សៀវ ង៉ុយ មួយជីវិតនេះមិនទៅណាឆ្ងាយពីប្រដាល់

2017-04-18 03:09:53
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ជើងខ្លាំងទម្ងន់ស្រាលដែលមានខ្សែក្រវាត់និងពានរង្វាន់ច្រើនគ្រឿងក្នុងដៃ សៀវ ង៉ុយ ប្រាប់ថាសម្រាប់ជីវិតមួយនេះមិនទៅណាឆ្ងាយពីប្រដាល់គុនខ្មែរឡើយព្រោះឃើញគេឡើងវ៉ៃម្ដងៗអារម្មណ៍មិនស្ងប់ឡើយ។

កីឡាករ សៀវ ង៉ុយ ខៀវ

អ្នកលេងគុនខ្មែរ សៀវ ង៉ុយ បាននិយាយថា ខ្លួនពិតជាស្រឡាញ់អាជីពជាអ្នកប្រដាល់មួយនេះខ្លាំង ហើយរបរឈឺខ្លួនមួយនេះបានផ្ដល់ឲ្យគេបានច្រើនណាស់។ នៅពេលខាងមុខអ្នកប្រដាល់រូបនេះគេសន្យាថានៅតែបន្តអាជីពប្រដាល់ដដែល បើទោះជាមិនអាចឡើងប្រកួតបានក្ដីតែធ្វើជាគ្រូបង្វឹកបន្តទៀត។ មួយរយៈពេលមុនអ្នកប្រដាល់មកពីខេត្តព្រៃវែងរូបនេះផ្អាកប្រកួតម្ដងហើយ តែនៅពេលឃើញកីឡាករដទៃឡើងប្រកួត ធ្វើឲ្យរូបនេះនៅមិនសុខហើយជំរុញទឹកចិត្តគេឲ្យចូលប្រឡូកនិងអាជីពនេះឡើងវិញ។

កីឡាករ សៀវ ង៉ុយ ខៀវ

ម្ចាស់ខ្សែក្រវាត់សមរភូមិអ្នកប្រយុទ្ធ(PNN)រូបនេះប្រាប់ទៀតថា ប្រដាល់គុនខ្មែរជួយគេច្រើនណាស់ ដូចជាជីវភាពគ្រួសាររាងធូរធារមិនសូវលំបាកដូចមុនបន្ទាប់ពីគេឈ្នះខ្សែក្រវាត់ដែលមានប្រាក់រង្វាន់ ១ម៉ឺនដុល្លារអាមេរិក និងថ្មីៗនេះឈ្នះខ្សែក្រវាត់ Skyland ថែមទៀតនេះ ក្រៅពីប្រាក់រង្វាន់មានដូចកេរ្តិ៍ឈ្មោះល្បីល្បាញទៅណាក៏គេស្គាល់ទៀតផង។

សៀវ ង៉ុយ ជាអ្នកប្រដាល់មកពីសមាគន៍ប្រដាល់ក្រសួងការពារជាតិ កូនសិស្សលោកគ្រូ ធន់ សុភា។ កីឡាកររូបនេះមកពីខេត្តព្រៃវែង ចាប់ផ្ដើមប្រកួតតាំងពីឆ្នាំ២០១០ មកម្ល៉េះ បើគិតមកដល់ពេលនេះប្រកួតបានប្រហែលជា៣០០ដងមកហើយ៕

អត្ថបទ៖ នួន ស៊ីណា