គ្រូកម្ពុជា និយាយពីទម្រង់លេងរបស់ វឌ្ឍនាកា ក្រោយទៅជប៉ុន
- 2017-03-23 23:04:00
- ចំនួនមតិ 0 | ចំនួនចែករំលែក 0
គ្រូកម្ពុជា និយាយពីទម្រង់លេងរបស់ វឌ្ឍនាកា ក្រោយទៅជប៉ុន
ចន្លោះមិនឃើញ
លោក Leonardo Vitorino គ្រូបង្វឹកក្រុមជម្រើសជាតិកម្ពុជានិយាយពីសមត្ថភាពរបស់ ចាន់ វឌ្ឍនាកា បង្ហាញលើទីលានចាញ់ឥណ្ឌា៣-២ក្នុងជំនួបមិត្តភាពអន្តរជាតិ CLEAR យប់មិញ ក្រោយខ្សែប្រយុទ្ធឆ្នើមរបស់កម្ពុជារូបនេះទៅលេងឲ្យក្លឹប Fujieda MYFC នៃលីគលំដាប់ទី៣របស់ជប៉ុន។
ខ្សែប្រយុទ្ធវ័យ២២ឆ្នាំរបស់កម្ពុជា ចាន់ វឌ្ឍនាកា មិនទាន់បានបង្ហាញខ្លួនលើទីលានជាមួយក្រុម Fujieda MYFC បានមួយប្រកួតឡើយ ខណៈដែលកម្មវិធីប្រកួតក្នុងលីគរបស់ក្លឹបលំដាប់ទី៣ជប៉ុនមួយនេះឆ្លងកាត់ពីរប្រកួតរួចរាល់។ ទាក់ទិនការមិនបានបង្ហាញខ្លួនលើទីលាននៅទឹកដីជប៉ុនរបស់ វឌ្ឍនាកា លោក Leonardo មើលឃើញថា ខ្សែប្រយុទ្ធរបស់កម្ពុជារូបនេះកំពុងមានបញ្ហាកម្លាំងធ្លាក់ចុះ។
គ្រូបង្វឹកសញ្ជាតិប្រេស៊ីលរូបនេះ បង្ហើបមូលហេតុដាក់ខ្សែប្រយុទ្ធមានដើមកំណើតមកពីខេត្តកំពតខាងលើឲ្យលេងតាំងពីវគ្គទី១រហូតពាក់កណ្ដាលវគ្គទី២ក្នុងជំនួបចាញ់ឥណ្ឌាកាលពីយប់នេះគឺដោយសារចង់ឲ្យរូបគេមានកម្លាំងឡើងវិញ។ លោកថាធ្វើបែបនេះឲ្យអតីតខ្សែប្រយុទ្ធ វឌ្ឍនាកា មានការត្រៀមខ្លួនឲ្យបានល្អ ប្រមូលកម្លាំងឲ្យបានខ្លាំងដូចពីមុន ដើម្បីត្រៀមបង្ហាញសមត្ថភាពជាមួយក្រុមហ្សកដានីនាសប្ដាហ៍ក្រោយ។
លោកបន្ថែមថា ពេលនេះ វឌ្ឍនាកា និងកូនក្រុមទាំងអស់រួមទាំងលោកជាគ្រូបង្វឹកបានត្រៀមខ្លួនរួចរាល់ក្នុងការតទល់ជាមួយក្រុមខ្លាំង ហ្សកដានី។ ក្រុមកម្ពុជារួមទាំងអតីតខ្សែប្រយុទ្ធបឹងកេតបានធ្វើដំណើរជាមួយគ្នាទៅប្រទេស ហ្សកដានី ម៉ោង ១០:៣០នាទីព្រឹកនេះ ដើម្បីត្រៀមជួបប្រទេសមួយនេះនាថ្ងៃទី២៨ ខែមីនា ឆ្នាំ២០១៧៕