ឪពុកយំឱបសពកូនភ្លោះស្លាប់ដោយសារអាវុធគីមីនៅស៊ីរី កំពុងធ្វើឲ្យពិភពលោករំជួលចិត្ត
- 2017-04-06 02:08:37
- ចំនួនមតិ 0 | ចំនួនចែករំលែក 0
ឪពុកយំឱបសពកូនភ្លោះស្លាប់ដោយសារអាវុធគីមីនៅស៊ីរី កំពុងធ្វើឲ្យពិភពលោករំជួលចិត្ត
ចន្លោះមិនឃើញ
រូបថតឪពុកជនជាតិស៊ីរីឱបសពកូនភ្លោះរបស់ខ្លួនជាប់ទ្រូង ដែលស្លាប់ដោយសារការវាយប្រហារអាវុធគីមីលើទីក្រុង Khan Sheikhoun ខេត្ត Idlib កាលពីថ្ងៃអង្គារ កំពុងធ្វើឲ្យពិភពលោកចាប់អារម្មណ៍ និងក្ដុកក្ដួលចិត្តជាខ្លាំង។
ឪពុកកំពុងជួបទុក្ខរូបនេះមានឈ្មោះ Abdul Hamid Youssef បានជំរុញឲ្យពិភពលោកក្រឡេកមើលកូនតូចៗរបស់គាត់ក្រោយវាយប្រហារគួរឲ្យរន្ធត់។ លោក Youssef បានបាត់បង់សាច់ញាតិបងប្អូនដល់ទៅ ១៩នាក់ រួមទាំងកូនភ្លោះពីរនាក់ និងប្រពន្ធផង ក្នុងការវាយប្រហារតាមអាកាសកាលពីព្រឹកថ្ងៃអង្គារកន្លងទៅ។
តួលេខបណ្ដោះអាសន្នមនុស្សចំនួន ៧២នាក់បានស្លាប់ មានកុមារ ១១នាក់ និងជាច្រើននាក់ផ្សេងទៀតរបួសដោយសារសារធាតុគីមីសារីន។ រូបថតគួរឲ្យសង្វេគនោះ គឺសពកូនភ្លោះអាយុ ៩ខែ មានស្រីមួយប្រុសមួយត្រូវបានឪពុករុំនឹងក្រណាត់សឱបយ៉ាងណែនកណ្ដាលមនុស្សមួយក្រុម។
ទាំងអ្នកស៊ើបការណ៍សម្ងាត់អាមេរិក និងកងកម្លាំងរបស់រុស្ស៊ីក្នុងប្រទេសស៊ីរី បានចោទប្រកាន់អំពើវាយប្រហារយង់ឃ្នងនេះជាស្នាដៃរបស់កងកម្លាំងរដ្ឋាភិបាលស៊ីរីលោកបាសា អាល់អាសាដ ចំពោះប្រជាជនខ្លួនឯង។
ចំណែកក្រុមឃ្លាំមើលសិទ្ធិមនុស្សស៊ីរីបានអះអាងថា សារធាតុគីមីដ៏សាហាវនេះត្រូវបានបាញ់ចេញពីយន្តហោះចម្បាំងយោធាស៊ីរី។ សារីន ជាសារធាតុរាវអាចធ្វើឲ្យប្រព័ន្ធប្រសាទមនុស្សឈឺចុកចាប់ខ្លាំងពេលស្រូបយកចំហាយរបស់វាខ្លាំង រយៈពេលពី ១ ទៅ ១០នាទីនឹងអាចស្លាប់៕