ការប្រើប្រាស់ Facebook បានផ្ដល់ទាំងអត្ថប្រយោជន៍និងគុណវិបត្តិ សោតយ៉ាងដូចជាថ្ងៃណាមួយបើគណនី Facebook របស់អ្នកត្រូវបានគេ Hack យក នោះបញ្ហាជាច្រើនអាចនឹងកើតមានឡើងទៅលើអ្នកផ្ទាល់។ ម្ល៉ោះហើយក្នុងថ្ងៃនេះ Sabay ក៏សូមចែករំលែកនូវវិធីសាស្ត្រ ៤ ចំណុច ដែលអ្នកត្រូវធ្វើភ្លាមៗ ករណីបើអ្នកបានដឹងថា Facebook របស់អ្នកមានភាពខុសប្រក្រតីឫត្រូវបានគេ Hack ។

ធ្វើម៉េចទើបដឹងថាគណនី Facebook របស់អ្នកត្រូវបានគេ Hack?

ជាធម្មតាពួក Hacker ឫពួកអនាមិកបើគេបានលួចលុកលុយចូល ក្នុងគណនី Facebook របស់យើង នោះពួកគេ អាចនឹងបន្សល់ដានឱ្យយើងដឹង។ សូមអ្នកចុចចូលទៅកាន់ Account Settings > Security > Active Sessions (ចុច Edit) នោះអ្នកនឹងបានឃើញនូវឧបករណ៍ណាខ្លះ ដែលបាន Log In គណនី Facebook របស់យើង ហើយករណីបើយើងឃើញឈ្មោះឧបករណ៍ណាប្លែក សូមធ្វើការបញ្ចប់ដោយចុច Log Out ឫ End ។

+៤ ចំណុចដែលអ្នកត្រូវធ្វើជាបន្ទាន់ ៖

១. ប្ដូរលេខកូដសម្ងាត់នៃគណនី

ករណីបើជនខិលខូចមិនទាន់បានប្ដូរនូវលេខកូដគណនី នោះអាចជាសំណាងរបស់អ្នក ហើយសូមធ្វើការផ្លាស់ប្ដូរលេខសម្ងាត់ភ្លាមៗ ដោយចុចចូល Account Settings > General > ចុចត្រង់ពាក្យ Password ហើយធ្វើការផ្លាស់ប្ដូរលេខសម្ងាត់ថ្មី។

** ករណីអ្នកលួច Hack ប្ដូរកូដសម្ងាត់មុនយើង ៖

ករណីអ្នកដែល Hack បានប្ដូរកូដសម្ងាត់មុន សូមអ្នកប្រើវិធី Forgot your password? ហើយវាទាមទារឱ្យអ្នកវាយបញ្ចូល Email (ត្រូវចាំកូដ Email ដើម) ឫលក្ខខណ្ឌវាយបញ្ចូលលេខទូរស័ព្ទ ដើម្បី Reset Password ដែលគេប្ដូរយកត្រលប់មកវិញ។

២.ធ្វើការរាយការណ៍ទៅកាន់ក្រុមហ៊ុនថា Facebook យើងខូច ៖

បើអ្នកជួបបញ្ហាគណនីរបស់អ្នក សុខៗផ្ញើឯកសារមេរោគឫពាណិជ្ជកម្មផ្សេងៗ ទៅកាន់គណនីរបស់មិត្តភ័ក្ដិអ្នក នោះក៏មានន័យថាគណនីរបស់អ្នកមានភាពមិនប្រក្រតីផងដែរ ម្ល៉ោះហើយសូមធ្វើការរាយការណ៍ទៅកាន់ Facebook (Report Compromised Account) ដោយចុចតំណត្រង់នេះ

៣.គ្រប់គ្រងស្ថានការណ៍ខូចខាតជាបន្ទាន់ ៖

បន្ទាប់ពីប៉ុន្មានជំហានខាងលើហើយ បើសិនជាអាចអ្នកក៏គួរតែធ្វើការបង្ហោះសារចែកចាយទៅកាន់អ្នកដទៃឫមិត្តភ័ក្ដិរបស់អ្នក ថាបច្ចុប្បន្នគណនី Facebook ផ្ទាល់ខ្លួនរបស់អ្នកកំពុងមានគេលួចយកទៅប្រើប្រាស់ (Hack) ជៀសវាងការជួបបញ្ហាផ្សេងៗ ដែលអាចបង្កផលប៉ះពាល់យ៉ាងធ្ងន់ធ្ងរមកលើរូបយើងផ្ទាល់។

៤.លុបចោលកម្មវិធីគួរឱ្យសង្ស័យ ៖

មិនមែនមានន័យថាតម្រូវឱ្យអ្នកលុបកម្មវិធីពីក្នុងទូរស័ព្ទផ្ទាល់នោះទេ ផ្ទុយទៅវិញចង់សំដៅទៅរាល់ការភ្ជាប់នូវកម្មវិធីទាំងប៉ុន្មានជាមួយ Facebook (ឧទាហរណ៍: អ្នកភ្ជាប់គណនី Facebook ជាមួយហ្គេម Hay Day) ។ ករណីបើអ្នកគិតថាកម្មវិធីឫហ្គេមនោះ វាពុំមានប្រយោជន៍សម្រាប់អ្នកឫគួរឱ្យសង្ស័យ សូមអ្នកចុច Remove វាចោលពីគណនីដោយចូលទៅកាន់ Account Settings > App ហើយមើលនៃបញ្ជីកម្មវិធីទាំងអស់ រួចចុច Edit > ធ្វើការ Remove ទៅតាមការគួរ។

ក្រោយពេលអ្នកបានអនុវត្តជំហានទាំង ៤ ខាងលើនេះហើយ Sabay ក៏ជឿថាវាអាចជាបទពិសោធន៍ថ្មីមួយសម្រាប់អ្នកទាំងអស់គ្នា ហើយក៏ជាវិធីដោះស្រាយយ៉ាងរហ័សនិងបានផលបំផុត ចំពោះការជួបបញ្ហាដូចដែលបានរៀបរាប់ខាងលើ៕

អត្ថបទ៖ សុខហេង