Ronaldo ស៊ុត១គ្រាប់តែព័រទុយហ្គាល់ចាញ់ ២-៣

2017-03-29 02:06:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជើងឯកទ្វីបអឺរ៉ុប ព័រទុយហ្គាល់ បានចាញ់ ជម្រើសជាតិស៊ុយអែតនៅទឹកដីខ្លួនឯង ២-៣ ក្នុងការប្រកួតមិត្តភាពអន្តរជាតិកាលពីយប់មិញ។

ការប្រកួតដែលធ្វើនៅទឹកដីកំណើតរបស់ Ronaldo ផ្ទាល់ ប្រធានក្រុមវ័យ៣២ឆ្នាំរូបនេះបានស៊ុតគ្រាប់បើកឆាកបាន១គ្រាប់មុននៅនាទី ១២ ជាការលើកបាល់ឲ្យពីមិត្តរួមក្រុមពីស្លាបខាងស្ដាំ។ លុះដល់នាទី ៣៤ អ្នកចាំទី Granqvist របស់ស៊ុយអែតភ្លាត់ស្នៀតចូលទីខ្លួនឯងធ្វើឲ្យព័រទុយហ្គាល់នាំមុខ ២-០។

ស្ថានការណ៍បានប្រែប្រួលក្នុងវគ្គទីពីរ ពោលគឺស៊ុយអែតលេងបានល្អជាងក្រុមម្ចាស់ផ្ទះ ហើយ Claesson ស៊ុតតាមបាន១ គ្រាប់ វិញនៅនាទី ៥៧ មុនពេលដែលខ្សែបម្រើរូបនេះទាត់បាន១គ្រាប់ទៀតនៅនាទី ៧៦ ពីការបញ្ជូនបាល់ជ្រុងឲ្យពីមិត្តរួមក្រុម។

រៀបនឹងចប់ការប្រកួត កីឡាករស៊ុយអែតបានអូសបាល់ពីស្លាបឆ្វេងចូលប្រអប់គ្រោះថ្នាក់ រួចទាត់ទៅបុកជើង ខ្សែការពារ Cancelo របស់ព័រទុយហ្គាល់ចូលទីបាន១គ្រាប់ទៀត នឹងជាគ្រាប់ជ័យជម្នះក្នុងការប្រកួត។ បរាជ័យរបស់ព័រទុយហ្គាល់កើតឡើងមួយថ្ងៃមុនពេលអាជ្ញាធរសម្រេចប្ដូរឈ្មោះប្រលានយន្តហោះនៅទីក្រុង Madeira ទៅជាឈ្មោះ Ronaldo វិញ៕

ប្រភព៖ BBC ប្រែសម្រួល៖ វីរ័ត្ន