៨ ចំណុច Galaxy S8 ប្រល័យយកឈ្នះ iPhone 7 យ៉ាងងាយស្រួល

2017-04-29 04:41:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ទន្ទឹមនឹងការសម្ពោធបង្ហាញ Galaxy S8 រំលងប្រហែល ១ ខែហើយនោះ ការចេញលក់សម្រាប់ទីផ្សារកម្ពុជាក៏កៀកនឹងជិតមកដល់នៅដើមខែក្រោយ។ យោងតាមគេហទំព័រក្រៅស្រុកមួយបានរៀបរាប់ពីចំណុចពិសេសៗទាំង ៨ របស់ Galaxy S8 ដែលអាចយកឈ្នះទៅលើ iPhone 7 ដែលបង្ហាញខ្លួនចុងឆ្នាំទៅបានយ៉ាងស្រួល។

១. កម្រិតបង្ហាញអេក្រង់:

ដូចអ្វីដែលប្រិយមិត្តបានដឹងហើយថា Galaxy S8 មានអេក្រង់ទំហំ ៥,៨ អ៊ីញធំជាង iPhone 7 មានត្រឹមតែ ៤,៧ អ៊ីញប៉ុណ្ណោះ។ អាចថាវាមិនសំខាន់ សម្រាប់អ្នកប្រាថ្នាស្មាតហ្វូនអេក្រង់តូច ប៉ុន្តែបើលើកឡើងពីកម្រិតបង្ហាញ និងសមាមាត្រអេក្រង់របស់ S8 គឺយកឈ្នះដាច់ទៅលើ iPhone 7 ។

២. រន្ធដោតកាស:

Apple បានសម្រេចដកចោលនូវរន្ធដោតកាសទំហំ 3,5mm ពីទូរស័ព្ទ iPhone 7 កាលពីឆ្នាំទៅ ហើយវាក៏បង្កការមិនពេញចិត្តពីអ្នកប្រើប្រាស់ iOS តែបើយើងក្រឡេកមកមើល S8 ឯណេះវិញ គឺនៅរក្សាការបំពាក់រន្ធដោតកាសដដែល ទន្ទឹមនឹងមុខងារមិនជ្រាបទឹក IP68 ខ្ពស់ជាងស្តង់ដារ IP67 របស់ iPhone 7។

៣. មុខងារដោះសោ:

S8 បានភ្ជាប់មកជាច្រើន នូវមុខងារដោះសោអេក្រង់ ដូចជាការប្រើប្រាស់ Password, មុខងារស្កេនផ្ទៃមុខ, ស្កេនប្រស្រីភ្នែក និងមុខងារស្កេនក្រញៅដៃ ខណៈ iPhone 7 របស់ Apple មានត្រឹមតែ ២ គត់គឺ TouchID (ស្កេនក្រញៅដៃ) និងការដាក់ Password (លេខកូដ) ធម្មតា។

៤. ការបន្ថែម MicroSD:

ជាធម្មតាបើលើកនិយាយពី iPhone បើចង់បានអង្គផ្ទុកទិន្នន័យខ្ពស់ គឺត្រូវថែមលុយ ១០០ ដុល្លារ ទៅ ២០០ ដុល្លារ លើអង្គផ្ទុកតាមជម្រើស ។ ងាកទៅមើល S8 ឯណោះវិញ ដោយទោះបីមានត្រឹមតែអង្គផ្ទុក 64GB ក្ដី ប៉ុន្តែវាក៏អនុញ្ញាតឱ្យយើងបន្ថែម MicroSD ខាងក្រៅ ដល់ទៅ ២៥៦ ជីហ្គាបៃ ដែល MicroSD ប្រភេទនេះ បច្ចុប្បន្ននៅលើទីផ្សារលក់មិនដល់ ១៥០ ដុល្លារឡើយ។

