Samsung កម្ពុជា ប្រកាសប្រមូល Galaxy Note 7 ដូរឲ្យលុយវិញ ត្រឹមថ្ងៃទី៣១ មីនា នេះ

2017-03-23 12:26:36
ចំនួនមតិ 0 | ចំនួនចែករំលែក 0

ចន្លោះមិនឃើញ

Samsung ប្រកាសជូនដំណឹងសាជាថ្មីម្តងទៀតដល់អតិថិជន Galaxy Note7 ទាំងអស់ថា កម្មវិធីប្តូរ Galaxy Note 7 យកទឹកប្រាក់វិញ នឹងបន្តត្រឹមថ្ងៃទី៣១ ខែមីនាខាងមុខនេះតែប៉ុណ្ណោះ។

នៅកម្ពុជា អតិថិជន Galaxy Note7 អាចយកទូរសព្ទមកប្តូរយកទឹកប្រាក់ដែលខ្លួនបានទិញ។

កម្មវិធីនេះនឹងបន្តត្រឹមថ្ងៃទី៣១ មីនា ២០១៧ នេះប៉ុណ្ណោះ នៅគ្រប់ហាងដែលនាំចូលផលិតផល Samsung ផ្លូវការនៅកម្ពុជា៖

សម្រាប់អតិថិជនដែលបានទិញពីហាង Apsara, KLD ឬ Nika ដែលជាអ្នកនាំចូលផលិតផល Samsung ផ្លូវការ សូមទៅកាន់ហាង KLD ទល់មុខអគារភ្នំពេញថៅវើ ហាង Apsara នៅជិតផ្សារដេប៉ូ ឬហាង Nika ជិតស្តុបបូកគោ។
សម្រាប់អតិថិជនដែលមិនបានទិញពីហាង Apsara, KLD ឬ Nika សូមទៅកាន់ហាងដែលអ្នកបានទិញដើម្បីទទួលបានការសម្របសម្រួលពីហាងទាំងនោះសម្រាប់កម្មវិធីនេះ។

Samsung សូមអភ័យទោសដោយស្មោះចំពោះការលំបាកដល់អតិថិជន និងដៃគូនានា ហើយក្រុមហ៊ុនសូមលើកទឹកចិត្តដល់អតិថិជន Galaxy Note7 ទាំងអស់ចូលរួមកម្មវិធីនេះ។

ដើម្បីសុវត្ថិភាពរបស់អតិថិជន Samsung បានឈប់លក់ និងដូរ ព្រមទាំងសម្រេចឈប់ផលិត Galaxy Note7 តែម្តង។ អតិថិជនទាំងអស់ដែលកំពុងប្រើប្រាស់ទាំង Galaxy Note 7 ចាស់ និង Galaxy Note 7 ដែលបានដូរថ្មី គួរបិទទូរសព្ទ និងឈប់ប្រើប្រាស់បន្ត ហើយទទួលយកអត្ថប្រយោជន៍ពីកាដូយកទូរសព្ទ Samsung ថ្មីជាមួយទឹកប្រាក់បន្ថែម ឬប្តូរយកទឹកប្រាក់វិញ៕

ដោយ៖ សុផាត