ទំនាយអំពីហេតុភេទប្រចាំឆ្នាំ នៃទេវតាឆ្នាំថ្មីព្រះនាមកិមិរាទេវី

2017-03-21 01:48:10
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមជំនឿរបស់ប្រជាជនខ្មែរ តែងមានជំនឿទៅលើការទស្សន៍ទាយ អំពីហេតុភេទនានា ក្នុងស្រុកទេសតាមរយៈការទស្សន៍ទាយពីហោរាផ្សេងៗ។ តាមមហាសង្ក្រាន្ត ទេវតាឆ្នាំថ្មី ឆ្នាំរកានេះ សង្ក្រាន្តនឹងចូលមកដល់ថ្ងៃសុក្រ ៣រោច ខែចែត្រ ត្រូវនឹងថ្ងៃទី ១៤ ខែមេសា ឆ្នាំ ២០១៧ នាវេលាម៉ោង ០៣:១២នាទី។ ចំពោះទេវតាឆ្នាំថ្មីនេះ ព្រះនាម កិមិរាទេវី ជាបុត្រីទី៦នៃកបិលមហាព្រហ្មទ្រង់សោយចេកណាំវ៉ា ជាអាហារ ហើយទ្រង់គង់ផ្ទំបិទព្រះនេត្រលើខ្នង មហឹង្សា (ក្របី) ជាពាហនៈ ចំណែកឯព្រះហស្តស្ដាំទ្រង់កាន់ព្រះខ័ន្ធ រីឯព្រះហស្តឆ្វេងទ្រង់កាន់ពិណ។

តាមរយៈសៀវភៅមហាសង្ក្រាន្ត ដែលរៀបរៀងដោយឯកឧត្ដម អ៊ឹម បុរន្ទិ អគ្គលេខាធិការរង គណៈកម្មការជាតិរៀបចំបុណ្យជាតិ និងអន្តរជាតិ គណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានបង្ហាញអំពីទំនាយនៃទេវតាឆ្នាំថ្មីដូចខាងក្រោម៖

១. ទំនាយទឹកភ្លៀង៖ ឆ្នាំនេះ ភពអង្គារជាអធិបតី ដឹកនាំផ្លូវទឹកទៅសុំទឹកភ្លៀងពីស្ដេចនាគ ហើយនាគបានបង្អុរទឹកភ្លៀង ៣០០មេ។ ដូច្នេះហើយនៅជម្ពូទ្វីបមនុស្សលោក នឹងបណ្ដាលឱ្យមានទឹកភ្លៀងតិចនៅដើមឆ្នាំ កណ្ដាលឆ្នាំភ្លៀងមធ្យម និងចុងឆ្នាំភ្លៀងច្រើន។

២. ទំនាយខ្យល់៖ ទំនាយទាយថា ក្នុងឆ្នាំនេះមិនត្រជាក់មិនក្ដៅ មានខ្យល់ព្យុះខ្លាំងៗជាច្រើន ហើយអាចកើតហេតុល្អ ឬអាក្រក់អំពីខ្យល់។

៣. ទំនាយទឹកទន្លេ៖ ឆ្នាំនេះទំនាយទឹកទន្លេមានសំណល់សូន្យ។ ដូច្នេះទំនាយទាយថា ទន្លេ បឹងបួរ នឹងមានទឹកជំនន់ដោយទឹកភ្លៀងមានចំនួនច្រើនណាស់ ច្រើនលើសអស់ឆ្នាំទាំងពួង។

៤. ទំនាយភោគផលរបស់កសិករ៖ ឆ្នាំនេះមានកេណ្ឌ(៥) មានឈ្មោះថា វិបត្តិ ទំនាយថា ស្រូវសំណាប នឹងកើតមានរោគចង្រៃ ដង្កូវ ក្រា សត្វល្អិតបំផ្លាញ និងបានផលពាក់កណ្ដាល ខូចខាតពាក់កណ្ដាល ភោជនាហារ បានផលជាមធ្យម។ ស្រុកទេសអាចនឹងមានកលិយុគសង្គ្រាម ប្រជានុរាស្ត្ររស់បានសុខខ្លះ មិនបានសុខខ្លះ។

៥. ទំនាយការធ្វើស្រែ៖ ទំនាយទាយថា ស្រែទំនាបនិងស្រែដីទួលគ្រប់ទីកន្លែងនឹងទទួលបានផលល្អ ដូចគ្នាទាំងពីយ៉ាង។ ប៉ុន្តែបងប្អូនត្រូវប្រុងប្រយ័ត្នសត្វល្អិតចង្រៃដែលអាចមកបំផ្លាញ ភោគផលទាំងនោះបាន។

៦. ទំនាយពីព្រះអាទិត្យ៖ ឆ្នាំនេះយានជំនិះរបស់ព្រះអាទិត្យ គឺសត្វដំរី ទំនាយទាយថា ភ្លើងកាចសាហាវស្រុកនាមនាគ ធ្វើយុទ្ធសង្គ្រាម និងស្រុកនាមគ្រុឌនិងនាមកណ្ដុរ៕

អត្ថបទ៖ វឌ្ឍនៈ