មកស្គាល់យុវតីខ្មែរវ័យក្មេងទាំង ៤រូបសុទ្ធតែជានិស្សិតឆ្នើមចែករំលែកបទពិសោធន៍រៀងខ្លួន
- 2017-03-30 07:40:01
- ចំនួនមតិ 0 | ចំនួនចែករំលែក 0
មកស្គាល់យុវតីខ្មែរវ័យក្មេងទាំង ៤រូបសុទ្ធតែជានិស្សិតឆ្នើមចែករំលែកបទពិសោធន៍រៀងខ្លួន
ចន្លោះមិនឃើញ
ដើម្បីក្លាយជាបុគ្គលជោគជ័យក្នុងជីវិត គឺត្រូវផ្ដើមចេញពីខ្លួនឯងជាមុនសិន ហើយដើម្បីឈានទៅរកភាពជោគជ័យទាំងនោះក៏ត្រូវផ្ដើមចេញពីការសិក្សាដែរ។ ចំពោះការសិក្សាដើម្បីក្លាយជាសិស្សឆ្នើម និស្សិតឆ្នើម មិនមែនជារឿងងាយស្រួលនោះទេ។ ដោយឡែកយុវតីវ័យក្មេង ៤រូបខាងក្រោមនេះសុទ្ធតែជានិស្សិតឆ្នើម ហើយមួយចំនួនធ្លាប់បានអាហារូបករណ៍ទៅសិក្សានៅក្រៅប្រទេសទៀតផង។ ខាងក្រោមនេះជាបទពិសោធន៍ផ្ទាល់ខ្លួនរបស់យុវតីឆ្នើមទាំង ៤រូប៖
១. ណារ៉ា សុខេមា
យុវតីវ័យក្មេង ណារ៉ា សុខេមា បានបញ្ចប់ការសិក្សាថ្នាក់អនុបណ្ឌិត ផ្នែកអភិវឌ្ឍអន្តរជាតិ នៅសាកលវិទ្យាល័យ មេនឆេស្ទ័រ ដ៏ល្បីមួយក្នុងប្រទេសអង់គ្លេស បច្ចុប្បន្នជាសាស្ត្រាចារ្យនៅសាកលវិទ្យាល័យ និងមានការងារជាច្រើនកន្លែង ធ្លាប់បានទៅក្រៅប្រទេសរហូត ៤៦ប្រទេសឯណោះ។ ភាគច្រើនកញ្ញាទៅប្រទេសទាំងនោះ គឺតាមរយៈអាហារូបករណ៍ និងកម្មវិធីផ្លាស់ប្ដូរការសិក្សារយៈពេលខ្លី មានដូចជា អង់គ្លេស សហរដ្ឋអាមេរិក បារាំង ជាដើម។
ណារ៉ា សុខេមា ក៏បានចែករំលែកបទពិសោធន៍ ដើម្បីបានអាហារូបករណ៍ទៅក្រៅប្រទេសផងដែរដូចជា ឧស្សាហ៍ដាក់ពាក្យនៅពេលដែលគេប្រកាសជ្រើសរើសម្ដងៗដាក់ហើយដាក់ទៀតកុំចុះចាញ់។ ក្រៅពីនោះ ត្រូវពូកែផ្នែកភាសាអង់គ្លេស ជាសិស្សពូកែក្នុងសាលា ការចូលរួមការងារក្នុងសង្គម ស្គាល់ខ្លួនឯងឱ្យច្បាស់ ភាពជាអ្នកដឹកនាំ ការបំពេញ Personal statement ពេលសម្ភាស សុទ្ធតែជាចំណុចមិនអាចខ្វះបាន។
២.ឡាំ សុវណ្ណី
ដោយឡែក និស្សិតឆ្នើម ឡាំ សុវណ្ណី ដែលជិតបញ្ចប់ការសិក្សាជំនាញ ទំនាក់ទំនងអន្តរជាតិនៅសាកលវិទ្យាល័យបញ្ញាសាស្ត្រកម្ពុជា តែងជាប់លំដាប់ពិន្ទុ Aគ្រប់ឆមាសរយៈពេល៤ឆ្នាំនៅក្នុងការសិក្សា។ យុវតីឆ្នើមរូបនេះក៏ធ្លាប់បានចូលរួមកម្មវិធីប្រជុំធំៗនៅក្រៅប្រទេសក្នុងតំបន់អាស៊ានផងដែរដូចជា ប្រទេសថៃ ម៉ាឡេស៊ីជាដើម។
