គឿម គឿត តស៊ូស៊ីឈ្នួលគេ សន្សំ១ខែ២០ដុល្លារជាង១០ឆ្នាំ រហូតមានលុយទិញកង់បីរត់ខ្លួនឯង
- 2017-04-18 06:43:02
- ចំនួនមតិ 0 | ចំនួនចែករំលែក 0
គឿម គឿត តស៊ូស៊ីឈ្នួលគេ សន្សំ១ខែ២០ដុល្លារជាង១០ឆ្នាំ រហូតមានលុយទិញកង់បីរត់ខ្លួនឯង
ចន្លោះមិនឃើញ
ដើម្បីចាកផុតពីភាពក្រីក្រ ដើម្បីគ្រួសារ ដើម្បីខ្លួនឯង យុវជនម្នាក់បានតស៊ូពុះពារក្នុងជីវិត មិនថាក្ដៅរងាស៊ីឈ្នួលរត់តុកៗឱ្យគេ សន្សំលុយបានមួយខែ ២០ដុល្លារជាង ១០ឆ្នាំ ទម្រាំអាចមានលទ្ធភាពទិញរ៉ឺម៉កកង់បីតម្លៃ ២៤០០ដុល្លារ(ម៉ូតូធំ) រត់ខ្លួនឯង។
យុវជនតស៊ូក្នុងជីវិត គឿម គឿត មានស្រុកកំណើតក្នុង ភូមិគោកតាចាន់ ឃុំគោកចក ស្រុកសៀមរាប ខេត្តសៀមរាប។ កើតនៅក្នុងគ្រួសារក្រីក្រមួយ គឿម គឿត មានបងប្អូន ៤នាក់ ក្នុងនោះលោកជាកូនទី ៤ក្នុងគ្រួសារ។ និយាយរៀងរដឺនៗបន្តិចអ្នក ខេត្តសៀមរាបរូបនេះ ប្រាប់ថា ឪពុករបស់លោកបានស្លាប់តាំងពីលោកនៅអាយុ ២ឆ្នាំ ចាប់ពីពេលនោះមកគ្រួសារចាប់ផ្ដើមធ្លាក់ខ្លួនក្រ ហើយនៅពេលលោកមានអាយុ ១៣ឆ្នាំក៏ចាប់ផ្ដើមធ្វើការសំណង់រកលុយមកចិញ្ចឹមម្ដាយ។ គឿត ប្រាប់ទៀតថា មិនបានរៀនសូត្របានខ្ពស់ដូចគេទេ គឺបានបញ្ចប់ការសិក្សាត្រឹមថ្នាក់ទី ២ ប៉ុណ្ណោះ។
លំបាកខ្លាំងក្នុងជីវិតប៉ុណ្ណា ក៏យុវជនរូបនេះមិនដែលបាក់ទឹកចិត្តដែរ ពេលដែលលោកមានអាយុ ២២ឆ្នាំ ក៏ចាប់ផ្ដើមស៊ីឈ្នួលរត់កង់បីឱ្យគេ។ មកដល់ត្រង់ចំណុចនេះ គឿត ហាក់ប្រែសំឡេងនិយាយរៀងរអាក់រអួលបន្តិចថា៖ "ហឹមម... រត់ឱ្យគេដំបូងបានតែ១ខែ ៦០ដុល្លារទេ ដល់បន្ទាប់មកទៀតបាន ៧០ដុល្លារ និងប្រាក់ខែចុងក្រោយបាន ៩០ដុល្លារ។ រាល់ខែខ្ញុំតែងដក២០ដុល្លារសន្សំ ក្រៅពីហ្នឹងយកជួយម៉ែ មែនលេងសើចទេ ដល់ខ្ញុំអាយុ ៣៣ទើបសន្សំលុយបានទិញតុកៗរត់ខ្លួនឯងតម្លៃ ២៤០០ដុល្លារ"។
មកដល់ពេលនេះជីវិតយុវជនតស៊ូរូបនេះ ចាប់ផ្ដើមល្អប្រសើរជាងមុនហើយ ដោយក្នុង១ថ្ងៃលោកអាចរកចំណូលបាន ៤ម៉ឺន ទៅ ៥ម៉ឺនរៀល ប៉ុន្តែបើមានបុណ្យទានអាចដល់ ១៥ ទៅ ២០ម៉ឺនរៀលដែរ៕