ក្រោយឈប់ជាង ១០ឆ្នាំ បទទី១របស់ ស៊ិន ឧត្តមផល្លា និយាយពីអ្នកបាត់ដំបង
- 2017-03-19 23:12:00
- ចំនួនមតិ 0 | ចំនួនចែករំលែក 0
ក្រោយឈប់ជាង ១០ឆ្នាំ បទទី១របស់ ស៊ិន ឧត្តមផល្លា និយាយពីអ្នកបាត់ដំបង
ចន្លោះមិនឃើញ
អតីតតារាចម្រៀង ស៊ិន ឧត្តមផល្លា ដែលនិយមច្រៀងបទចម្រៀងអន្តរជាតិ ហើយបានបោះបង់អាជីពជាង១០ឆ្នាំហើយនោះ ឥឡូវបានងាកមកចូលសិល្បៈវិញ និងទើបបានចេញបទចម្រៀងថ្មីមួយបទកាលពីប៉ុន្មានថ្ងៃមុននេះ។
បទចម្រៀងថ្មីរបស់ ស៊ិន ឧត្តមផល្លា នោះ មានចំណងជើងថា "បាត់ដំបងចាំស្នេហ៍" ជាប្រភេទបទមនោសញ្ចេតនា ចេញក្រោមផលិតកម្ម Zoom។ តាមការបញ្ជាក់របស់សាមីខ្លួន អ្នកនាង ក៏ត្រៀមនឹងចេញបទថ្មីបន្តបន្ទាប់ទៀតដែរនាពេលខាងមុខ ដោយពេលនេះ ខាងផលិតកម្មកំពុងតែរៀបចំ។ ការចេញដំបូងមួយបទនេះ គឺដើម្បីស្ទាបស្ទង់ពីទីផ្សារ ក៏ដូចជាការគាំទ្រពីសំណាក់ទស្សនិកជន។
ស្នាដៃថ្មីដែលម្ចាស់បទបានបង្ហោះលើបណ្ដាញសង្គម ឃើញថា ទទួលបានការគាំទ្រច្រើនគួរសម ក្នុងនោះអ្នកខ្លះបានសរសើរពីទឹកដមសំឡេងថា នៅពីរោះទទួលយកបាន គ្រាន់តែនៅមានបញ្ហាលើការប្រើប្រាស់ដង្ហើមបន្តិច។ ចំណុចនេះ ម្ចាស់បទក៏បានទទួលស្គាល់ដែរ និងថា បញ្ហានេះ ដោយសារតែខ្លួនមិនទាន់ទម្លាប់។
អ្នកនាងថ្លែងថា “ខ្ញុំដឹងខ្លួនឯងដែរ តែដោយសារតែពីមុន ខ្ញុំច្រើនតែច្រៀងបទបរទេស ដល់មកច្រៀងបទខ្មែរយើងបែបមនោសញ្ចេតនា អីចឹង រៀងពិបាកបន្តិច ផ្សំនឹងឈប់យូរផង ទើបដូច្នេះ"។ បែបនេះក្ដី ម្ចាស់ហាងលក់សម្ភារប្រើប្រាស់ក្នុងព្រះពុទ្ធសាសនារូបនេះ អះអាងថា នឹងខិតខំហាត់ពុត ក៏ដូចជាដុះខាត់លើការប្រើប្រាស់ដង្ហើមនេះឲ្យបានល្អជាងមុនសម្រាប់បទក្រោយៗទៀត។
អ្នកនាង ស៊ិន ឧត្ដមផល្លា បានឈប់ពីសិល្បៈប្រមាណជិត២០មកហើយ គឺចាប់តាំងពីអំឡុងឆ្នាំ ២០០៤ ម្ល៉េះបន្ទាប់ពីបានរៀបការមានស្វាមី និងកូនត្រូវមើលថែរួចមក។ ប៉ុន្តែមួយរយៈក្រោយនេះ គេឃើញអ្នកនាងចាប់ផ្ដើមមានសកម្មភាពលើបណ្ដាញសង្គមដូចជាការខិតខំប្រមូលឯកសារពាក់ព័ន្ធនឹងសិល្បករចាស់ៗទុក រួមទាំងការច្រៀងលេងកម្សាន្តបង្ហោះផង។
ដោយសារតែបែបនោះហើយ ទើបត្រូវផលិតកម្មខាងលើទាក់ទង បន្ទាប់ពីដឹងពីទឹកដមសំឡេង ខណៈសាមីខ្លួន អះអាងថា មិនដែលគិតទាល់តែសោះថានឹងវិលមកវិញដោយសារតែសព្វថ្ងៃអ្នកនាងមានជំនួញរឹងមួយរួចទៅហើយ ដែលអាចឲ្យអ្នកនាងរស់បានយ៉ាងស្រួល បើទោះមិនចាំបាច់រវល់នឹងសិល្បៈ។
យ៉ាងណា ក្រោយការពិចារណា និងមិនចង់ឲ្យឱកាសកន្លងផុត អ្នកនាង ស៊ិន ឧត្តមផល្លា ក៏យល់ព្រម។ ក្រោយបានចេញបទចម្រៀងទី១ ផលិតកម្មបាន និងកំពុងត្រៀមចេញវីដេអូចម្រៀង។ "ចូលសិល្បៈវិញលើកហ្នឹងលូកអោយកប់ហ្មងទៅ ព្រោះបានជាជ្រុលដំណើរហើយលូកអោយណាណី(សើច)!។ ស៊ិន ឧត្តមផល្លា ថ្លែង។
មិនត្រឹមវិលចូលសិល្បៈវិញចាប់អាជីពចម្រៀងទេ ប៉ុន្តែតារាចម្រៀងស្រីរូបនេះ ត្រៀមនឹងពង្រីកអាជីពដោយការទទួលច្រៀងក្នុងកម្មវិធីផ្សេងៗ រួមទាំងសម្ដែងភាពយន្តទៀតផង ប្រសិនបើបងប្អូន ឬផលិតករណាត្រូវការ៕