ក្រុមជម្រើសជាតិ មានពេល៣ឆ្នាំហាត់នៅពហុកីឡដ្ឋានថ្មី ត្រៀមស៊ីហ្គេមឆ្នាំ២០២៣
- 2017-04-04 03:20:14
- ចំនួនមតិ 0 | ចំនួនចែករំលែក 0
ក្រុមជម្រើសជាតិ មានពេល៣ឆ្នាំហាត់នៅពហុកីឡដ្ឋានថ្មី ត្រៀមស៊ីហ្គេមឆ្នាំ២០២៣
ចន្លោះមិនឃើញ
ក្រុមបាល់ទាត់ជម្រើសជាតិកម្ពុជា នឹងមានពេលវេលាចំនួន៣ឆ្នាំ ក្នុងការហ្វឹកហាត់នៅពហុកីឡដ្ឋានមរតកតេជោសែន សម្រាប់ការត្រៀមខ្លួនចូលរួមប្រកួតព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
បើតាមប្រសាសន៍ឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានឲ្យដឹងក្នុងពិធីសែនក្រុងពាលីបើកការដ្ឋានសាងសង់ពហុកីឡដ្ឋានខាងលើថា ពហុកីឡដ្ឋានថ្មីនេះ នឹងរួចរាល់ត្រឹមចុងឆ្នាំ២០២០។ ចំណែកក្រុមជម្រើសជាតិ នឹងត្រូវទៅហ្វឹកហាត់នៅទីនោះចំនួន ៣ឆ្នាំគិតចាប់ពីពេលរួចរាល់រហូតដល់ព្រឹត្តិការណ៍ស៊ីហ្គេមមកដល់។
អគ្គលេខាធិការរូបនេះបន្តថា មិនត្រឹមប្រភេទកីឡាបាល់ទាត់នោះទេគឺគ្រប់ប្រភេទកីឡាតែម្ដង នឹងត្រូវទៅហ្វឹកហាត់នៅពហុកីឡដ្ឋានថ្មីនេះ ដើម្បីជាការសមទៅនឹងទីលានរបស់ខ្លួន។ ដោយឡែកប្រភេទកីឡាមួយចំនួនដែលបានធ្វើរួចរាល់ នឹងអាចប្រើប្រាស់បាន ចាប់ពីពេលដែលសម្ដេចប្រកាសបើកឲ្យប្រើប្រាស់នាថ្ងៃនេះតទៅ។
លោកបន្ថែមថា នាឆ្នាំក្រោយ នឹងមានកម្មវិធីប្រកួតព្រឹត្តិការណ៍អន្តរជាតិមួយចំនួននៅលើទឹកដីកម្ពុជា ដែលនឹងត្រូវធ្វើឡើងនៅ ពហុកីឡដ្ឋានមរតកតេជោសែនទាំងអស់។
ពហុកីឡដ្ឋានមរតកតេជោសែន (Main Stadium) បានប្រកាសបើកការដ្ឋានសាងសង់នៅព្រឹកនេះហើយ ដោយនេះគឺជាគម្រោងទី២ ដែលចំណាយលុយប្រហែល១៥៧លានដុល្លារ ខណៈដែលគម្រោងទី១ដែលសាងសង់អាងហែលទឹក កីឡាក្នុងសាល តារាងវាយកូនបាល់ តារាងបាល់ទះ នោះ គឺធ្វើរួចរាល់អស់ហើយ៕
សកម្មភាពសែនក្រុងពាលីម្សិលមិញ