ប្រទះឃើញ យន្តហោះទម្លាក់គ្រាប់បែកនុយក្លេអ៊ែរអាមេរិក ហោះរំលងកូរ៉េខាងជើង

2017-05-02 04:07:51
ចំនួនមតិ 0 | ចំនួនចែករំលែក 0

ចន្លោះមិនឃើញ

យន្តហោះទម្លាក់គ្រាប់បែកអាមេរិក ត្រូវបានគេប្រទះឃើញហ្វឹកហាត់ការវាយប្រហារនុយក្លេអ៊ែរ នៅលើប្រទេសកូរ៉េខាងជើង ស្របពេលដែលភាពតានតឹងរវាងប្រទេសទាំង២ កាន់តែកើនឡើងខ្លាំង។

យន្តហោះទម្លាក់គ្រាប់បែក ប្រភេទ Rockwell B1-B Lancer

យន្តហោះទម្លាក់គ្រាប់បែក ប្រភេទ Rockwell B1-B Lancer ជាច្រើនគ្រឿង ដែលជាយន្តហោះចម្បាំងសំខាន់របស់សហរដ្ឋអាមេរិក រចនាឡើងសម្រាប់ទម្លាក់គ្រាប់បែកនុយក្លេអ៊ែរ ត្រូវបានគេប្រទះឃើញ នៅលើឧបទ្វីបកូរ៉េ។ ជាមួយគ្នានេះដែរ កូរ៉េខាងជើង បានឲ្យដឹងថា យន្តហោះចម្បាំងទាំងនោះ បានចូលមកដែនដីរបស់ខ្លួន កាលពីម្សិលមិញ។

យន្តហោះ Rockwell B1-B Lancer មានរហស្សនាមថា «Bone»

បើយោងតាមប្រព័ន្ធផ្សព្វផ្សាយរបស់សហរដ្ឋអាមេរិក បានឲ្យដឹងថា យន្តហោះ Rockwell B1-B Lancer បានសហការជាមួយនាវាដឹកយន្តហោះចម្បាំង USS Carl Vinson និង នាវាមុជទឹក USS Michigan។ យន្តហោះចម្បាំង ដែលមានសមត្ថភាពអាចផ្ទុកគ្រាប់បែកនុយក្លេអ៊ែរ រហូតដល់ទៅ ២៤គ្រាប់ទាំងនោះ បានហោះចេញពីមូលដ្ឋានរបស់ខ្លួន នៅលើកោះ Guam ដើម្បីចូលរួមជាមួយនាវា និងយន្តហោះចម្បាំងបំបាំងកាយ F-35។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានឲ្យដឹងថា «យន្តហោះ B-1B មកពី Guam បានហោះនៅលើផ្ទៃមេឃ នៃសមុទ្រខាងកើត និងបានចូលរួមប្រតិបត្តិការ ជាមួយនឹងបំណងវាយប្រហារ ដោយក្នុងនោះរួមមានទាំង នាវាដឹកយន្តហោះចម្បាំង និងនាវាមុជទឹក ទៀតផង»។

យន្តហោះ Rockwell B1-B Lancer ទម្លាក់គ្រាប់បែក នៅប្រទេសអាហ្គានីស្ថាន

មិនតែប៉ុណ្ណោះ កូរ៉េខាងត្បូង បានអះអាងថា យន្តហោះចម្បាំង Rockwell B1-B Lancer ចំនួន២គ្រឿង ពិតជាបានហោះនៅលើឧបទ្វីបកូរ៉េ កាលពីថ្ងៃច័ន្ទ ពិតមែន ព្រោះពួកវាបានចូលរួមធ្វើសមយុទ្ធយោធារួមគ្នា ជាមួយកងកម្លាំងអាកាសកូរ៉េខាងត្បូង៕

ប្រភព៖ Dailystar ប្រែសម្រួល៖ សេង ឡុង