ពេជ្រ ម្ទេសខ្មាំង ត្រៀមស្នៀតរួចហើយដើម្បីជួបជើងខ្លាំងថៃវគ្គផ្តាច់ព្រ័ត្រអាទិត្យនេះ
- 2017-03-25 01:56:00
- ចំនួនមតិ 0 | ចំនួនចែករំលែក 0
ពេជ្រ ម្ទេសខ្មាំង ត្រៀមស្នៀតរួចហើយដើម្បីជួបជើងខ្លាំងថៃវគ្គផ្តាច់ព្រ័ត្រអាទិត្យនេះ
ចន្លោះមិនឃើញ
អ្នកប្រដាល់វ័យក្មេងនិងមានសមត្ថភាព ពេជ្រ ម្ទេសខ្លាំង ខំប្រឹងប្រែងហ្វឹកហាត់នឹងត្រៀមខ្លួនរួមហើយសម្រាប់ការប្រកួតនៅវគ្គផ្ដាច់ព្រ័ត្រខ្សែក្រវាត់សមរភូមិអ្នកប្រយុទ្ធនៅថ្ងៃអាទិត្យចុងសប្ដាហ៍នេះ។
កីឡាករ ពេជ្រ ម្ទេសខ្មាំង បានឲ្យដឹងកាលពីព្រឹកមិញថ្ងៃទី២២ ខែមីនា ឆ្នាំ២០១៧នេះថា នៅពេលដែលចាប់អាជីពជាអ្នកប្រដាល់នេះមក គេមានក្ដីស្រមៃមួយគឺចង់បានខ្សែក្រវាត់គ្រងដូចរៀមច្បងដទៃទៀតដែរ។ សម្រាប់ការប្រកួតនៅវគ្គផ្ដាច់ព្រ័ត្រជាមួយកីឡាករថៃ (ផេតងិនថង) ថ្ងៃអាទិត្យទី២៦ ខែមីនាខាងមុខនេះ គេបានត្រៀមរួចរាល់ ទាំងកម្លាំងស៊ុហ្វ ក្បាច់ប្រកួតផងដែរ។
ជើងខ្លាំងនិងជាអ្នកជម្រើសជាតិប្រដាល់សកលរូបនេះបន្ថែមទៀតថា បើតាមការជួបប្រកួតជាមួយអ្នកលេងឆ្លងដែនរូបនេះកន្លងមក មើលឃើញថាក្បាច់ដែលល្អរបស់ ផេតងិនថងម្នាក់នេះ ល្អវ៉ៃជង្គង់និងទាត់ធ្ងន់។ តែចំពោះ ពេជ្រ ម្ទេសខ្មាំង វិញបានត្រៀមក្បាច់ដើម្បីតបតរួចអស់ហើយ បច្ចុប្បន្ននេះទៀត គេមើលឃើញថាសមត្ថភាពក៏មានការរីកចម្រើនខ្លាំងដែរ បន្ទាប់ពីចូលហ្វឹកហាត់ជាមួយកីឡាករជម្រើសជាតិដទៃទៀតនិងជាពិសេសមានគ្រូជម្រើសជាតិលោក អេ ភូថង ជួយបង្វឹកថែមទៀត។
នេះជាលើកទី២ហើយសម្រាប់ការប្រកួតកម្មវិធីខ្សែក្រវាត់របស់ ពេជ្រ ម្ទេសខ្មាំង ខណៈលើកទី១នោះកីឡាកររូបនេះបានត្រឹមលេខ៣ប៉ុណ្ណោះកាលពីឆ្នាំ២០១២កន្លងទៅ។ ការជួបប្រកួតជាមួយ ផេតងិនថង នេះជាលើកទី៣ហើយ ដោយលើកទី១ ម្ទេសខ្មាំងចាញ់ដោយពិន្ទុនៅសង្វៀនអាស៊ីអាគ្នេយ៍ និងលើកទី២ គេឈ្នះលើកីឡាករថៃវិញដោយផ្ដួលឲ្យក្នុងទឹកទី៣ នៅសង្វៀនអប្សរាកំបូល៕