ស៊ីរីរងទុក្ខជាថ្មី ដោយសារគ្រឿងផ្ទុះប្រល័យជីវិតក្មេងយ៉ាងតិច ៦៨នាក់

2017-04-16 15:54:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ចំនួនជនរងគ្រោះដោយសារការបំផ្ទុះគ្រាប់បែកលើក្បួនរថយន្តដឹកជនភៀសខ្លួនស៊ីរីកាលពីយប់មិញ បានកើនឡើងដល់ ១២៦នាក់ ហើយក្នុងនោះមានកុមារយ៉ាងតិច ៦៨នាក់។

ហេតុការណ៍ដ៏សង្វេគនេះ កើតឡើងក្រោយពេលរថយន្តផ្ទុកដោយគ្រឿងផ្ទុះ បានបើកបុកក្បួនរថយន្តក្រុងដឹកជនភៀសខ្លួនស៊ីរីចេញពីតំបន់ប្រយុទ្ធគ្នាដ៏ក្ដៅគគុកជិតក្រុង Aleppo។ ក្រុមអ្នកអង្កេតសិទ្ធិមនុស្ស បាននិយាយថា ជនភៀសខ្លួនយ៉ាងតិច ១០៩នាក់ បានស្លាប់ ជាមួយនឹងក្រុមជំនួយមនុស្សធម៌ ព្រមទាំងពួកឧទ្ទាមផ្សេងទៀត។ ក្រៅពីនេះ នៅមានមនុស្សជាច្រើនទៀតបានរងរបួស ដែលអាចធ្វើឲ្យចំនួនអ្នកស្លាប់កើនឡើងជាលំដាប់។

នេះគឺជាការវាយប្រហារបង្ហូរឈាមជនស៊ីវិលដ៏ធំមួយនៅប្រទេសស៊ីរី ក្នុងរយៈពេលប្រមាណ ១ឆ្នាំចុងក្រោយ។ ជនរងគ្រោះភាគច្រើនគឺជាអ្នករស់នៅភូមិ al-Foua និង Kefraya នៃខេត្តIdlib ដែលកំពុងរងគ្រោះដោយសង្គ្រាមផ្ទៃក្នុង ហើយរត់ភៀសខ្លួនរកកន្លែងមានសុវត្ថិភាព។ មិនទាន់មានក្រុមណា ចេញមុខទទួលខុសត្រូវលើការវាយប្រហារដ៏សាហាវនេះនៅឡើយទេ៕