ក្មេងប្រុស១៤ឆ្នាំ ត្រូវសាកលវិទ្យាល័យជួលឲ្យបង្រៀនគណិតវិទ្យាដល់សិស្សធំៗ

2017-03-21 09:10:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងប្រុសជនជាតិអង់គ្លេសម្នាក់ ត្រូវគេជឿថាជាមនុស្សខួរក្បាលពូកែចងចាំបំផុតក្នុងចំណោមប្រជាជនទាំងអស់ ព្រោះត្រូវបានសាកលវិទ្យាល័យមួយជួលឲ្យទៅបង្រៀនបូកលេខដល់ក្រុមនិស្សិត។

Yasha Asley មានអាយុ ១៤ឆ្នាំ ត្រូវបានសាកលវិទ្យាល័យ University of Leicester ហៅឲ្យមកបង្រៀនសិស្សធំៗ ខណៈពេលកំពុងរៀនថ្នាក់បរិញ្ញាបត្រនៅឡើយ។ Yasha ត្រូវបានគេសម្ភាសន៍ និងផ្ដល់ការងារឲ្យចាប់តាំងពីនៅអាយុ ១៣ឆ្នាំ ដោយយកឈ្នះបេក្ខជនដាក់ពាក្យជាមនុស្សធំៗជាច្រើននាក់ផ្សេងទៀត។

បន្ទាប់ពី Yasha បានសម្ភាសន៍ជាប់ អ្នកគ្រប់គ្រងត្រូវធ្វើពាក្យស្នើសុំដល់ក្រុមប្រឹក្សាក្រុង Leicester ទៀតដើម្បីទទួលការអនុញ្ញាតពិសេសឲ្យធ្វើការព្រោះគេនៅក្មេងពេក។ Yasha បានក្លាយជានិស្សិតក្មេងបំផុត ហើយជាបុគ្គលិកប្រចាំសាលាក្មេងបំផុតមិនធ្លាប់មានពីមុនមក។

Yasha និយាយទាំងរំភើបរីករាយថា "ការបង្រៀននៅទីនេះ ជាឆ្នាំល្អបំផុតក្នុងជីវិតរបស់ខ្ញុំ។ ខ្ញុំស្រលាញ់ការចូលរៀនថ្នាក់សាកលវិទ្យាល័យ និងស្រលាញ់ការងារថ្មីរបស់ខ្ញុំដែលអាចជួយសិស្សជាច្រើនទៀតផង។"

Yasha ត្រូវបានគេដាក់ឈ្មោះជាមនុស្សខួរក្បាលម៉ាស៊ីនគិតលេខ ឬ Human Calculator ។ ឆ្នាំនេះជាឆ្នាំបញ្ចប់ការសិក្សា និងគេគ្រោងបន្តថ្នាក់បណ្ឌិត (Phd) ថែមទៀតពេលបញ្ចប់វគ្គផ្សេងៗ។

ក្មេងប្រុសដ៏មានទេពកោសល្យខាងលើ បានចូលរៀនថ្នាក់បឋមសិក្សា មុនពេលគេឈ្នះការប្រកួតចូលរៀនគណិតវិទ្យានៅសាកលវិទ្យាល័យពេលអាយុ ១២ឆ្នាំ ក្នុងឆ្នាំ ២០១៤។ Yasha ជាក្មេងដំបូងគេក្នុងលោកដែលរកបាននិទ្ទេស A មុខវិជ្ជាគណិតវិទ្យា កម្រិត A ជាមួយពិន្ទុ ១០០% និង៩៩% នៃ២វិញ្ញាសាក្នុងចំណោមទាំងអស់ ៦ នៅអាយុ ៨ឆ្នាំ។

លើសពីនេះ គេបានជាប់កម្រិត A លើមុខវិជ្ជាគណិតវិទ្យា និងស្ថិតិកាលអាយុ ៩ និង១០ឆ្នាំ។ Yasha បានបញ្ចប់ថ្នាក់បឋមសិក្សានៅអាយុ ៦ឆ្នាំ និងផ្លោះចូលសាកលវិទ្យាល័យតែម្ដង។ ចំណែកការធ្វើដំណើរមកបង្រៀនទៀតសោត គឺឪពុកគេជាអ្នកបើករថយន្តជូនទៅមកសាលារៀងរាល់ថ្ងៃ៕