ដើម្បីក្លាយជានិស្សិតឆ្នើម សុវណ្ណី បានប្រាប់គន្លឹះមួយចំនួនដូចជា ខិតខំអានឱ្យបានច្រើន ចូលរួមរាល់សកម្មភាពរបស់ក្លឹបប្រចាំសាកលវិទ្យាល័យ ស្វែងរកនូវទីប្រឹក្សាអ្នកដែលមានចំណេះដឹងជាង រៀនកត់ចំណាំអ្វីដែលជាចំណុចសំខាន់របស់មេរៀន ត្រូវរំលឹកឡើងវិញនៅផ្ទះ ព្យាយាមយល់កុំព្យាយាមចាំ ជឿជាក់លើសមត្ថភាពខ្លួនឯង។ល។
៣.ស៊ាន ម៉ូនីតា
ចំពោះយុវតីវ័យក្មេង ស៊ាន ម៉ូនីតា គឺជាអតីតសិស្សនៅវិទ្យាល័យ សម្ដេចតេជោ ហ៊ុនសែនសួង កន្លងទៅថ្មីៗនេះបានប្រលងប្រជែងជាមួយនិស្សិតជាង១ពាន់នាក់រហូតជាប់អាហារូបករណ៍ក្រសួងអប់រំ ជប៉ុន( MEXT ឬ Monbukagakusho Scholarship )ទៅសិក្សាផ្នែកស្ថាបត្យកម្មនៅប្រទេសជប៉ុន ។ យុវតីឆ្នើមរូបនេះក៏បានចែករំលែកពីគន្លឹះមួយចំនួន ជាបទពិសោធរបស់កញ្ញាផ្ទាល់ទៅដល់អ្នកដែលមានចំណាប់អារម្មណ៍ចង់ប្រលងយកអាហារូបករណ៍ដូចជា ត្រូវរៀបរៀបចំគោលដៅឱ្យជាក់លាក់ សរសេរសកម្មភាពដែលខ្លួនត្រូវធ្វើ មានទំនាក់ទំនងជាមួយសិស្សច្បងមុនៗ ប្រឹងប្រែងអស់ពីសមត្ថភាព ។
៤. កុយ រតនៈម៉ូនិក
យុវតីវ័យក្មេងមួយរូបទៀត គឺ យុវតី កុយ រតនៈម៉ូនិក ធ្លាប់ប្រឡងយកពិន្ទុ IELTS ឫ International English Language Testing System ដែលមានលក្ខណៈស្តង់ដារអន្តរជាតិបានពិន្ទុខ្ពស់។ យុវតីរូបនេះ បានទទួលពិន្ទុពេញ៩.០ លើការប្រឡង ផ្នែកស្ដាប់ និង ពិន្ទុសរុបជាមធ្យម ៧.៥ ផងដែរ។ យុវតីអាយុ១៨ឆ្នាំរូបនេះបានប្រាប់ថា ក្នុងការប្រឡង IELTS គឺគេចែកចេញជា៤មុខសំខាន់គឺ ការស្ដាប់ ការអាន ការសរសេរ និង ការនិយាយ ដោយផ្នែកនីមួយៗមានពិន្ទុពេញ ៩.០ដូចគ្នា។ ក្នុងនោះ កញ្ញាធ្វើបានល្អជាងគេលើផ្នែកស្ដាប់(Listening)។
យុវតីមកពីភ្នំពេញរូបនេះបានចែករំលែកបទពិសោធន៍មួយចំនួនដូចជា ត្រូវមានមហិច្ឆតា ការត្រៀមខ្លូន និង ហ្វឹកហាត់ជាប្រចាំ។ បន្ថែមពីលើនេះទៀត ត្រូវរៀនពីវិញ្ញាសាមុនៗ អានសំណួរអោយយល់ជាមុន ការលើកទឹកចិត្ត ការតស៊ូ ប្រឹងប្រែង និងសុខភាព៕