ការ​លេច​រូបរាង​ Galaxy S8/S8+ របស់​ Samsung ធ្វើ​ឲ្យ​ Apple ​​ត្រូវ​ភ័យ​ខ្លួន ​ដោយ​សារ​តែ​ត្រកូល​ S ជំនាន់​ថ្មី​មាន​ចំណុច​ខ្លាំង​ជា​ច្រើន​ដែល​ iPhone 8 ​អាច​ពិបាក​នឹង​ផ្ដួល។ ប៉ុន្តែ​យ៉ាងណា​បើ​​ iPhone 8 ចង់​ប្រជែង​នឹង​ S8/S8+ បាន​ ​លុះ​ត្រា​តែ​មាន​ចំណុច​ ២ ដូច​​ខាង​ក្រោម៖

១. ផ្ទៃ​អេក្រង់​ដែល​គ្មាន​គែម

ផ្នែក​ខាង​មុខ​​របស់​ S8/S8+ មាន​ផ្ទៃ​អេក្រង់​ ៨៣% ដែល​មើល​ទៅ​ពិត​ជា​ទាក់​ទាញ​ខ្លាំង ហើយ​​ Apple គួរ​តែ​ផលិត​ iPhone 8 មាន​ផ្ទៃ​អេក្រង់​ដែល​គ្មាន​គែម​តែ​ម្ដង​ទើប​អាច​ប្រជែង​គ្នា​បាន។ តាម​ពាក្យ​ចចាមអារ៉ាម​ឲ្យ​ដឹង​ថា​ឆ្នាំ​នេះ​ Apple បាន​ប្ដូរ​ប្រពៃណី​ពី​ការ​​​ប្រើ​អេក្រង់​ LCD មក​ប្រើ​អេក្រង់​ OLED មាន​រាង​កោង​វិញ​ម្ដង​សម្រាប់​ iPhone 8 ហើយ​ចចាមអារ៉ាម​ក៏​បាន​លើក​ឡើង​ពី​ការ​រចនា​អេក្រង់​ដែល​គ្មាន​គែម​ជុំវិញ​ផង​ដែរ។

២. ទ្រនាប់​ស្កេន​ក្រយៅ​ដៃ​បង្កប់​ក្រោម​អេក្រង់

ត្បិត​ថា​អេក្រង់​របស់​ S8 និង iPhone 8 អាច​នឹង​ស្រដៀង​គ្នា​ប៉ុន្តែ​ Apple អាច​ធ្វើ​ឲ្យ​អេក្រង់​កាន់​តែ​ពិសេស​តាម​រយៈ​ការ​បង្កប់​ទ្រនាប់​ស្កេន​ក្រយៅ​ដៃ​ និង ប៊ូតុង​ Home ​ក្រោម​​អេក្រង់។ រំលឹក​ថា​កាល​ឆ្នាំ​ ២០១៥ Apple ទទួល​បាន​​ប៉ាតង់​លើ​ការ​ប្រើ​ប្រាស់​បច្ចេកវិទ្យា​ដែល​អាច​បង្កប់​ទ្រនាប់​ស្កេន​ក្រយៅ​ដៃ​ពី​ក្រោម​ផ្ទាំង​អេក្រង់​បាន។ Samsung បាន​ដក​ចេញ​ប៊ូតុង​ Home ពី​ S8/S8+ ប៉ុន្តែ​ទ្រនាប់​ស្កេន​ក្រយៅ​ដៃ​បាន​ប្ដូរ​ទីតាំង​ទៅ​នៅ​ក្បែរ​កាមេរ៉ា​ផ្នែក​ខាង​ក្រោយ​ឯណោះ៕

​​​​ ​​​

ប្រភព៖ Cnet   ប្រែ​សម្រួល៖ សុខហេង