ពូទីន៖ ទំនាក់ទំនង រុស្ស៊ី-អាមេរិក កាន់តែដុនដាប តាំងពី ត្រាំ ឡើងកាន់តំណែង
- 2017-04-13 03:42:12
- ចំនួនមតិ 0 | ចំនួនចែករំលែក 0
ពូទីន៖ ទំនាក់ទំនង រុស្ស៊ី-អាមេរិក កាន់តែដុនដាប តាំងពី ត្រាំ ឡើងកាន់តំណែង
ចន្លោះមិនឃើញ
ប្រធានាធិបតីរុស្ស៊ី វ្ល៉ាឌីមៀ ពូទីន (Vladimir Putin) បាននិយាយថា ទំនាក់ទំនងរវាងប្រទេសរុស្ស៊ី និងសហរដ្ឋអាមេរិក កាន់តែដុនដាបខ្លាំង ចាប់តាំងពី លោក ដូណាល់ ត្រាំ ក្លាយជាប្រធានាធិបតី។
«អាចនិយាយបានថា កម្រិតនៃការជឿទុកចិត្ត ទៅលើកម្រិតការងារ ជាពិសេសកម្រិតយោធា គឺមិនត្រូវបានធ្វើឲ្យប្រសើរឡើងឡើយ តែបែរជាដុនដាបទៅវិញ»។ នេះបើតាមការឲ្យដឹងពី ពូទីន។
នៅក្នុងបទសម្ភាសន៍មួយ ដែលបានចេញផ្សាយដោយ វិមាន Kremlin នៃទីក្រុងមូស្គូ បានឲ្យដឹងថា ប្រធានាធិបតីរូបនេះ ក៏ត្រូវបានគេចោទសួរ អំពីការចោទប្រកាន់លើរដ្ឋាភិបាលស៊ីរី ថាបានវាយប្រហារដោយប្រើអាវុធគីមី នៅក្នុងខេត្តអ៊ីដលីប ផងដែរ។
ពូទីន បានផ្ដល់ការពន្យល់ចម្បង ចំនួន២ សម្រាប់ឧបទ្ទវហេតុដ៏គួរឲ្យរន្ធត់នោះថា ទី១ កងទ័ពអាកាសរបស់រដ្ឋាភិបាលស៊ីរី បានវាយប្រហារចំឃ្លាំងផ្ទុកអាវុធគីមី របស់ក្រុមឧទ្ទាម បណ្ដាលឲ្យសាយភាយឧស្ម័នពុល និង ទី២ ឧបទ្ទវហេតុនោះ ជាការរចនាឡើងដើម្បីបង្ខូចមួលបង្កាច់រដ្ឋាភិបាលស៊ីរី។
គួរបញ្ជាក់ថា មេដឹកនាំរុស្ស៊ី បានធ្វើការអះអាងដ៏គួរឲ្យភ្ញាក់ផ្អើលនេះ នៅក្នុងអំឡុងពេលធ្វើសន្និសីទកាសែតមួយ ជាមួយប្រធានាធិបតីអ៊ីតាលី Sergio Mattarella។ ពូទីន បានទទូចថា រុស្ស៊ីនឹងទ្រាំទទួលរងការរិះគន់ពីលោកខាងលិច ចំពោះការលូកដៃនៅស៊ីរី។
ជាមួយគ្នានេះដែរ ពូទីន អះអាងថា រុស្ស៊ីមានព័ត៌មានអំពី គម្រោងវាយប្រហាររបស់សហរដ្ឋអាមេរិក ទៅលើភាគខាងត្បូងរាជធានីដាម៉ាស ក្នុងគោលបំណងដើម្បីស្ដីបន្ទោស ក៏ដូចជាសងសឹកចំពោះការប្រើអាវុធគីមីរបស់រដ្ឋាភិបាលស៊ីរី ទៀតផង។ ទោះជាយ៉ាងណា ពូទីន មិនបានបង្ហាញពីភស្តុតាងណាមួយ ចំពោះការអះអាងរបស់ខ្លួនឡើយ៕