Mbappe កីឡាករវ័យក្មេង មានក្លឹប៦កំពុងតាមញ៉ែ ក្នុងតម្លៃខ្លួន១១០លានផោន

2017-05-03 07:07:22
ចំនួនមតិ 0 | ចំនួនចែករំលែក 0

ចន្លោះមិនឃើញ

Kylian Mbappe ខ្សែប្រយុទ្ធវ័យក្មេងរបស់ក្រុម Monaco ត្រូវបានក្លឹបធំៗជាច្រើនដណ្ដើមគ្នាទិញយក ក្រោយពីកីឡាករវ័យ១៨ឆ្នាំរូបនេះ បង្ហាញទម្រង់លេងល្អសឹងមិនគួរឱ្យជឿនៅរដូវកាលនេះ។

ប្រភពពីលោក Pierre Mbappe ពូរបស់ Mbappe បាននិយាយប្រាប់ Tuttosport ថាបច្ចុប្បន្ននេះមានក្លឹបជាច្រើនកំពុងតែប្រជែងគ្នាចង់បានក្មួយរបស់លោក ដោយតម្លៃនាពេលនេះអាចឈានដល់១១០លានផោនទៅហើយ ទើបអាចផ្ដាច់កុងត្រារបស់គេនៅ Monaco បាន។ "តើ Juventus ជាជម្រើសរបស់ Mbappe មែនទេ? បាទ មែនហើយ ហើយក៏មាន២ក្រុមនៅទីក្រុង Manchester ក្រុម PSG Real Madrid Barcelona... សុទ្ធតែចង់បានគេទាំងអស់។ ក្រុមទាំងអស់នេះ សុទ្ធតែអាចនាំយកគាត់ទៅបាន”។

កីឡាករដែលចេញពីថ្នាលរបស់ AS Bondy ខាងលើនេះ ទើបតែល្បីឈ្មោះក្នុងរដូវកាលនេះទេ ដោយរូបគេបង្ហាញខ្លួនបាន៣៦ប្រកួត រកគ្រាប់បាល់បាន១៥គ្រាប់។ នៅដើមឆ្នាំ២០១៧នេះ Mbappe ក៏បានជាប់ជាជម្រើសជាតិបារាំងបាន២ដងមកហើយដែរ៕

ប្រភព៖ Dailymail ប្រែសម្រួល៖ មុន្នីរម្យ