ក្រមុំរុស្សីស្រស់ស្អាត លង់ស្នេហ៍កំលោះកម្មករអណ្ដូងរ៉ែចិន ទោះគ្មានទ្រព្យអ្វីទាំងអស់

2017-04-02 07:25:48
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីប៉ុន្មានថ្ងៃថ្មីៗនេះគូស្នេហ៍ឆ្លងដែនមួយគូ បានធ្វើឲ្យមនុស្សមិនតិចទេរំជួលចិត្តមិននឹកស្មាន ក្រោយដឹងថាក្រមុំជនជាតិរុស្ស៊ីដ៏ស្រស់ស្អាតម្នាក់ លង់ស្នេហ៍កម្មករអណ្ដូងរ៉ែជនជាតិចិន រហូតឈានដល់រៀបការ។

នាង Sophia អាយុ ២២ឆ្នាំ បានមកបន្តការសិក្សា និងរស់នៅទីក្រុង Heihe ប្រទេសចិន រយៈពេលជាង ៥ឆ្នាំ ហើយអាចនិយាយភាសាចិនបានយ៉ាងល្អ។ Sophia បានជាប់ចិត្តស្រលាញ់វប្បធម៌ចិន ដូច្នេះនាងសម្រេចបន្តធ្វើការនៅទីក្រុង Heihe ជាជាងវិលត្រលប់ទៅមាតុប្រទេសវិញ ក្រោយបញ្ចប់ការសិក្សា។

នាងបានស្គាល់លោក Chen Jingyang រហូតដល់រៀបចំពិធីរៀបការតូចមួយដោយអញ្ជើញតែមិត្តភ័ក្ដិជិតស្និត និងគ្រួសារប៉ុណ្ណោះនៅសណ្ឋាគារមួយក្នុងទីក្រុង Heihe ខេត្ត Heilongjiang ប្រទេសចិន។

និយាយពីប្រវត្តិស្នេហាវិញ លោក Chen ជាកម្មករអណ្ដូងរ៉ែបានស្គាល់នាង Sophia ក្នុងឆ្នាំ ២០១៦ តាមរយៈមិត្តភ័ក្ដិម្នាក់ រួចបានទាក់ទងនាងតាមបណ្ដាញសង្គម WeChat។ នៅពេលណាដែលលោក Chen រួចដៃពីការងារ គាត់តែងតែចំណាយពេលវេលាទាំងអស់ផ្ញើសារឆ្លើយឆ្លងជាមួយនាង Sophia។

ស្គាល់ចិត្តគ្នាបានយូរបន្តិច លោកសម្រេចចិត្តសុំណាត់ជួបនាងខាងក្រៅតែម្ដង និងចាប់តាំងពីពេលនោះមក អ្នកទាំងពីរមិនអាចបែកគ្នាបានទេ។ ណាត់ជួបបានតែមួយអាទិត្យនាង Sophia បានទៅលេងដល់កន្លែងធ្វើការនៅអណ្ដូងរ៉ែរបស់លោក Chen។

ក្រោយមកនាងសម្រេចបោះបង់ការងាររបស់ខ្លួនទាំងអស់ ដើម្បីបង្កើនទំនាក់ទំនងស្នេហារបស់ពួកគេ។ រយៈពេល ២ខែ នាងបានទៅរួមរស់ជាមួយលោក Chen នៅកន្លែងស្នាក់នៅសម្រាប់កម្មករអណ្ដូងរ៉ែ ដោយមានបង្គន់ និងកន្លែងងូតទឹកក្រៅបន្ទប់ស្នាក់នៅ ហើយមិនសូវមានអនាម័យទេ។

នាងថាការរស់នៅទីនេះ គឺជាពេលវេលាដ៏លំបាកបំផុតក្នុងជីវិតរបស់នាង ប៉ុន្តែជាពេលវេលាសប្បាយបំផុត។ បន្ទាប់ពីស្គាល់គ្នាបានកន្លះឆ្នាំ លោក Chen បានសុំនាង Sophia រៀបការ រួចក៏ទទួលចម្លើយយល់ព្រម។

បច្ចុប្បន្នអ្នកទាំងពីរពុំមានឡាន ផ្ទះ ឬលុយកាក់សន្សំទុកនោះទេ ប៉ុន្តែនាង Sophia ថា ពួកគេមានទំនាក់ទំនងដ៏មានតម្លៃជាងរបស់ទាំងនេះទៅទៀត។ "ខ្ញុំជឿជាក់ថាស្នេហានេះ គឺជារឿងសំខាន់បំផុត។ យើងត្រូវប្រឹងប្រែងធ្វើការ យើងនឹងទទួលបានឡាន និងផ្ទះតាមក្រោយ។" នាងបញ្ជាក់។

ចំណែកលោក Chen បានឈប់ធ្វើការជាកម្មករអណ្ដូងរ៉ែ។ ក្នុងខែមេសានេះ ពួកគេគ្រោងធ្វើដំណើរទៅផ្ទះ Sophia ក្នុងប្រទេសរុស្ស៊ី ដើម្បីធ្វើពិធីរៀបការផ្លូវការតាមប្រពៃណី។ អនាគតពួកគេនឹងបើកជំនួញមួយនៅរុស្ស៊ីទៀតផង៕