គ្រូលីគកំពូលពីររូប ថា Gbenga បច្ចុប្បន្នខុសពីនៅបឹងកេតមួយចំណុច

2017-04-24 03:39:11
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក នុត សូនី គ្រូបង្វឹកប៉ូលិស និងលោក សុខ វាសនា គ្រូបង្វឹកក្រុមអាស៊ីអឺរ៉ុបលើកនិយាយពីទម្រង់លេងអតីតខ្សែប្រយុទ្ធបឹងកេត Ajayi Gbenga Samuel ។

Ajayi Gbenga Samuel អាវស(កាលលេងនៅបឹងកេត)

ខ្សែប្រយុទ្ធ Ajayi Gbenga Samuel បានរួមចំណែកបោះបាល់ឲ្យមិត្តរួមក្រុម Bisan George ដើម្បីទាត់បញ្ចូលទីទៅលើក្រុមលោក នុត សូនី បានមួយគ្រាប់ និងរកបានមួយគ្រាប់ក្នុងជំនួប អាស៊ីអឺរ៉ុប យកឈ្នះ ក្លឹបប៉ូលិស ២-១ នៅស្តាតចាស់កាលពីពេលកន្លងទៅ។

ក្រោយប្រកួតចាប់ភ្លាមគ្រូបង្វឹកទាំងពីរនិយាយស្រដៀងគ្នាថា ខ្សែប្រយុទ្ធសញ្ជាតិនីហ្សេរីយ៉ារូបនេះហាក់ធ្លាក់ទម្រង់ខ្លាំងខុសពីឆ្នាំមុនដែលលេងឲ្យបឹងកេតគឺដោយសារកម្លាំងធ្លាក់ចុះ។ ប៉ុន្តែលោក សុខ វាសនា អះអាងថា Gbenga នៅតែជាកីឡាករល្អម្នាក់ក្នុងចំណោមកីឡាករបរទេសទាំងអស់ដែលកំពុងលេងនៅកម្ពុជា។

លោក សុខ វាសនា

ខណៈលោក នុត សូនី បញ្ជាក់ទៀតថា Gbenga ធ្លាក់ចុះផ្នែកកម្លាំង ពីព្រោះវ័យរបស់គេកាន់តែចាស់។ ចំពោះបច្ចេកទេសគ្រូបង្វឹករូបនេះមើលឃើញថា នៅមានភាពល្អអាចបទបែនតាមកាលៈទេសៈល្អ ដែលអាចបង្កើតឱកាសឲ្យមិត្តរួមក្រុមបានគ្រប់ពេល។

លោក នុត សូនី

បច្ចុប្បន្ន Ajayi Gbenga Samuel ជាខ្សែប្រយុទ្ធរបស់ក្លឹបអាស៊ីអឺរ៉ុប។ មុនលេងនៅក្លឹបនេះរូបគេធ្លាប់លេងនៅលីគកំពូលរបស់ថៃរួមមានក្លឹប Bangkok Glass ឆ្នាំ២០០៨-២០១២ ក្លឹប Chonburi ឆ្នាំ២០១៣-២០១៤ លេងឲ្យក្លឹប Samut Songkhram ឆ្នាំ២០១៤-២០១៥ និងផ្លាស់មកលេងនៅបឹងកេតនៅឆ្នាំ២០១៥-២០១៦៕

អត្ថបទ៖ ស្រី សុវណ្ណដារ៉ា