៥. ការរចនា

បើយើងនិយាយពីផ្នែកខាងមុខនៃម៉ាស៊ីន iPhone 7 ពិតជាមិនអាចស៊ីដាច់លើប្រភេទផ្ទៃអេក្រង់ពេញរបស់ S8 ពិតមែន ។ អ្នកអាចរអ៊ូថាកម្រាស់វារាងក្រាស់ជាង i7 បន្តិចហើយ ប៉ុន្តែត្រូវដឹងវាមានលែនកាមេរ៉ារៀបស្មើខ្នងសំបកក្រោយ គឺមិនលៀនចេញមកក្រៅដូច iPhone របស់ Apple ដែលវាពិបាកសម្រាប់អ្នកប្រើប្រាស់ក្នុងការដាក់ទូរស័ព្ទលើតុចុចលេងហ្គេមអ្វីជាដើម។

៦. មុខងារសាកថ្មឥតខ្សែនិងថាមពលថ្ម:

សម្រាប់មុខងារសាកថ្មឥតខ្សែ (Wireless Charging) ជាទូទៅ iPhone 7 ពុំអាចប្រើប្រាស់បានឡើយ។ មិនជាបញ្ហាសម្រាប់ S8 វាមានទាំងមុខងារសាកថ្មរហ័ស សាកថ្មឥតខ្សែ និងសាកថ្មរហ័សឥតខ្សែ ថែមទៀតផង ដែល ៣ មុខងារនេះ គឺបំបាក់លើ iPhone 7 ស្រួលជាទីបំផុត។ ថាមពលថ្មរបស់ S8 មាន ទំហំ ៣,000 មីលីអំពែ វ៉ាដាច់លើ iPhone 7 មានត្រឹមតែ១,៩៦០ មីលីអំពែ ។

៧. ការតុបតែងកម្មវិធី:

ករណីនេះមិនមានន័យថា ផ្ទៃកម្មវិធី Android ប្រសើរជាង iOS ឡើយ ប៉ុន្តែបើយើងនិយាយជាភាសាសាមញ្ញ សូម្បីមុខងារប៊ូតុងបញ្ជា ទាំង ៣ នៅខាងក្រោម S8 ក៏អនុញ្ញាតឱ្យយើងផ្លាស់ប្ដូររៀបចំតាមលំដាប់បាន មួយវិញទៀតមុខងារ Always on Display នឹងអនុញ្ញាតឱ្យយើងអាចបន្ថែមនូវ Widgets មួយចំនួនផ្សេងទៀត នៅលើផ្ទាំង Lock Screen ។ ក្រៅពីនោះគឺជំនួយការ Bixby និង Google Assistant ដែលវាជម្រើស ២ លើទូរស័ព្ទតែមួយ S8 ផ្ទុយទៅវិញ សម្រាប់ iPhone 7 គឺពុំមានដូចគេឡើយ។

៨. បច្ចេកវិទ្យា VR:

បច្ចុប្បន្ន SAMSUNG បានប្រកាសបង្ហាញនូវ Gear VR ជំនាន់ទី ៣ ដែលមានមុខងារបញ្ជាប្រជែងនឹង Apple ដែលប្រើប្រាស់នូវផលិតផល VR ដទៃ។ មិនមានមនុស្សច្រើនឡើយ ដែលប្រើប្រាស់នូវឧបករណ៍ Gear VR ផ្ទាល់របស់ SAMSUNG តែបើយើងនិយាយប្រៀបធៀបជាមួយផលិតផល Apple គឺ S8 ឈ្នះទៀតហើយ មួយវិញទៀតគឺមុខងារ DeX ដែលវាអនុញ្ញាតឱ្យអ្នកប្រើប្រាស់អាចបម្លែងទូរស័ព្ទ S8 របស់ខ្លួនទៅជាកុំព្យូទ័រ PC បានយ៉ាងឡូយ។

សរុបមកវិញសម្រាប់ការលើកឡើងទាំង ៨ ចំណុចខាងលើ ក៏ជឿជាក់ថាប្រិយមិត្តអ្នកអានអាចនឹងកំពុងចាប់ចិត្តលើ Galaxy S8 ច្រើនហើយ។ បញ្ជាក់ថាតម្លៃក្រៅស្រុកបច្ចុប្បន្ន iPhone 7 ទំហំ 128GB មានតម្លៃ ៧៤៩ ដុល្លារប្រកៀកប្រកិតនឹង Galaxy S8 ទំហំ 64GB តម្លៃ ៧៥០ ដុល្លារ។

ប្រភព៖ Androidauthority ប្រែសម្រួល៖ ប៊ុណ្ណារ៉ា