មិនចង់ចេញមុខ អ្នកត្រួសត្រាយនាំអក្សរខ្មែរដាក់លើ iOS សុំត្រឹមអក្សរជាតិប្រើប្រាស់ទូលំទូលាយបានហើយ

2017-03-24 09:11:49
ចំនួនមតិ 0 | ចំនួនចែករំលែក 0

ចន្លោះមិនឃើញ

4KhmeriPhone ជាក្រុមត្រួសត្រាយស្នើដាក់បញ្ចូលពុម្ពអក្សរខ្មែរលើប្រព័ន្ធ iOS តែមិនដែលបង្ហាញខ្លួនឲ្យអ្នកប្រើប្រាស់ នៅកម្ពុជាបានឃើញមុខឡើយ។ រាល់ពេលក្រុមការងារទាក់ទងទៅ 4Khmeriphone គឺបានត្រឹមឆ្លើយឆ្លងតាមទូរសព្ទនិងបណ្ដាញសង្គមប៉ុណ្ណោះ សូម្បីទំព័រហ្វេសប៊ុកក៏មិនដាក់រូបផ្ទាល់ខ្លួនដែរ។

បើនិយាយពីការងារ កន្លងទៅក្រុមនេះបានព្យាយាមយ៉ាងសស្រាក់សស្រាំតទល់នឹង Apple ទាំងតាមរយៈ Skype និងសារអេឡិចត្រូនិក ដើម្បីធ្វើយ៉ាងណាឲ្យពុម្ពអក្សរខ្មែរ ត្រឹមត្រូវពេញលេញលែងមានកំហុសបាត់ដៃបាត់ជើងដូចប៉ុន្មានឆ្នាំកន្លងទៅ។

ប្រធានក្រុម 4Khmeriphone ធ្លាប់បញ្ជាក់ថា ក្រុមលោកតែងសហការយ៉ាងជិតស្និទ្ធជាមួយក្រុមហ៊ុនជំនាញពុម្ពអក្សរនៅម៉ាឡេស៊ី ក្នុងការដោះស្រាយពេលពុម្ពអក្សរខ្មែរលើប្រព័ន្ធ iOS ម្តងៗ។ ជាក់ស្ដែងកាលពីខែសីហាឆ្នាំ ២០១៦ ក្រុមនេះបានសហការជាមួយក្រុមហ៊ុនជំនាញពុម្ពអក្សរខាងលើ ដោះស្រាយបញ្ហាអក្សរខ្មែរបាត់ដៃបាត់ជើង រហូតជោគជ័យ ១០០ ភាគរយលើ iOS 10 Beta 5 ហើយប្រើស្រួលដល់សព្វថ្ងៃ។

សារឆ្លើយឆ្លងរវាង 4Khmeriphoneteam និង ក្រុមការងារ Apple

ប្រធានក្រុមខាងលើ អះអាងថា ដំណើរការក្នុងការស្នើឲ្យ Apple ពិនិត្យនិងកែសម្រួលពីកំហុសអក្សរលើ iOS ត្រូវចំណាយពេលយូរគួរសម។ ក្រុមលោកត្រូវសហការជាមួយក្រុមហ៊ុនទទួលខុសត្រូវខាងផ្នែករៀបចំទម្រង់ Font សម្រាប់ Apple នៅម៉ាឡេស៊ីនេះ ហើយបញ្ជូនទម្រង់អក្សរត្រឹមត្រូវទៅក្រុមហ៊ុន Apple។ ឧទាហរណ៍ពាក្យ "ខ្ញុំ កម្ពុជា បញ្ញា កញ្ញា ក្នុង ឡុង សង្គ្រាម" ជាដើម ជើងតម្រួតលែងបាត់ឬជាន់គ្នារហូតដល់បច្ចុប្បន្ន។

ប្រធានក្រុម 4KhmeriPhone បន្ថែមថា ក្រុមលោកនឹងព្យាយាមសហការជាមួយក្រុមហ៊ុន Apple តទៅទៀត ក្នុងការនាំអក្សរខ្មែរពិសេសក្ដារចុចត្រឹមត្រូវពេញលក្ខណៈ ដើម្បីផ្ដល់ភាពងាយស្រួលដល់ពលរដ្ឋខ្មែរក្នុងការប្រើប្រាស់ពេលអនាគត។ ប្រធានក្រុមរូបនេះថា ទោះជាហត់នឿយនិងមិនបង្ហាញមុខឲ្យមហាជនស្គាល់យ៉ាងណាក៏មិនថ្វី សុំត្រឹមតែបានឃើញអក្សរជាតិខ្មែរ ប្រើប្រាស់បានត្រឹមត្រូវ នោះលោកអស់ចិត្តហើយ៕

អត្ថបទ៖ ផាន់និត