់ ម្លោះហើយត្រូវរកលុយ ដើម្បីលស់យកដីមកវិញចៅអើយ"។

ទោះឥទ្ធិពលនៃកម្ដៅព្រះអាទិត្យហាក់មិនប្រណី ក៏លោកតាកម្សត់ម្នាក់នេះមិនបោះបង់ការតស៊ូឡើយ ព្រោះបើមិនខំរកគ្មានកូនណាចិញ្ចឹមទេ។ លោកតារៀបរាប់ទៀតថា ក្នុងមួយថ្ងៃអាចរកលុយបានជាង២០ម៉ឺនរៀល ក្នុងនោះប្រាក់ចំណេញត្រឹមតែ២ម៉ឺនរៀល ឬជាង១ម៉ឺនរៀលទេ ហើយលោកតាត្រូវធាក់កង់លក់ក្រូចថ្លុងគ្រប់ទីកន្លែងក្នុងរាជធានីភ្នំពេញពេញមួយថ្ងៃ លុះល្ងាចឡើងទើបធាក់កង់ត្រឡប់ទៅផ្ទះវិញ។

នៅពេលសួរថា តើលោកតាត្រូវធាក់កង់ទៅមកជារៀងរាល់ថ្ងៃបែបនេះ មិនប៉ះពាល់ដល់សុខភាព ឈឺសន្លាក់ជង្គង់អីទេ? លោកតា សុផាត បានប្រាប់ថា មិនមានបញ្ហាអ្វីនោះទេ ត្រូវតែខំប្រឹងបន្តទៀត ព្រោះមិនខំគ្មានអ្នកចិញ្ចឹមទេ ម្យ៉ាងត្រូវរកលុយសងបំណុលគេផង។ លោកតាប្រាប់ទៀតថា ឥឡូវនេះបានសងពាក់កណ្ដាលហើយនៅពាក់កណ្ដាលទៀត ដោយសារតែស្ដាយកេរអាករទើបខំទៅលស់យកដីមកវិញ។

លោកតាប្រាប់ទៀតថា កាលពីមុនលោកតាមិនមានកង់ធាក់លក់នោះទេ គឺត្រូវរែកក្រូចលក់ដោយកម្លាំងកាយសុទ្ធតែម្ដង ក្រោយពេលមានលទ្ធភាពតិចតួចទើបអាចទិញកង់ចាស់មួយគ្រាននឹងធាក់ លក់ក្រូចបន្តទៅទៀត ដើម្បីចិញ្ចឹមជីវិតលោកតា និងភរិយាលុះដល់ដើរលែងកើតទើបឈប់លក់៕

អត្ថបទ៖ វឌ្ឍនៈ