កម្ពុជាទទួលជំនួយ និង កម្ចីការប្រាក់ទាបពីជប៉ុន១៤០លានដុល្លារ ដើម្បីអភិវឌ្ឍន៍វិស័យសំខាន់ៗចំនួន៤

2017-03-30 10:22:21
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅរសៀលថ្ងៃទី៣០ ខែមីនា ឆ្នាំ២០១៧នេះ រាជរដ្ឋាភិបាលកម្ពុជាបានចុះហត្ថលេខាក្នុងការទទួលជំនួយ និង កម្ចីការប្រាក់ទាបសរុបជាង ១៤០ លានដុល្លារបន្ថែមពីជប៉ុន ដើម្បីយកមកអភិវឌ្ឍន៍វិស័យសំខាន់ៗចំនួន៤ រួមមានការពារទឹកជំនន់ ការសាងសង់ផ្លូវ ការសង់មន្ទីរពេទ្យ និង ពង្រីកប្រព័ន្ធផ្គត់ផ្គង់ទឹកស្អាតក្នុងប្រទេសកម្ពុជា។

ពិធីនេះមានការចូលរួមជាអធិបតីភាពពីសំណាក់សម្ដេចតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ដោយមានពិធីចុះហត្ថលេខាប្រគល់ និង ទទួលនូវថវិកាទាំងអស់នេះ ដោយលោក ហូរីណូអ៊ុជិ ហ៊ីដេហ៊ីសា ឯកអគ្គរដ្ឋទូតជប៉ុនប្រចាំកម្ពុជា និង ឯកឧត្ដមទេសរដ្ឋមន្ត្រី ប្រាក់ សុខុន រដ្ឋមន្រ្តីក្រសួងការបរទេស និង សហប្រតិបត្តិការអន្តរជាតិ។

ថវិកាទាំងនោះរួមមាន៖

១) ហិរញ្ញប្រទានឥតសំណង ដែលមានទឹកប្រាក់សរុបចំនួន ៩៤៩,៩៧៣ ដុល្លារអាមេរិក សម្រាប់អនុវត្តគម្រោង«ធ្វើឱ្យប្រសើរឡើងនូវការការពារទឹកជំនន់ក្នុងរាជធានីភ្នំពេញ ដំណាក់កាលទី៤»។

២) ហិរញ្ញប្រទានឥតសំណង ដែលមានទឹកប្រាក់សរុបចំនួន ១២.៦៦លានដុល្លារ សម្រាប់អនុវត្តគម្រោង «ធ្វើឱ្យប្រសើរឡើងមន្ទីរពេទ្យបង្អែកខេត្តបាត់ដំបង»។

៣) ឥណទានសម្បទាន ដែលមានទឹកប្រាក់សរុបចំនួន ៩៨ លានដុល្លារអាមេរិក សម្រាប់អនុវត្តគម្រោង «ការធ្វើឱ្យប្រសើរឡើង នូវកំណាត់ផ្លូវជាតិលេខ៥ ភាគខាងជើង (ក្រុងបាត់ដំបង-ក្រុងសិរីសោភ័ណ) ជំហានទី២»។

៤) ហិរញ្ញប្បទានឥតសំណង ដែលមានទឹកប្រាក់សរុបចំនួន ២៨.៥ លានដុល្លារ សម្រាប់អនុវត្តគម្រោង «ពង្រីកប្រព័ន្ធផ្គត់ផ្គង់ទឹកស្អាតក្នុងខេត្តកំពង់ធំ»។

គម្រោងទាំង៤ខាងលើនេះ ត្រូវបានរាជរដ្ឋាភិបាលកម្ពុជា រំពឹងទុកថានឹងជួយកែលម្អដល់ការតភ្ជាប់តំបន់របស់កម្ពុជា ហើយក៏នឹងធ្វើឲ្យប្រសើរឡើងដល់ជីវភាពនិង ការថែរក្សាសុខភាពរបស់ប្រជាជនផងដែរ៕

ប្រែសម្រួល៖ ចន្ថា

ប្រភព៖ FB Page ផ្លូវការរបស់ សម្តេចតេជោ ហ៊ុន សែន